ਸਿਰਫ਼ 9 ਦਿਨਾਂ ਵਿੱਚ 4000 ਮਰੀਜਾਂ ਵਾਲਾ ਹਸਪਤਾਲ ਬਣ ਕੇ ਤਿਆਰ
ਬਰਮਿੰਘਮ (ਬਲਵਿੰਦਰ ਸਿੰਘ ਚਾਹਲ)
ਇੰਗਲੈਂਡ ਦੀ ਰਾਜਧਾਨੀ ਲੰਡਨ ਵਿੱਚ ਕੋਰੋਨਾ ਵਾਇਰਸ ਨਾਲ ਨਜਿੱਠਣ ਲਈ ਸਿਰਫ਼ 9 ਦਿਨਾਂ ਵਿੱਚ 4000 ਮਰੀਜਾਂ ਵਾਲਾ ਹਸਪਤਾਲ ਬਣ ਕੇ ਤਿਆਰ ਹੋ ਗਿਆ ਹੈ। ਜਿਸ ਨੂੰ ਇੰਗਲੈਂਡ ਦੇ ਰਾਜਕੁਮਾਰ ਚਾਰਲਸ ਨੇ ਇੰਟਰਨੈੱਟ ਜ਼ਰੀਏ ਦੇਸ਼ ਵਾਸੀਆਂ ਲਈ ਜਾਰੀ ਕੀਤਾ। ਇੰਗਲੈਂਡ ਦੇ ਹੀ ਨਹੀਂ ਸ਼ਾਇਦ ਵਿਸ਼ਵ ਦੇ ਸਭ ਤੋਂ ਵੱਡੇ ਇਸ ਹਸਪਤਾਲ ਦੀ ਖਾਸੀਅਤ ਇਹ ਹੈ ਕਿ ਇਸਨੂੰ 9 ਦਿਨਾਂ ਵੱਚ ਤਿਆਰ ਕਰਨ ਲਈ 160 ਕੰਪਨੀਆਂ ਨੇ ਆਪਣਾ ਯੋਗਦਾਨ ਦਿੱਤਾ ਜਿਸ ਵਿੱਚ 200 ਤੋਂ ਵੱਧ ਆਰਮੀ ਇੰਜੀਨੀਅਰਾਂ ਦੀ ਟੀਮ ਨੇ 15 ਘੰਟੇ ਦੀਆਂ ਸ਼ਿਫਟਾਂ ਲਾ ਕੇ ਕੰਮ ਕੀਤਾ। ਇਸ ਵਿੱਚ 500 ਬੈੱਡ ਹਰ ਤਰ੍ਹਾਂ ਦੀ ਐਮਰਜੈਂਸੀ ਲਈ ਉਪਲਭਧ ਹਨ ਅਤੇ ਬਾਕੀ 3500 ਹੋਰ ਮਰੀਜ਼ ਦਾਖਲ ਹੋ ਸਕਦੇ ਹਨ। ਇਸ ਵਿੱਚ 80 ਵਾਰਡ ਹਨ ਜਿਹਨਾਂ ਵਿੱਚ 42 ਬੈੱਡ ਵਾਰਡ ਦੇ ਹਿਸਾਬ ਨਾਲ ਹਨ। ਕੁੱਲ 16000 ਸਟਾਫ਼ ਹੋਵੇਗਾ ਜਿਸ ਵਿੱਚ ਇੱਕ ਵਾਰਡ ਨੂੰ 200 ਜਣਿਆਂ ਦਾ ਸਟਾਫ਼ ਦੇਖੇਗਾ। 750 ਜਣੇ ਐਂਬੂਲੈਂਸ ਸਟਾਫ਼ ਦੇ ਮੈਂਬਰ ਹੋਣਗੇ।
ਇਹ ਵੀ ਜ਼ਿਕਰਯੋਗ ਹੈ ਕਿ ਇੰਗਲੈਂਡ, ਵੇਲਜ਼ ਅਤੇ ਸਕਾਟਲੈਂਡ ਦੇ ਹੋਰ ਵੀ ਕਈ ਸ਼ਹਿਰਾਂ ਜਿਵੇਂ ਬਰਮਿੰਗਮ, ਕਾਰਡਿਫ, ਮਾਨਚੈਸਟਰ, ਗਲਾਸਗੋ, ਬ੍ਰਿਸਟਲ ਆਦਿ ਵਿੱਚ ਅਜਿਹੇ ਹਸਪਤਾਲਾਂ ਦਾ ਨਿਰਮਾਣ ਜਾਰੀ ਹੈ ਜੋ ਇਸ ਮਹੀਨੇ ਦੇ ਅੰਤ ਤੱਕ ਤਿਆਰ ਹੋ ਜਾਣਗੇ।
