ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ)
ਕੋਰੋਨਾਂ ਵਾਇਰਸ ਨੂੰ ਅੱਗੇ ਫੈਲਣ ਤੋਂ ਰੋਕਣ ਅਤੇ ਯੋਜਨਾਵਾਂ ਬਨਾਉਣ ਲਈ ਇਸਦੇ ਅੰਕੜੇ ਬਹੁਤ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੇ ਹਨ।ਇਸੇ ਸੰਬੰਧ ਵਿੱਚ ਕੋਰੋਨਾਂ ਸੰਬੰਧੀ ਵੇਲਜ਼ ਦੇ ਸਰਕਾਰੀ ਅੰਕੜਿਆਂ ਵਿੱਚੋਂ ਤਕਰੀਬਨ 11,000 ਵਾਧੂ ਸਕਾਰਾਤਮਕ ਕੋਵਿਡ ਟੈਸਟ ਗੁੰਮ ਹੋ ਗਏ ਹਨ, ਜਿਸਦੇ ਕਾਰਨ ਇਸ ਖਿੱਤੇ ਦੇ ਕੋਰੋਨਾਂ ਕੇਸ ਪਿਛਲੇ ਹਫ਼ਤੇ ਨਾਲੋਂ ਦੁੱਗਣੇ ਹੋ ਸਕਦੇ ਹਨ। ਵੇਲਜ਼ ਦੇ ਪਬਲਿਕ ਹੈਲਥ ਵਿਭਾਗ (ਪੀ ਐਚ ਡਬਲਯੂ) ਅਨੁਸਾਰ ਇਹ ਸਮੱਸਿਆ ਆਈ ਟੀ ਪ੍ਰਣਾਲੀਆਂ ਦੀ ਯੋਜਨਾਬੱਧ ਰੱਖ ਰਖਾਅ ਕਾਰਨ ਹੋਈ ਹੈ ਜੋ ਕਿ ਲੈਬਜ਼ ਵਿੱਚ ਹੁੰਦੇ ਟੈਸਟਾਂ ਨਾਲ ਸਬੰਧਤ ਹੈ।ਇਹ 11,000 ਵਾਧੂ ਸਕਾਰਾਤਮਕ ਟੈਸਟ 9 ਤੋਂ 15 ਦਸੰਬਰ ਦੇ ਵਿਚਕਾਰ ਲਏ ਗਏ ਸਨ ਅਤੇ ਇਸ ਵੇਲੇ, ਉਸ ਹਫ਼ਤੇ ਦੇ ਰਿਕਾਰਡ ਕੀਤੇ ਅੰਕੜੇ 11,911 ਹਨ । ਇਸ ਲਈ ਗੁੰਮ ਹੋਏ ਵਾਧੂ 11,000 ਕੇਸਾਂ ਦੀ ਡਿਟੇਲ ਨਾਂ ਹੋਣ ਦਾ ਅਰਥ ਇਹ ਕਿ ਵਾਇਰਸ ਦੇ ਤਾਜ਼ਾ ਕੇਸ ਦਰਜ ਹੋਏ ਮਾਮਲਿਆਂ ਨਾਲੋਂ ਦੁੱਗਣੇ ਹਨ। ਇਸ ਤੋਂ ਇਲਾਵਾ ਵੇਲਜ਼ ਵਿੱਚ ਮਹਾਂਮਾਰੀ ਦੀ ਸ਼ੁਰੂਆਤ ਤੋਂ ਲੈ ਕੇ 103,098 ਲੋਕਾਂ ਦੇ ਪੌਜੇਟਿਵ ਟੈਸਟ ਹੋਏ ਹਨ ਜਿਹਨਾਂ ਵਿੱਚ ਵੀਰਵਾਰ ਨੂੰ ਸਾਹਮਣੇ ਆਉਣ ਵਾਲੇ ਅੰਕੜਿਆਂ ਵਿੱਚ ਵੀ ਇਹ 11000 ਕੇਸ 10% ਤੋਂ ਵੱਧ ਦਾ ਵਾਧਾ ਕਰਨਗੇ। ਵੇਲਜ਼ ਵਿੱਚ ਬੁੱਧਵਾਰ ਨੂੰ ਕੋਰੋਨਾਂ ਵਾਇਰਸ ਨਾਲ 30 ਹੋਰ ਲੋਕਾਂ ਦੀ ਮੌਤ ਦੇ ਨਾਲ 530 ਹੋਰ ਨਵੇਂ ਕੇਸਾਂ ਦੀ ਪੁਸ਼ਟੀ ਕੀਤੀ ਗਈ ਹੈ।
