ਜਦੋਂ ਧੀ ਲਪਟਾਂ ਵਿੱਚ ਸੜੀ

ਰਜਨੀ ਵਾਲੀਆ
ਰੱਬਾ ਕੀ-ਕੀ ਦੁਖੜਾ ਜਰੀ ਹੋਵਗੀ,
ਜਦੋਂ ਧੀ ਲਪਟਾਂ ਵਿੱਚ ਸੜੀ ਹੋਵੇਗੀ |
ਰੱਬਾ ਕੀ-ਕੀ ਦੁਖੜਾ ਜਰੀ ਹੋਵਗੀ,

ਪਾਲੀ ਸੀ ਧੀ ਲਾਡਾਂ ਦੇ ਨਾਲ,
ਉਹ ਹੋਈ ਜਦੋਂ ਪਰਾਈ ਸੀ |
ਸਹਿ ਲਵੀਂ ਜੋ ਵੀ ਸਹਿਆ ਜਾਂਦਾ,
ਉਸਨੂੰ ਇਹ ਗੱਲ ਸਮਝਾਈ ਸੀ |
ਸਹਿ ਗਈ ਜਿਉਂਦੀ ਸੜਨ ਦਾ,
ਦੁਖੜਾ ਹਿੰਮਤ ਉਸਦੀ ਬੜੀ ਹੋਵੇਗੀ |
ਰੱਬਾ ਕੀ-ਕੀ ਦੁਖੜਾ ਜਰੀ ਹੋਵਗੀ,
ਜਦੋਂ ਧੀ ਲਪਟਾਂ ਵਿੱਚ ਸੜੀ ਹੋਵੇਗੀ |

ਨੀ ਤੂੰ ਕਾਸੇ ਜੋਗੀ ਵੀ ਨਹੀਂ,
ਦਾਜ ਦੇ ਵਿੱਚ ਤੂੰ ਕਾਰ ਨਾ ਲਿਆਈ |
ਸੱਸ ਆਪਣੀ ਦੇ ਗਲ ਪਾਵਣ ਨੂੰ,
ਨੌਂ ਲੱਖਾ ਤੂੰ ਹਾਰ ਨਾ ਲਿਆਈ |
ਹਰ ਦਿਨ ਮਿਹਣੇਂ ਹਰ ਦਿਨ ਤਾਹਨੇਂ,
ਰੂਹ ਦਬਕਿਆਂ ਦੇ ਵਿੱਚ ਮੜੀ ਹੋਵੇਗੀ |
ਰੱਬਾ ਕੀ-ਕੀ ਦੁਖੜਾ ਜਰੀ ਹੋਵਗੀ,
ਜਦੋਂ ਧੀ ਲਪਟਾਂ ਵਿੱਚ ਸੜੀ ਹੋਵੇਗੀ |

ਸੱਸ ਚੁੱਲਾ ਬਾਲ ਕੇ ਰਾਤੀ ਛੱਡ ਗਈ,
ਉਸ ਬੂਹਾ ਮੁੜ ਬੰਦ ਕਰਿਆ ਹੋਣੈ |
ਚਾਹ ਬਣਾਉਣ ਲੱਗੀ ਨੇ ਤੀਲੀ ਬਾਲ ਕੇ,
ਫਿਰ ਰੱਬ ਜਾਣੇਂ ਕੀ-ਕੀ ਜਰਿਆ ਹੋਣੈਂ |
ਉਸਨੇ ਬਚਣ ਲਈ ਹਾੜੇ ਕੀਤੇ ਹੋਣੇਂ,
ਤੇ ਕਿੰਨੀ ਅੱਗ ਵਿੱਚ ਕੜੀ ਹੋਵੇਗੀ |
ਰੱਬਾ ਕੀ-ਕੀ ਦੁਖੜਾ ਜਰੀ ਹੋਵਗੀ,
ਜਦੋਂ ਧੀ ਲਪਟਾਂ ਵਿੱਚ ਸੜੀ ਹੋਵੇਗੀ |

ਕਿਸੇ ਨਾ ਸੁਣਿਆਂ ਚੀਕ ਚਿਹਾੜਾ,
ਬਲਦੀ ਸਭ ਨੇ ਤੱਕੀ ਹੋਣੀ ਏ |
ਲਟ-ਲਟ ਬਲਦੀ ਧੀ ਬੇਗਾਨੀ,
ਚੰਦਰਿਆਂ ਨੇਂ ਸੇਕੀ ਹੋਣੀ ਏ |
ਬਣੀ ਸਵਾਹ ਦੀ ਢੇਰੀ ਹੋਣੀ,
ਜਦੋਂ ਕੱਢ ਰਸੋਇਓਂ ਖੜੀ ਹੋਵੇਗੀ |
ਰੱਬਾ ਕੀ-ਕੀ ਦੁਖੜਾ ਜਰੀ ਹੋਵਗੀ,
ਜਦੋਂ ਧੀ ਲਪਟਾਂ ਵਿੱਚ ਸੜੀ ਹੋਵੇਗੀ |

ਰਜਨੀ ਲੱਖ ਅਰਜੋਈਆਂ ਕਰਦੀ ,
ਕਦੇ ਧੀ ਨੂੰ ਦੁੱਖ ਨਾ ਹੋਵੇ ਕੋਈ |
ਲੇਖਾਂ ਵਿੱਚ ਦੁੱਖ ਜੇ ਆ ਜਾਵਣ ਧੀ ਦੇ,
ਕਦੇ ਲਾਗੇ ਨਾ ਫੇਰ ਖਲੋਵੇ ਕੋਈ |
ਬਚਣ ਲਈ ਹੀਲਿਓ ਹੀਲੀ ਹੁੰਦੀ,
ਵਿਚਾਰੀ ਨੇ ਹੱਥੀਂ ਫੜ ਲਈ ਛੜੀ ਹੋਵੇਗੀ |
ਰੱਬਾ ਕੀ-ਕੀ ਦੁਖੜਾ ਜਰੀ ਹੋਵਗੀ,
ਜਦੋਂ ਧੀ ਲਪਟਾਂ ਵਿੱਚ ਸੜੀ ਹੋਵੇਗੀ |