ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ )
ਸਰਕਾਰ ਦੁਆਰਾ ਵਾਇਰਸ ਦੇ ਫੈਲਾਅ ਨੂੰ ਰੋਕਣ ਲਈ ਕੀਤੇ ਯਤਨਾਂ ਦੇ ਬਾਵਜੂਦ ਵੀ ਇਸਦੇ ਲਾਗ ਦੀ ਗਿਣਤੀ ਵੱਧਦੀ ਜਾ ਰਹੀ ਹੈ।ਯੂਕੇ ਵਿੱਚ ਇਸ ਸਾਲ ਮਾਰਚ ਤੋਂ ਮਹਾਂਮਾਰੀ ਦੀ ਸ਼ੁਰੂਆਤ ਹੋਣ ਦੇ ਬਾਅਦ ਕੱਲ ਤੱਕ ਦੇ ਅੰਕੜਿਆਂ ਵਿੱਚ ਕੁੱਲ ਮੌਤਾਂ ਦੀ ਸੰਖਿਆ 44,745 ਅਤੇ ਲਾਗ ਦੇ ਮਾਮਲੇ 854,010 ਦਰਜ਼ ਹੋਏ ਹਨ। ਇੱਥੇ ਸ਼ੁੱਕਰਵਾਰ ਨੂੰ 20,530 ਨਵੇਂ ਮਾਮਲੇ ਅਤੇ 224 ਮੌਤਾਂ ਦਰਜ ਕੀਤੀਆਂ ਗਈਆਂ ਹਨ ਜਦੋਂ ਕਿ ਪਿਛਲੇ ਸ਼ਨੀਵਾਰ ਨੂੰ 16,171 ਮਾਮਲੇ ਅਤੇ 163 ਮੌਤਾਂ ਹੋਈਆਂ ਸਨ। ਉੱਤਰੀ ਆਇਰਲੈਂਡ ਵਿਚ ਵੀ ਛੇ ਹੋਰ ਮੌਤਾਂ ਹੋਈਆਂ ਅਤੇ 923 ਵਾਇਰਸ ਦੇ ਨਵੇਂ ਮਾਮਲੇ ਸਾਹਮਣੇ ਆਏ ਹਨ। ਪਿਛਲੇ ਘੰਟਿਆਂ ਵਿੱਚ ਸਕਾਟਲੈਂਡ ਵਿੱਚ ਵੀ ਕੋਰੋਨਾਂ ਵਾਇਰਸ ਕਾਰਨ 11 ਮੌਤਾਂ ਅਤੇ 1,433 ਮਾਮਲੇ ਦਰਜ ਕੀਤੇ ਗਏ ਹਨ। ਜਦਕਿ ਵੇਲਜ਼ ਵਿਚ ਸ਼ੁੱਕਰਵਾਰ ਸ਼ਾਮ 6 ਵਜੇ ਤੋਂ ਤਾਲਾਬੰਦੀ ਦੀ ਸ਼ੁਰੂਆਤ ਹੋਣ ਤੇ ਵੀ 1,324 ਹੋਰ ਲੋਕਾਂ ਨੇ ਵਾਇਰਸ ਦੀ ਸਕਾਰਾਤਮਕ ਜਾਂਚ ਕੀਤੀ ਅਤੇ 16 ਲੋਕਾਂ ਨੇ ਜਾਨ ਗਵਾਈ ਹੈ। ਵਾਇਰਸ ਨੂੰ ਰੋਕਣ ਲਈ ਸਰਕਾਰ ਵੱਲੋਂ ਲੋਕਾਂ ਨੂੰ ਸਾਵਧਾਨੀਆਂ ਵਰਤਣ ਦੀ ਵੀ ਸਲਾਹ ਦਿੱਤੀ ਜਾ ਰਹੀ ਹੈ।
