ਪ੍ਰਭਜੀਤ ਸਿੰਘ ਰਸੂਲਪੁਰ
9878023768
ਸ਼ਹਿਰ ਦੀ ਮੁੱਖ ਸਭਾ ਤੋਂ ਟੁੱਟ ਕੇ ਬਣੀ ਨਵੀਂ ਸਾਹਿਤ ਸਭਾ ਨੇ ਕਹਾਣੀ ਮੁਕਾਬਲੇ ਦਾ ਐਲਾਨ ਕਰ ਦਿੱਤਾ। ਹੱਟੀ ਵਾਲੇ ਭੋਲੂ ਨੇ ਵੀ ਛੋਟੇ ਜਿਹੇ ਅਖ਼ਬਾਰ ਚ ਇੱਕ ਕਹਾਣੀ ਛਪਵਾ ਕੇ ਹੋਰ ਕਹਾਣੀਆਂ ਛਪਵਾਉਣ ਦਾ ਮਨ ਬਣਾਇਆ ਹੋਇਆ ਸੀ ।ਉਸ ਨੇ ਆਪਣੀ ਕਹਾਣੀ ਮੁਕਾਬਲੇ ਲਈ ਭੇਜ ਦਿੱਤੀ। ਉਸ ਨੂੰ ਉਭਰਦਾ ਕਹਾਣੀਕਾਰ ਦਾ ਖਿਤਾਬ ਦੇਣ ਵਾਲੇ ਇਹ ਨਵੀਂ ਸਭਾ ਵਾਲਿਆਂ ਕੋਲ ਉਸ ਦਾ ਸ਼ਾਮ ਨੂੰ ਬੈਠਣਾ ਸ਼ੁਰੂ ਹੋ ਗਿਆ।ਅੱਜ ‘ਸ਼ਕਤੀ ਵਾਟਰ’ ਦੀ ਸੇਵਾ ਭੋਲੂ ਵੱਲੋਂ ਸੀ। ਇੱਕ ਮੈਂਬਰ ‘ਸ਼ਕਤੀ ਵਾਟਰ ‘ਦੇ ਅਸਰ ਚ ਆ ਕੇ ਬੋਲਣ ਲੱਗਾ,ਭੋਲੂ ਵਾਈ , ਤੇਰੀ ਘਾਣੀ ਮੈਂ ਪੜ੍ਹੀ ਤਾਂ ਨੀ ਹੈਗੀ,ਪਰ ਮੈਂ ਕਹਿੰਨਾ ਉਹ ਤੀਜੇ ਨੰਬਰ ਤੇ ਜ਼ਰੂਰ ਆਉਣੀ ਹੀ ਚਾਹੀਦੀ ਆ।
ਦੂਜਾ ਬੋਲਿਆ,ਯਾਰ ਤੀਜਾ ਤਾਂ ਮਗਰਲਾ ਜਿਹਾ ਨੰਬਰ ਹੁੰਦਾ,ਪਹਿਲੇ, ਦੂਜੇ ਦੀ ਗੱਲ ਕਰ ।ਸਕੱਤਰ ਸਾਬ੍ਹ ਇਹ ਸੁਣ ਕੇ ਖਿਝ ਗਿਆ ਤੇ ਬੋਲਿਆ, ਤੂੰ ਵੀ ਨਾ ਸਾਲਿਆ ਚਮਚੇ ਕੁ ਜਿੰਨੀ ਪੀਣ ਨਾਲ ਹੀ ਟੱਲੀ ਹੋ ਜਾਨਾਂ ਤੇ ਲੱਗ ਪੈਨਾਂ ਯਬਲੀਆਂ ਜਿਹੀਆਂ -ਮਾ ਅ ਰ ਨ — ,ਪਤੰਦਰਾ ਤਸੀਲਦਾਰ ਦੀ ਘਰ ਦੀ ਨੂੰ ਕੀ ਜੁਆਬ ਦਿਆਂਗੇ—-? ਕਮਲਿਆ ,ਮੁਕਾਬਲੇ ਦਾ ਸਾਰਾ ਪ੍ਰਬੰਧ ਜਿਹੜੇ ਪ੍ਰੋਪਰਟੀ ਡੀਲਰ ਨੇ ਕਰਨਾ ਉਹਦਾ ਮੁੰਡਾ ਵੀ ਖਾਲੀ ਨੀ ਨਾ ਮੋੜਨਾ – –।
