ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ)
ਕੋਰੋਨਾਵਾਇਰਸ ਨੇ ਰੈਕਸਮ ਦੀ ਰੋਵਾਨ ਫੈਕਟਰੀ ‘ਤੇ ਹੱਲਾ ਬੋਲਦਿਆਂ 166 ਕਰਮਚਾਰੀਆਂ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ ਹੈ। ਜ਼ਿਕਰਯੋਗ ਹੈ ਕਿ ਰੋਵਾਨ ਵੱਲੋਂ ਟੇਸਕੋ, ਸੈਨਸਬਰੀ ਅਤੇ ਆਸਡਾ ਵਿੱਚ ਵੀ ਸਮਾਨ ਦੀ ਸਪਲਾਈ ਕੀਤੀ ਜਾਂਦੀ ਹੈ। ਰੈਕਸਮ ਵਿੱਚ ਰੋਵਾਨ ਫੂਡਜ਼ ਦੇ ਵਰਕਰ ਅਪ੍ਰੈਲ ਵਿਚ ਵਾਇਰਸ ਤੋਂ ਬਚਾਅ ਲਈ ਜ਼ਰੂਰੀ ਸਮਾਨ ਦੀ ਕਥਿਤ ਕਮੀ ਦੇ ਵਿਰੋਧ ਵਿੱਚ ਬਾਹਰ ਚਲੇ ਗਏ ਸਨ। ਪਬਲਿਕ ਹੈਲਥ ਪ੍ਰਮੁੱਖ ਉੱਤਰੀ ਵੇਲਜ਼ ਦੇ ਇੱਕ ਪ੍ਰਮੁੱਖ ਫੂਡ ਪ੍ਰੋਸੈਸਿੰਗ ਫੈਕਟਰੀ ਦੇ ਉਹਨਾਂ ਸੈਂਕੜੇ ਕਾਮਿਆਂ ਨੂੰ ਲੱਭਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਉਨ੍ਹਾਂ ਨੂੰ ਲਗਭਗ 300 ਲੋਕਾਂ ਨੂੰ ਲੱਭਣ ਦੀ ਜ਼ਰੂਰਤ ਹੈ ਜੋ ਰੇਕਸਮ ਵਿੱਚ ਰੋਵਾਨ ਫੂਡਜ਼ ਵਿਚ ਕੰਮ ਕਰਦੇ ਸਨ। ਇਸ ਫੈਕਟਰੀ ਵਿੱਚ ਹੁਣ ਤੱਕ ਕੋਰੋਨਾਵਾਇਰਸ ਦੇ 166 ਮਾਮਲਿਆਂ ਦੀ ਪੁਸ਼ਟੀ ਹੋਣ ਤੋਂ ਬਾਅਦ ਸਿਹਤ ਵਿਭਾਗ ਦੀ ਚਿੰਤਾ ਹੋਰ ਵਧ ਗਈ ਹੈ। ਸਾਈਟ ‘ਤੇ ਇੱਥੇ 1000 ਤੋਂ ਵੱਧ ਲੋਕ ਕੰਮ ਕਰ ਰਹੇ ਹਨ ਤੇ ਇਹ ਫੈਕਟਰੀ ਯੂਕੇ ਭਰ ਦੇ ਸੁਪਰਮਾਰਕੀਟਾਂ ਲਈ ਭੋਜਨ ਬਣਾਉਂਦੀ ਹੈ ਜਿਸ ਵਿੱਚ ਟੈਸਕੋ, ਸੇਨਸਬਰੀ ਅਤੇ ਆਸਡਾ ਸ਼ਾਮਲ ਹਨ। ਇਸੇ ਫੈਕਟਰੀ ਦੇ ਕਾਮਿਆਂ ਨੇ ਕੋਰੋਨਾ ਤੋਂ ਬਚਾਅ ਲਈ ਲੋੜੀਂਦੀਆਂ ਸਹੂਲਤਾਂ ਨਾ ਹੋਣ ਦੇ ਰੋਸ ਵਜੋਂ ਪ੍ਰਦਰਸ਼ਨ ਵੀ ਕੀਤਾ ਸੀ।
