ਧਰਤੀ ਵੀ ਸੀ ਅੰਬਰ ਵੀ ਸੀ, ਬੋਹੜ ਦੀ ਸੰਘਣੀ ਛਾਂ।
ਰੇਤ ਦੇ ਵਾਂਗੂੰ ਕਿਰ ਗਈ ਹੱਥੋਂ ਛੇ ਬੱਚਿਆਂ ਦੀ ਮਾਂ।
ਸੈਨਿਕ ਪਰਿਵਾਰ ਚ ਸ: ਬਹਾਦਰ ਸਿੰਘ ਘੁੰਮਣ ਦੇ ਘਰ ਜੰਮੀ ਜਾਈ ਬੀਬੀ ਮਹਿੰਦਰ ਕੌਰ ਨੇ ਜਿਸ ਤਨਦੇਹੀ ਨਾਲ ਆਪਣੇ ਸੈਨਿਕ ਪਤੀ ਸ: ਮਹਿੰਦਰ ਸਿੰਘ ਹੇਅਰ ਦੇ ਮੋਢੇ ਨਾਲ ਮੋਢਾ ਜੋੜ ਕੇ ਪਰਿਵਾਰਕ ਤੇ ਸਮਾਜਿਕ ਜ਼ਿੰਮੇਵਾਰੀਆਂ ਨਿਭਾਈਆਂ,ਉਸ ਦੀ ਪਿੰਡ ਕੋਟਲਾ ਸ਼ਾਹੀਆ ਹੀ ਨਹੀਂ ਸਗੋਂ ਪੂਰਾ ਇਲਾਕਾ ਬਟਾਲਾ ਮਿਸਾਲ ਦਿੰਦਾ ਹੈ।
ਆਪਣੇ ਸਾਰੇ ਬੱਚਿਆਂ ਨੂੰ ਉਚੇਰੀ ਸਿੱਖਿਆ ਤੇ ਨੈਤਿਕ ਕਦਰਾਂ ਕੀਮਤਾਂ ਨਾਲ ਨਿਪੁੰਨ ਕਰਕੇ ਸਮਾਜਿਕ ਜ਼ਿੰਮੇਵਾਰੀਆਂ ਦੇ ਰਾਹ ਤੋਰਿਆ।
ਬੀਬੀ ਮਹਿੰਦਰ ਕੌਰ ਜੀ ਦਾ ਬਚਪਨ ਵਿੱਚ ਸਿੱਖਿਆ ਕੀਰਤਨ ਤੇ ਬਾਣੀ ਪੜ੍ਹਨ ਦੀ ਮੁਹਾਰਤ ਨੇ ਉਨ੍ਹਾਂ ਨੂੰ ਇਸਤਰੀ ਸਤਿਸੰਗ ਵਾਲੇ ਪਾਸੇ ਪਿੰਡ ਦੀਆਂ ਔਰਤਾਂ ਦੀ ਅਗਵਾਈ ਕਰਨ ਲਈ ਪ੍ਰੇਰਿਆ। ਇਸ ਦਾ ਅਸਰ ਉਨ੍ਹਾਂ ਦੇ ਪੁੱਤਰਾਂ ਧੀਆਂ ਤੇ ਵੀ ਪਿਆ।
ਵੱਡਿਉਂ ਛੋਟੇ ਭਾਰਤੀ ਸੈਨਾ ਚ ਕਾਰਜਸ਼ੀਲ ਖਿਡਾਰੀ ਪੁੱਤਰ ਕਮਲਜੀਤ ਦੀ ਜਵਾਨ ਉਮਰੇ ਹਾਦਸੇ ਵਿੱਚ ਹੋਈ ਮੌਤ ਨੇ ਉਨ੍ਹਾਂ ਨੂੰ ਝੰਜੋੜ ਕੇ ਰੱਖ ਦਿੱਤਾ। ਉਸ ਹੋਣਹਾਰ ਪੁੱਤਰ ਦੀ ਯਾਦ ਚ ਹਰ ਸਾਲ ਹੋਣ ਵਾਲੀਆਂ ਕਮਲਜੀਤ ਖੇਡਾਂ ਦੀ ਮਾਤਾ ਜੀ ਸਰਪ੍ਰਸਤੀ ਕਰਦੇ ਸਨ।
ਉਨ੍ਹਾਂ ਦੇ ਸਭ ਤੋਂ ਨਿੱਕੇ ਪੁੱਤਰ ਸ: ਪਿਰਥੀਪਾਲ ਸਿੰਘ ਹੇਅਰ ਪੁਲਿਸ ਕਪਤਾਨ) ਹਰਮਨ ਪਿਆਰੇ ਸਮਾਜਕ ਤੇ ਸਾਹਿਤਕ ਸਖਸ਼ੀਅਤ ਹਨ ਉਹਨਾਂ ਦੱਸਿਆ ਕਿ ਬੀਬੀ ਜੀ ਪਰਵਾਰ ਦਾ ਥੰਮ ਸਨ। ਕਿਸੇ ਨੂੰ ਕਦੇ ਨਾ ਡੋਲਣ ਦਿੰਦੇ। ਨਿੱਤ ਨੇਮੀ ਹੋਣ ਕਾਰਨ ਪ੍ਰਭਾਤ ਵੇਲੇ ਹੀ ਕੰਮ ਕਾਰ ਨੂੰ ਜੁੱਟ ਜਾਂਦੇ ਤੇ ਸਵੇਰ ਚੜ੍ਹਨ ਤੋਂ ਪਹਿਲਾਂ ਹੀ ਬਹੁਤੇ ਕੰਮ ਨਿਬੇੜ ਲੈਂਦੇ। ਲਗ ਪਗ 90 ਸਾਲ ਉਮਰ ਮਾਨਣ ਦੇ ਬਾਵਜੂਦ ਉਹ ਪਿੰਡ, ਪਰਿਵਾਰ ਤੇ ਸੰਸਾਰ ਦੀ ਹਰ ਗੱਲ ਵਿੱਚ ਪੂਰੀ ਦਿਲਚਸਪੀ ਲੈਂਦੇ ਰਹੇ।
ਉਨ੍ਹਾਂ ਦੇ ਨਜ਼ਦੀਕੀ ਰਿਸ਼ਤੇਦਾਰ ਤੇ ਸੁਪ੍ਰਸਿੱਧ ਪੰਜਾਬੀ ਕਵੀ ਪ੍ਰੋ: ਗੁਰਭਜਨ ਗਿੱਲ ਦੇ ਕਹਿਣ ਮੁਤਾਬਕ
ਉਹ ਤਾਂ ਕੇਵਲ ਚੋਲ਼ਾ ਬਦਲੇ, ਕੌਣ ਕਹੇ ਮਾਂ ਮਰ ਜਾਂਦੀ ਹੈ।
ਉਹ ਤਾਂ ਆਪਣੇ ਬੱਚਿਆਂ ਅੰਦਰ ਸਾਰਾ ਕੁਝ ਹੀ ਧਰ ਜਾਂਦੀ ਹੈ।
ਪਿਛਲੇ ਦਿਨੀਂ ਸਦੀਵੀਂ ਵਿਛੋਡ਼ਾ ਦੇ ਗਏ ਬੀਬੀ ਮਹਿੰਦਰ ਕੌਰ ਦੇ ਪਰਵਾਰ ਨਾਲ ਸਾਬਕਾ ਡੀ.ਜੀ.ਪੀ. ਰਾਜਦੀਪ ਸਿੰਘ ਗਿੱਲ, ਦੇਸ਼ ਦੇ ਵੱਡੇ ਖਿਡਾਰੀਆਂ ਵਿਧਾਇਕ ਪਰਗਟ ਸਿੰਘ ਤੇ ਸੁਨੀਤਾ ਰਾਣੀ (ਦੋਵੇਂ ਪਦਮ ਸ੍ਰੀ), ਗੁਰਬਖਸ਼ ਸਿੰਘ ਸੰਧੂ ਤੇ ਐਸ.ਐਸ.ਪੰਨੂੰ (ਦੋਵੇਂ ਦਰੋਣਾਚਾਰੀਆ ਐਵਾਰਡੀ) ਗੁਰਬਚਨ ਸਿੰਘ ਰੰਧਾਵਾ, ਬ੍ਰਿਗੇਡੀਅਰ ਹਰਚਰਨ ਸਿੰਘ, ਸੁਰਿੰਦਰ ਸਿੰਘ ਸੋਢੀ, ਰਾਜਬੀਰ ਕੌਰ, ਸੁਖਪਾਲ ਸਿੰਘ ਪਾਲੀ, ਬਲਜੀਤ ਸਿੰਘ ਢਿੱਲੋਂ, ਮਨਜੀਤ ਕੌਰ, ਅਵਨੀਤ ਕੌਰ ਸਿੱਧੂ, ਤੇਜਿੰਦਰ ਪਾਲ ਸਿੰਘ ਤੂਰ, ਸਵਰਨ ਸਿੰਘ ਵਿਰਕ, ਪ੍ਰਭਜੋਤ ਸਿੰਘ, ਗਗਨਦੀਪ ਸਿੰਘ ਭੁੱਲਰ (ਸਾਰੇ ਅਰਜੁਨਾ ਐਵਾਰਡੀ), ਹਰਪ੍ਰੀਤ ਸਿੰਘ ਮੰਡੇਰ, ਸਰਵਨਜੀਤ ਸਿੰਘ, ਮਨਦੀਪ ਕੌਰ, ਗੁਰਵਿੰਦਰ ਸਿੰਘ ਚੰਦੀ (ਸਾਰੇ ਓਲੰਪੀਅਨ), ਏਸ਼ੀਅਨ ਚੈਂਪੀਅਨ ਅਰਪਿੰਦਰ ਸਿੰਘ, ਜੂਨੀਅਰ ਵਿਸ਼ਵ ਚੈਂਪੀਅਨ ਨਵਜੀਤ ਕੌਰ ਢਿੱਲੋਂ, ਡੀ.ਆਈ.ਜੀ. ਗੁਰਪ੍ਰੀਤ ਸਿੰਘ ਤੂਰ, ਖੇਡ ਲੇਖਕ ਪ੍ਰਿੰਸੀਪਲ ਸਰਵਣ ਸਿੰਘ, ਪ੍ਰੋ: ਸੁਖਵੰਤ ਸਿੰਘ ਗਿੱਲ, ਨਵਦੀਪ ਸਿੰਘ ਗਿੱਲ, ਫੁਟਬਾਲ ਕੋਚ ਦਲਬੀਰ ਸਿੰਘ ਕਾਲਾ ਅਫਗਾਨਾ , ਪੰਜਾਬੀ ਸਾਹਿੱਤ ਅਕਾਡਮੀ ਲੁਧਿਆਣਾ ਦੇ ਪ੍ਰਧਾਨ ਪ੍ਰੋ: ਰਵਿੰਦਰ ਭੱਠਲ, ਜਨਰਲ ਸਕੱਤਰ ਡਾ: ਸੁਰਜੀਤ ਸਿੰਘ, ਹੰਸ ਰਾਜ ਹੰਸ ਤੇ ਮੁਹੰਮਦ ਸਦੀਕ, ( ਦੋਵੇਂ ਲੋਕ ਗਾਇਕ ਤੇ ਐੱਮ ਪੀ) ਲੋਕ ਗਾਇਕ ਸੁਰਿੰਦਰ ਸ਼ਿੰਦਾ, ਹਰਭਜਨ ਮਾਨ, ਮਨਮੋਹਨ ਵਾਰਿਸ, ਜਸਬੀਰ ਜੱਸੀ,ਅਮਰਜੀਤ ਗੁਰਦਾਸਪੁਰੀ, ਸਵਿੰਦਰ ਸਿੰਘ ਭਾਗੋਵਾਲੀਆ , ਨਵਦੀਪ ਸਿੰਘ ਗਿੱਲ ਤੇ ਜਗਰੂਪ ਸਿੰਘ ਜਰਖੜ ਨੇ ਵੀ ਪਰਿਵਾਰ ਨਾਲ ਦੁੱਖ ਸਾਂਝਾ ਕੀਤਾ ਹੈ।
ਬੀਬੀ ਮਹਿੰਦਰ ਕੌਰ ਜੀ ਦੇ ਤਿੰਨ ਪੁੱਤਰਾਂ ਜਸਮੇਰ ਸਿੰਘ, ਖ਼ੁਸ਼ਕਰਨ ਸਿੰਘ ਤੇ ਪਿਰਥੀਪਾਲ ਸਿੰਘ ਤੋਂ ਇਲਾਵਾ ਦੋ ਬੇਟੀਆਂ ਬਲਕਰਨਜੀਤ ਕੌਰ ਤੇ ਨਿਰਮੋਲ ਜੀਤ ਕੌਰ ਯੂ ਐੱਸ ਏ ਨੇ ਪਰਿਵਾਰਕ ਸਨੇਹੀਆਂ, ਰਿਸ਼ਤੇਦਾਰਾਂ ਤੇ ਹਮਦਰਦਾਂ ਦਾ ਦੁੱਖ ਵੰਡਾਉਣ ਹਮਦਰਦੀ ਪ੍ਰਗਟਾਉਣ ਲਈ ਧੰਨਵਾਦ ਕੀਤਾ ਹੈ।
ਰਾਜਵਿੰਦਰ ਰੌਂਤਾ
