ਐਡਵੋਕੇਟ ਸ਼ੁਕਰਗੁਜ਼ਾਰ ਸਿੰਘ
ਮੈਂ ਸੁਣਿਆ ਸੀ…
‘ਬੁੱਤ’
ਵਫ਼ਾਦਾਰ ਹੁੰਦੇ ਨੇ,
“ਹਾਂ”
ਪਰ ਕਦੀ ਪਰਖਿਓ…
ਵਫ਼ਾਦਾਰੀ ਦੇ ਨਾਲ ਨਾਲ
ਤਹਿਜ਼ੀਬਦਾਰ ਵੀ ਨੇ
ਅਪਣੱਤ ਨਾਲ਼ ਵੀ ਭਰੇ ਨੇ
ਤੇ
ਸਮਝਦਾਰ ਵੀ ਨੇ।
ਸੱਭ ਨੂੰ ਕੋਲ ਬਠਾ ਲੈਂਦੇ
ਮੁਸਕੁਰਾਉਂਦੇ,
ਖ਼ੁਸ਼ੀਆਂ ਵੰਡਦੇ,
ਕਿਸੇ ਨੂੰ ਉੱਚਾ ਨੀਵਾਂ ਨਹੀਂ ਵਖਾਉਂਦੇ,
ਸਗੋਂ..
ਹਰ ਉਮਰ ਨੂੰ ਆਪਣਾ ਬਣਾਉਂਦੇ।
ਇੱਕ ਬਾਤ ਹੋਰ…
ਇਕ ਦੂਜੇ ਦੀ ਗੱਲ਼ ਨੂੰ ਸੁਣਕੇ
ਨਾ ਰੋਂਦੇ,
ਨਾ ਹੱਸਦੇ,
ਨਾ ਕਿਸੇ ਨੂੰ ਦੱਸਦੇ
ਨਿੰਦਾ ਚੁਗਲੀ ਤੋਂ ਖ਼ੁਦ ਨੂੰ ਬਚਾਉਂਦੇ
ਲੜਾਈਆਂ ਝਗੜਿਆਂ ਤੋਂ ਤਾਂ ਕੋਹਾਂ ਦੂਰ
ਤੇ
ਕਲਾਕਾਰ ਵਲੋਂ ਦਿੱਤੇ ਸਰੂਪ ਨੂੰ ਮਾਣਦੇ
ਚੌਧਰਪੁਣੇ ਬਾਰੇ ਨਾ ਸੋਚਦੇ
ਨਾ ਵਿਚਾਰਦੇ
ਬੱਸ
ਹਰ ਇੱਕ ਦੇ ਯਾਰ ਹੁੰਦੇ ਨੇ
ਬੁੱਤ ਤਾਂ ਸੱਚੀ ਵਫ਼ਾਦਾਰ ਹੁੰਦੇ ਨੇ।
