-ਘਰ ਦੀ 25 ਮੀਟਰ ਲੰਬੀ ਬਗੀਚੀ ਦੇ 100 ਗੇੜੇ ਲਾਏ
ਗਲਾਸਗੋ/ਲੰਡਨ (ਮਨਦੀਪ ਖੁਰਮੀ ਹਿੰਮਤਪੁਰਾ)
ਸਮਾਜ ਦਾ ਬੁਰਾ ਲੋਚਣ ਵਾਲਿਆਂ ਦੀ ਵੀ ਥੋੜ ਨਹੀਂ ਹੈ, ਪਰ ਸਮਾਜ ਦੀ ਬਿਹਤਰੀ ਲਈ ਯਤਨਸ਼ੀਲ ਲੋਕਾਂ ਦਾ ਵੀ ਕਾਲ ਨਹੀਂ ਪਿਆ। ਕਈ ਵਾਰ ਅਜਿਹੇ ਕਾਰਜ ਬਜ਼ੁਰਗ ਵੀ ਕਰ ਜਾਂਦੇ ਹਨ, ਜਿਹੜੇ ਨੌਜਵਾਨ ਵੀ ਨਹੀਂ ਕਰ ਸਕਦੇ। ਬੈਡਫੋਰਡਸ਼ਾਇਰ ਦੇ ਪਿੰਡ ਮਾਰਸਟਨ ਵਸਦੇ ਟੌਮ ਮੂਰ ਨੇ 30 ਅਪ੍ਰੈਲ ਨੂੰ ਆਪਣਾ 100 ਵਾਂ ਜਨਮਦਿਨ ਮਨਾਉਣਾ ਸੀ। ਜਨਮਦਿਨ ਨੂੰ ਯਾਦਗਾਰ ਬਣਾਉਣ ਲਈ ਉਸਨੇ ਆਪਣੇ ਘਰ ਦੇ ਪਿਛਵਾੜੇ ਬਗੀਚੀ ਦੀ 25 ਮੀਟਰ ਲੰਬਾਈ ਨੂੰ 100 ਵਾਰ ਤੁਰ ਕੇ ਸਰ ਕਰਨ ਦਾ ਟੀਚਾ ਮਿਥਿਆ। ਉਸਨੇ ਇੰਟਰਨੈੱਟ ਰਾਹੀਂ ਚੈਰਿਟੀ ਇਕੱਤਰ ਕਰਨ ਲਈ 1000 ਪੌਂਡ ਦਾ ਟੀਚਾ ਮਿਥਿਆ। ਹੈਰਾਨੀ ਦੀ ਹੱਦ ਨਾ ਰਹੀ ਜਦੋਂ ਉਸ ਕੋਲ ਪੌਂਡਾਂ ਦੇ ਅੰਬਾਰ ਲੱਗ ਗਏ। ਪਹਿਲੇ ਦਿਨ ਉਸਨੂੰ ਜ਼ਬਰਦਸਤ ਹੁੰਗਾਰਾ ਮਿਲਣ ਤੋਂ ਬਾਦ ਬੁੱਧਵਾਰ ਰਾਤ ਤੱਕ 9 ਮਿਲੀਅਨ ਪੌਂਡ ਦੀ ਚੈਰਿਟੀ ਰਾਸ਼ੀ ਉਹ ਇਕੱਠੀ ਕਰ ਚੁੱਕਾ ਸੀ। ਐੱਨ ਐੱਚ ਐੱਸ ਲਈ ਰਾਸੀ ਇਕੱਠੀ ਕਰਨ ਦੀ ਵਜ੍ਹਾ ਇਹ ਸੀ ਕਿ ਉਹ ਕਈ ਵਰ੍ਹੇ ਪਹਿਲਾਂ ਖੁਦ ਚਮਲੀ ਦੇ ਕੈਂਸਰ ਤੋਂ ਪੀੜਤ ਹੋ ਗਿਆ ਸੀ ਪਰ ਆਪਣੇ ਜਿਉਂਦੇ ਹੋਣ ਪਿੱਛੇ ਉਹ ਸਿਹਤ ਕਾਮਿਆਂ ਦਾ ਵੱਡਾ ਹੱਤ ਮੰਨਦਾ ਹੈ। ਟੌਮ ਮੂਰ ਸਾਬਕਾ ਸਿਵਲ ਇੰਜੀਨੀਅਰ ਹੈ। ਦੂਜੀ ਵਿਸ਼ਵ ਜੰਗ ਮੌਕੇ ਉਹ 145 ਰੇਜੀਮੈਂਟ ਰਾਇਲ ਆਰਮਡ ਕਾਰਪਸ ਵਿੱਚ ਭਰਤੀ ਹੋਇਆ ਸੀ। ਉਹ ਭਾਰਤ ਅਤੇ ਬਰ੍ਹਮਾ ਵਿੱਚ ਵੀ ਸੇਵਾਵਾਂ ਨਿਭਾ ਚੁੱਕਾ ਹੈ।
ਖ਼ਬਰ ਲਿਖੇ ਜਾਣ ਤੱਕ ਉਹ 9 ਮਿਲੀਅਨ ਤੋਂ ਵੀ ਪਾਰ ਲੰਘ ਚੁੱਕਾ ਸੀ।
