ਦੁੱਖਭੰਜਨ ਰੰਧਾਵਾ
0351920036369
ਯਾਰ ਮੈਂਡਾ ਮੈਨੂੰ ਰੱਬ ਦੇ ਵਰਗਾ,
ਆਇਆ ਬੜਾ ਪਸੰਦ |
ਪੱਕੀ ਰਹੇ ਇਹ ਜਨਮ-ਜਨਮ ਥੀਂ,
ਟੁੱਟੇ ਨਾ ਕਦੇ ਤੰਦ |
ਯਾਰ ਮੈਂਡਾ ਮੈਨੂੰ ਰੱਬ ਦੇ ਵਰਗਾ,
ਆਇਆ ਬੜਾ ਪਸੰਦ |
ਉਸਦਾ ਨਾਂ ਲੈ ਨੀਂਦਰ ਆਵੇ,
ਉਸਦਾ ਨਾਂ ਲੈ ਕੇ ਜਾਗਾਂ |
ਫੁਰਨਾ ਮੈਨੂੰ ਫੁਰਕੇ ਰਹਿੰਦਾ,
ਮੈਨੂੰ ਡੰਗਿਆ ਇਲਮ ਦੇ ਨਾਗਾਂ |
ਸੱਪ ਖੜੱਪੇ ਆਪਣੇਂ ਆਪ ਹੀ,
ਟੱਪ ਜਾਵਣ ਦਿਲ ਦੀ ਕੰਧ |
ਯਾਰ ਮੈਂਡਾ ਮੈਨੂੰ ਰੱਬ ਦੇ ਵਰਗਾ,
ਆਇਆ ਬੜਾ ਪਸੰਦ |
ਸੁਰਗਾਂ ਤੋਂ ਮੈਂ ਉਸਦੇ ਬੈਠਣ ਨੂੰ,
ਪੀਹੜਾ ਇੱਕ ਮੰਗਵਾਇਆ ਏ |
ਮੱਖਣੀਂ ਵੱਟਣਾ ਮਲਿਆ ਉਸ ਤੇ,
ਘੁੰਗਰੂ ਵੀ ਲਗਵਾਇਆ ਏ |
ਆਪਣੇ ਵੱਲੋਂ ਮੇਰੀ ਫੁੱਲ ਤਿਆਰੀ,
ਉਸਨੂੰ ਬੈਠ ਸੁਣਾਉਣੇਂ ਛੰਦ |
ਯਾਰ ਮੈਂਡਾ ਮੈਨੂੰ ਰੱਬ ਦੇ ਵਰਗਾ,
ਆਇਆ ਬੜਾ ਪਸੰਦ |
ਉਸਦੇ ਪਾਉਣ ਨੂੰ ਚੰਮ ਦਾ,
ਖੁੱਸਾ ਬਣਵਾਵਣ ਨੂੰ ਘੱਲਿਆ |
ਤਾਰੇ ਤੋੜ ਲਿਆਵਾਂ ਕਦਮਾਂ ਲਈ,
ਬਸ ਹੁਣੇਂ ਅੰਬਰ ਨੂੰ ਚੱਲਿਆ |
ਹੁਣ ਛੇਤੀ-ਛੇਤੀ ਕਰਾਂ ਨਬੇੜਾ,
ਜਿੰਦੇ ਰਸਤਾ ਨਾ ਹੋ ਜਾਵੇ ਬੰਦ |
ਯਾਰ ਮੈਂਡਾ ਮੈਨੂੰ ਰੱਬ ਦੇ ਵਰਗਾ,
ਆਇਆ ਬੜਾ ਪਸੰਦ |
ਲਿਐ ਉਸਦੇ ਸਾਉਣ ਨੂੰ ਪਲੰਘ,
ਨਵਾਰੀ ਤੇ ਮਖਮਲ ਦੀ ਚਾਦਰ |
ਜਦ ਉਹ ਆਇਆ ਘਰ ਮੇਰੇ ਵਿੱਚ,
ਮੈਨੂੰ ਲੱਗਣਾ ਆਇਆ ਏ ਕਾਦਰ |
ਮੇਰੇ ਅੰਦਰ ਠੰਡ ਪੈ ਜਾਣੀ,
ਤੇ ਜੁੜੇ ਰਹਿ ਜਾਣੇਂ ਦੰਦ |
ਯਾਰ ਮੈਂਡਾ ਮੈਨੂੰ ਰੱਬ ਦੇ ਵਰਗਾ,
ਆਇਆ ਬੜਾ ਪਸੰਦ |
ਦੁੱਖਭੰਜਨ ਨੇ ਚੰਨ ਦਾ ਕਮਰਾ ਉਸ,
ਲਈ ਚੁਣਿਆ ਤੇ ਮੁੰਦੀ ਲਈ ਹੀਰਾ |
ਉਸ ਮੰਗੀ ਜਾਨ ਤਾਂ ਝੱਟ ਦੇ,
ਦੇਣੀ ਅਖਵਾਉਣਾ ਨਹੀਂ ਬੇ-ਪੀਰਾ |
ਸਭ ਉਸਦਾ ਉਸਨੂੰ ਦੇ ਦੇਣਾ,
ਮੈਂ ਕਰਨੀ ਨਹੀਂ ਕਾਣੀਂ ਵੰਡ |
ਯਾਰ ਮੈਂਡਾ ਮੈਨੂੰ ਰੱਬ ਦੇ ਵਰਗਾ,
ਆਇਆ ਬੜਾ ਪਸੰਦ |
