ਅਸ਼ੋਕ ਵਰਮਾ
ਬਠਿੰਡਾ, 17 ਜੂਨ
ਕੋਰੋਨਾ ਮਹਾਂਮਾਰੀ ਕਾਰਨ ਖੂਨਦਾਨ ਕੈਂਪ ਨਾ ਲੱਗ ਸਕਣ ਕਾਰਨ ਬਲੱਡ ਬੈਂਕਾਂ ’ਚ ਹੋਈ ਖੂਨ ਦੀ ਕਮੀਂ ਨੂੰ ਪੂਰਾ ਕਰਨ ਲਈ ਡੇਰਾ ਸੱਚਾ ਸੌਦਾ ਦੀ ਸ਼ਾਹ ਸਤਿਨਾਮ ਜੀ ਗ੍ਰੀਨ ਐਸ ਵੈਲਫੇਅਰ ਫੋਰਸ ਵਿੰਗ ਦੇ ਵਲੰਟੀਅਰਾਂ ਨੇ ਰੈਡ ਕਰਾਸ ਬਠਿੰਡਾ ਵੱਲੋਂ ਕੀਤੀ ਗਈ ਅਪੀਲ ਤਹਿਤ ਡੇਰਾ ਸਲਾਬਤਪੁਰਾ ’ਚ ਲਾਏ ਖੂਨਦਾਨ ਕੈਂਪ ’ਚ 217 ਯੂਨਿਟ ਕੀਤਾ ਹੈ। ਸਵੇਰ ਤੋਂ ਹੀ ਖੂਨਦਾਨੀ ਵੀਰ ਅਤੇ ਭੈਣਾਂ ਖੂਨਦਾਨ ਕਰਨ ਲਈ ਪੁੱਜਣੇ ਸ਼ੁਰੂ ਹੋ ਗਏ ਸਨ ਪਰ ਸਿਵਲ ਹਸਪਤਾਲ ਬਠਿੰਡਾ ਦੇ ਬਲੱਡ ਬੈਂਕ ’ਚੋਂ ਪੁੱਜੀ ਟੀਮ ਨੇ ਆਪਣੀ ਸਮਰੱਥਾ ਮੁਤਾਬਿਕ 217 ਯੂਨਿਟ ਖੂਨਦਾਨ ਹੀ ਲਿਆ। ਕੈਂਪ ਦੌਰਾਨ ਕੋਰੋਨਾ ਮਹਾਂਮਾਰੀ ਤੋਂ ਬਚਾਅ ਲਈ ਵਰਤੀਆਂ ਜਾਣ ਵਾਲੀਆਂ ਸਾਵਧਾਨੀਆਂ ਦਾ ਪੂਰਾ ਪਾਲਣ ਕੀਤਾ ਗਿਆ। ਖੂਨਦਾਨ ਕਰਨ ਦੇ ਇੱਛੁਕਾਂ ਦੀ ਪੂਰੀ ਸਰੀਰਕ ਜਾਂਚ ਤੋਂ ਬਾਅਦ ਹੀ ਖੂਨ ਦਾਨ ਲਿਆ ਗਿਆ।
ਇਸ ਮੌਕੇ 45 ਮੈਂਬਰ ਪੰਜਾਬ ਗੁਰਦੇਵ ਸਿੰਘ ਅਤੇ ਖੂਨਦਾਨ ਸੰਮਤੀ ਬਠਿੰਡਾ ਦੇ ਇੰਚਾਰਜ ਲਖਵੀਰ ਸਿੰਘ ਨੇ ਦੱਸਿਆ ਕਿ ਖੂਨਦਾਨ ਇੱਕ ਭਲਾਈ ਦਾ ਕਾਰਜ਼ ਹੈ ਜਿਸ ਨਾਲ ਕਿਸੇ ਲੋੜਵੰਦ ਮਰੀਜ਼ ਦੇ ਇਲਾਜ ’ਚ ਮੱਦਦ ਹੁੰਦੀ ਹੈ। ਉਨਾਂ ਆਖਿਆ ਕਿ ਭਵਿੱਖ ’ਚ ਜਿੱਥੇ-ਜਿੱਥੇ ਜ਼ਿਲਾ ਪ੍ਰਸ਼ਾਸ਼ਨ ਅਤੇ ਰੈੱਡ ਕਰਾਸ ਅਧਿਕਾਰੀ ਖੂਨਦਾਨ ਸਮੇਤ ਹੋਰ ਭਲਾਈ ਕਾਰਜ਼ਾਂ ਲਈ ਕਹਿਣਗੇ ਤਾਂ ਉਹ ਹਮੇਸ਼ਾ ਤਿਆਰ-ਬਰ-ਤਿਆਰ ਹਨ। ਇਸ ਮੌਕੇ ਬਲੱਡ ਬੈਂਕ ਸਿਵਲ ਹਸਪਤਲ ਬਠਿੰਡਾ ਦੀ ਇੰਚਾਰਜ਼ ਮੈਡਮ ਿਸ਼ਮਾ ਨੇ ਕੈਂਪ ’ਚ ਖੂਨਦਾਨ ਕਰਨ ਲਈ ਪੁੱਜੇ ਖੂਨਦਾਨੀਆਂ ਦੀ ਭਰਵੀਂ ਸ਼ਲਾਘਾ ਕੀਤੀ। ਉਨਾਂ ਆਖਿਆ ਕਿ ਹੁਣ ਜਦੋਂ ਕੋਰੋਨਾ ਮਹਾਂਮਾਰੀ ਕਾਰਨ ਬਲੱਡ ਬੈਂਕਾਂ ’ਚ ਖੂਨ ਦੀ ਕਮੀਂ ਸੀ ਤਾਂ ਸੇਵਾਦਾਰਾਂ ਨੇ ਕੈਂਪ ਲਗਾ ਕੇ ਉਨਾਂ ਦੀ ਕਾਫੀ ਮੱਦਦ ਕੀਤੀ ਹੈ। ਇਸ ਮੌਕੇ ਡੇਰਾ ਰਾਜਗੜ ਸਲਾਬਤਪੁਰਾ ਦੇ ਪ੍ਰਬੰਧਕ ਜੋਰਾ ਸਿੰਘ , ਸੁਖਦੇਵ ਸਿੰਘ ਪੱਖੋ, 45 ਮੈਂਬਰ ਸੇਵਕ ਸਿੰਘ ਗੋਨਿਆਣਾ, ਸ਼ਿੰਦਰਪਾਲ ਪੱਕਾ ਕਲਾਂ, ਬਲਜਿੰਦਰ ਸਿੰਘ ਬਾਂਡੀ ਅਤੇ ਪਿਆਰਾ ਸਿੰਘ ਆਦਿ ਹਾਜ਼ਰ ਸਨ।
