ਅਸ਼ੋਕ ਵਰਮਾ
ਬਠਿੰਡਾ,13ਫਰਵਰੀ2021:ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਉਗਰਾਹਾਂ) ਅਤੇ ਪੰਜਾਬ ਖੇਤ ਮਜਦੂਰ ਯੂਨੀਅਨ ਨੇ ਖੇਤੀ ਕਾਨੂੰਨਾਂ ਖਿਲਾਫ ਚੱਲ ਰਹੇ ਸੰਘਰਸ਼ ਨੂੰ ਹੋਰ ਤੇਜ ਕਰਨ ਅਤੇ ਮੋਦੀ ਸਰਕਾਰ ਦੀ ਘੇਰਾਬੰਦੀ ਲਈ 21 ਫਰਵਰੀ ਨੂੰ ਬਰਨਾਲਾ ਦੀ ਦਾਣਾ ਮੰਡੀ ਵਿੱਚ ‘ਮਜਦੂਰ-ਕਿਸਾਨ ਏਕਤਾ ਰੈਲੀ’ ਕਰਨ ਦਾ ਐਲਾਨ ਕੀਤਾ ਹੈ। ਇਸ ਮਹਾਂ ਰੈਲੀ ਦੌਰਾਨ ਦੋਵਾਂ ਜੱਥੇਬੰਦੀਆਂ ਦਾ ਸਾਂਝਾਂ ਇਕੱਠ ਦੋ ਲੱਖ ਤੋਂ ਵੱਧ ਕਰਨ ਦੀ ਰਣਲੀਤੀ ਘੜੀ ਜਾ ਰਹੀ ਹੈ। ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਉਗਰਾਹਾਂ) ਦੇ ਜਨਰਲ ਸਕੱਤਰ ਸੁਖਦੇਵ ਸਿੰਘ ਕੋਕਰੀ ਕਲਾਂ ਅਤੇ ਪੰਜਾਬ ਖੇਤ ਮਜਦੂਰ ਯੂਨੀਅਨ ਦੇ ਜਨਰਲ ਸਕੱਤਰ ਲਛਮਣ ਸਿੰਘ ਸੇਵੇਵਾਲਾ ਨੇ ਪ੍ਰੈਸ ਕਾਨਫਰੰਸ ਕਰਕੇ ਇਸ ਸਬੰਧ ’ਚ ਅੱਜ ਖੁਲਾਸਾ ਕੀਤਾ ਹੈ। ਉਹਨਾਂ ਦੱਸਿਆ ਕਿ ਇਸ ਰੈਲੀ ਨੂੰ ਇਹਨਾਂ ਜਥੇਬੰਦੀਆਂ ਦੇ ਆਗੂਆਂ ਤੋਂ ਇਲਾਵਾ ਸੰਯੁਕਤ ਕਿਸਾਨ ਮੋਰਚੇ ਦੇ ਆਗੂਆਂ ਨੂੰ ਸੰਬੋਧਨ ਕਰਨ ਲਈ ਸੱਦਾ ਪੱਤਰ ਭੇਜਿਆ ਗਿਆ ਹੈ।
ਇਸ ਰੈਲੀ ਦੀ ਵਿਸ਼ੇਸ਼ਤਾ ਇਹ ਰਹੇਗੀ ਕਿ ਇਹ ਜਿੱਥੇ ਸੰਘਰਸ਼ਸ਼ੀਲ ਕਿਸਾਨ ਮਜਦੂਰ ਜਨਤਾ ਦੀ ਇਕਜੁੱਟਤਾ ਨੂੰ ਹੋਰ ਉੱਚਾ ਲਿਜਾਣ ਲਈ ਮੀਲ ਪੱਥਰ ਸਾਬਤ ਹੋਵੇਗੀ ਉਥੇ ਹੀ ਮੁਲਕ ਦੀ ਕਿਸਾਨੀ ਦੇ ਘੋਲ ਵਿੱਚ ਖੇਤ-ਮਜਦੂਰ ਵਰਗ ਦੀ ਜਥੇਬੰਦਕ ਸ਼ਮੂਲੀਅਤ ਨੂੰ ਹਕੀਕੀ ਰੂਪ ਦੇ ਕੇ ਘੇਰੇ ਦਾ ਪਸਾਰਾ ਕਰਨ ਦਾ ਸਾਧਨ ਬਣੇਗੀ। ਇਸ ਰੈਲੀ ਵਿੱਚ ਕਾਲੇ ਕਾਨੂੰਨਾਂ ਦੀ ਵਾਪਸੀ ਸਮੇਤ ਉੱਭਰੀਆਂ ਕਿਸਾਨੀ ਮੰਗਾਂ ਨੂੰ ਉਭਾਰਨ ਤੋਂ ਇਲਾਵਾ ਇਹਨਾਂ ਕਾਨੂੰਨਾਂ ਦੇ ਖੇਤ-ਮਜਦੂਰਾਂ ਅਤੇ ਬੇ-ਜਮੀਨੇ ਕਿਸਾਨਾਂ ’ਤੇ ਪੈਣ ਵਾਲੇ ਅਸਰਾਂ ਨੂੰ ਵਿਸ਼ੇਸ਼ ਤੌਰ ’ਤੇ ਸਾਹਮਣੇ ਲਿਆਂਦਾ ਜਾਵੇਗਾ। ਰੈਲੀ ਵਿੱਚ ਕਿਸਾਨ ਘੋਲ ਨੂੰ ਮਾਤ ਦੇਣ ਲਈ ਕੇਂਦਰ ਸਰਕਾਰ ਵੱਲੋਂ ਵਰਤੇ ਫਾਸ਼ੀ ਹੱਥਕੰਡਿਆਂ ਤੇ ਸਾਜਿਸ਼ੀ ਕਦਮਾਂ ਦਾ ਭਾਂਡਾ ਭੰਨਦਿਆਂ ਬੀਜੇਪੀ. ਹਕੂਮਤ ਦੇ ਫਿਰਕੂ ਪੱਤੇ ਨੂੰ ਬੇਨਕਾਬ ਅਤੇ ਨਕਲੀ ਦੇਸ਼ ਭਗਤੀ ਦੀ ਆੜ ’ਚ ਕੀਤੀ ਜਾ ਰਹੀ ਕਾਰਪੋਰੇਟ ਤੇ ਸਾਮਰਾਜ ਭਗਤੀ ਦਾ ਪਰਦਾਫਾਸ਼ ਕੀਤਾ ਜਾਵੇਗਾ।
ਉਹਨਾਂ ਦੱਸਿਆ ਕਿ ਰੈਲੀ ਵਿੱਚ ਘੋਲ ਦੀਆਂ ਕਿਸਾਨੀ ਮੰਗਾਂ ਅਤੇ ਇਸ ਦੀ ਕਿਸਾਨ ਲੀਡਰਸ਼ਿੱਪ ਉੱਪਰ ਖਾਲਿਸਤਾਨੀ ਚੇਪੀ ਚਿਪਕਾਉਣ ਦੀਆਂ ਕੋਸ਼ਿਸ਼ਾਂ ਨੂੰ ਮਾਤ ਦੇਣ ਲਈ ਸੱਦਾ ਦਿੱਤਾ ਜਾਵੇਗਾ। ਇਸ ਮੌਕੇ ਆਗੂ ਕਿਸਾਨ ਘੋਲ ਦੇ ਪਲੇਟਫਾਰਮ ਨੂੰ ਧਰਮ-ਨਿਰਲੇਪ ਅਤੇ ਪਾਰਟੀ ਰਹਿਤ ਖਾਸਾ ਬਣਾਈ ਰੱਖਣ ਲਈ ਹੋਕਾ ਉੱਚਾ ਕੀਤਾ ਕਰਨਗੇ, ਤਿੰਨੇ ਖੇਤੀ ਕਾਨੂੰਨਾਂ ’ਚ ਸੋਧਾਂ ਦੀ ਚਲਾਕ ਸਰਕਾਰੀ ਪੇਸ਼ਕਾਰੀ ਦਾ ਭਾਂਡਾ ਭੰਨਿਆ ਜਾਵੇਗਾ ਅਤੇ ਕਾਨੂੰਨਾਂ ਦੀ ਮਨਸੂਖੀ ਦੀ ਵਾਜਬੀਅਤ ਉਭਾਰੀ ਜਾਵੇਗੀ।ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਉਗਰਾਹਾਂ) ਦੇ ਸੀਨੀਅਰ ਮੀਤ ਪ੍ਰਧਾਨ ਝੰਡਾ ਸਿੰਘ ਜੇਠੂਕੇ ਅਤੇ ਪੰਜਾਬ ਖੇਤ ਮਜਦੂਰ ਯੂਨੀਅਨ ਦੇ ਸੂਬਾ ਪ੍ਰਧਾਨ ਜੋਰਾ ਸਿੰਘ ਨਸਰਾਲੀ ਨੇ ਦੱਸਿਆ ਕਿ ਉਹਨਾਂ ਦੇ ਦੋਵੇਂ ਸੰਗਠਨ ਮਜਦੂਰ ਕਿਸਾਨ ਏਕਤਾ ਰੈਲੀ ਨੂੰ ਸੰਯੁਕਤ ਕਿਸਾਨ ਮੋਰਚੇ ਦੀ ਮੁਲਕ ਵਿਆਪੀ ਮੁਹਿੰਮ ਦਾ ਪੰਜਾਬ ਅੰਦਰ ਸ਼ਕਤੀ ਪ੍ਰਦਰਸ਼ਨ ਬਣਾ ਦੇਣ ਲਈ ਅੱਡੀ ਚੋਟੀ ਦਾ ਜੋਰ ਲਾ ਰਹੇ ਹਨ।
ਉਹਨਾਂ ਦਾਅਵਾ ਕੀਤਾ ਕਿ ਏਕਤਾ ਰੈਲੀ ਵਿੱਚ ਕੁੱਲ 2 ਲੱਖ ਦੇ ਟੀਚੇ ਵਿੱਚੋਂ ਕਿਸਾਨ ਅਤੇ ਖੇਤ-ਮਜਦੂਰ ਔਰਤਾਂ ਦੀ ਗਿਣਤੀ ਦਾ ਟੀਚਾ 70 ਤੋਂ 80 ਹਜਾਰ ਦਾ ਰੱਖਿਆ ਗਿਆ ਹੈ ਜਦੋਂ ਕਿ ਕਿਸਾਨ ਤੇ ਖੇਤ-ਮਜਦੂਰ ਮਰਦਾਂ ਦੀ ਸ਼ਮੂਲੀਅਤ 1 ਲੱਖ 25 ਹਜਾਰ ਦੇ ਟੀਚੇ ਤੱਕ ਲਿਜਾਣ ਦੀ ਰੱਖੀ ਗਈ ਹੈ। ਉਹਨਾਂ ਪੰਜਾਬ ਦੇ ਸਮੂਹ ਸੰਘਰਸ਼ਸ਼ੀਲ ਤੇ ਜਾਗਰਤ ਵਰਗਾਂ ਨੂੰ ਅਤੇ ਪੰਜਾਬ ਦੀਆਂ ਜਾਗਦੀਆਂ ਜਮੀਰਾਂ ਨੂੰ ਸੰਕਟ ਮੂੰਹ ਆਈ ਕਿਸਾਨੀ ਦੀ ਸੱਜੀ ਬਾਂਹ ਬਣਕੇ ਅੱਗੇ ਆਉਣ , ਕੇਂਦਰੀ ਹਾਕਮਾਂ ਦੇ ਫਿਰਕੂ ਅਤੇ ਫਾਸ਼ੀ ਵਾਰਾਂ ਦਾ ਮੂੰਹ ਤੋੜ ਜੁਆਬ ਦੇਣ ਲਈ ਇਸ ਦਿਨ ਨੂੰ ਸਮੂਹ ਵਰਗਾਂ ਦੀ ਏਕਤਾ ਦਾ ਤਿਉਹਾਰ ਬਣਾ ਦੇਣ ਅਤੇ ਰੈਲੀ ’ਚ ਸ਼ਮੂਲੀਅਤ ਦੇ ਦੋ ਲੱਖ ਦੇ ਟੀਚੇ ਨੂੰ ਉੱਚਾ ਲਿਜਾਣ ਵਿੱਚ ਆਪੋ-ਆਪਣਾ ਯੋਗਦਾਨ ਪਾਉਣ ਦਾ ਸੱਦਾ ਵੀ ਦਿੱਤਾ ਹੈ।
ਰੈਲੀ ਲਈ ਪ੍ਰਚਾਰ ਅਤੇ ਸਿੱਖਿਆ ਮੁਹਿੰਮ
ਸੁਖਦੇਵ ਸਿੰਘ ਕੋਕਰੀ ਕਲਾਂ ਅਤੇ ਝੰਡਾ ਸਿੰਘ ਜੇਠੂਕੇ ਨੇ ਦੱਸਿਆ ਹੈ ਕਿ ਜਥੇਬੰਦੀ ਦੀਆਂ 1500 ਦੇ ਕਰੀਬ ਪਿੰਡ ਇਕਾਈਆਂ ਵਿੱਚ ਘਰ-ਘਰ ਤੱਕ ਪਹੁੰਚ ਕਰਨ ਅਤੇ ਸਿੱਖਿਆ ਮੁਹਿੰਮ ਲਿਜਾਣ ਦਾ ਨਿਸ਼ਾਨਾ ਮਿਥਿਆ ਗਿਆ ਹੈ। ਇਸ ਮਕਸਦ ਲਈ 5 ਲੱਖ ਗਿਣਤੀ ਵਿੱਚ ਦੋ ਵਰਕੀ, 50 ਹਜਾਰ ਦੀ ਗਿਣਤੀ ਵਿੱਚ 25 ਸਫਿਆਂ ਦਾ ਪੈਂਫਲਟ, ਵੱਡੀ ਗਿਣਤੀ ਵਿੱਚ ਹੱਥ ਪੋਸਟਰ ਅਤੇ ਮੰਗਾਂ ਦਾ ਚਾਰਟਰ ਛਾਪੇ ਗਏ ਹਨ। ਉਹਨਾਂ ਦੱਸਿਆ ਕਿ ਇਸ ਮੁਹਿੰਮ ਦੀ ਚੇਤਨਾ ਦੇ ਸੰਚਾਰ ਲਈ 16 ਜਿਲਿਆਂ ਦੀਆਂ ਵਧਵੀਆਂ ਮੀਟਿੰਗਾਂ ਕਰਵਾ ਕੇ 5000 ਦੇ ਕਰੀਬ ਕਾਰਕੁੰਨਾਂ ਨੂੰ ਸਿੱਖਿਅਤ ਕੀਤਾ ਜਾ ਰਿਹਾ ਹੈ।
ਘਰਾਂ ਨੂੰ ਜਿੰਦਰੇ ਮਾਰਕੇ ਆਉਣ ਦਾ ਸੱਦਾ
ਕਿਸਾਨ ਅਤੇ ਖੇਤ-ਮਜਦੂਰ ਆਗੂਆਂ ਝੰਡਾ ਸਿੰਘ ਜੇਠੂਕੇ ਅਤੇ ਲਛਮਣ ਸਿੰਘ ਸੇਵੇਵਾਲਾ ਵੱਲੋਂ ਸੱਦਾ ਦਿੱਤਾ ਹੈ ਕਿ ਜਿਹਨਾਂ ਪਿੰਡਾਂ ’ਚ ਖੇਤ-ਮਜਦੂਰ ਇਕਾਈਆਂ ਮੌਜੂਦ ਨਹੀਂ ਹਨ ਉਹਨਾਂ ਪਿੰਡਾਂ ਦੀਆਂ ਕਿਸਾਨ ਇਕਾਈਆਂ ਖੇਤ-ਮਜਦੂਰ ਭਰਾਵਾਂ ਨੂੰ ਚੇਤਨਾ ਮੁਹਿੰਮ ਦੇ ਕਲਾਵੇ ਵਿੱਚ ਲੈ ਕੇ ਉਹਨਾਂ ਦੀ ਸ਼ਮੂਲੀਅਤ ਨੂੰ ਯਕੀਨੀ ਕਰਨ। ਉਹਨਾਂ ਦੱਸਿਆ ਕਿ ਹਰ ਘਰ ’ਚੋਂ ਵੱਧੋ ਵੱਧ ਜੀਅ ਅਤੇ ਵੱਧ ਤੋਂ ਵੱਧ ਘਰਾਂ ਨੂੰ ਜੰਦਰੇ ਮਾਰ ਕੇ ਸ਼ਮੂਲੀਅਤ ਕਰਨ ਦੀ ਅਪੀਲ ਵੀ ਕੀਤੀ ਗਈ ਹੈ। ਆਗੂਆਂ ਨੇ ਕਿਹਾ ਕਿ ਜਿਸ ਤਰਾਂ ਦਾ ਵਤੀਰਾ ਮੋਦੀ ਸਰਕਾਰ ਅਪਣਾ ਰਹੀ ਹੈ ਉਸ ਦੀ ਅੜੀ ਭੰਨਣ ਲਈ ਇੱਕਜੁਟਤਾ ਹੀ ਵੱਡਾ ਹਥਿਆਰ ਅਤੇ ਅਣਸਰਦੀ ਲੋੜ ਬਣ ਗਿਆ ਹੈ।
