ਪਾਸ਼ ਦੀ ਪਲੇਠੀ ਕਾਵਿ ਪੁਸਤਕ ” ਬੇਖ਼ੌਫ਼ ਆਵਾਜ਼ ” ਜਿੱਥੇ ਸਮਾਜਿਕ, ਸੱਭਿਆਚਾਰਕ, ਮਨੋਵਿਗਿਆਨਿਕ, ਆਰਥਿਕ ਵਿਸ਼ਿਆਂ ਨਾਲ ਭਰਭੂਰ ਕਵਿਤਾਵਾਂ ਦਾ ਵੱਗਦਾ ਦਰਿਆ ਹੈ ਉੱਥੇ ਰਾਜਨੀਤਿਕ ਵਿਸ਼ੇ ਵਿੱਚ ਵੀਆਪਣਾ ਇੱਕ ਅਹਿਮ ਸਥਾਨ ਬਨਾਉਂਦੀ ਨਜ਼ਰ ਆ ਰਹੀ ਹੈ। ਕਿਤਾਬ ਵਿਗਿਆਨਕ ਚੇਤਨਾ ਨਾਲ ਲੈਸ ਹੈ ਅਤੇ ਹਾਸ਼ੀਏ ਵਿੱਚ ਪਈਆਂ ਧਾਰਾਵਾਂ ਨੂੰ ਡੂੰਘੇ ਤਰੀਕੇ ਨਾਲ ਅਭਿਵਿਅਕਤ ਕਰਦੀ ਹੈ। ਵਿਸ਼ੇਸ਼ ਕਰਕੇ ਉਹਨਾਂ ਆਵਾਜ਼ਾਂ ਨੂੰ ਜਿਨ੍ਹਾਂ ਨੂੰ ਮੁੱਖਧਾਰਾ ਦੀਆਂ ਆਵਾਜ਼ਾਂ ਦੇ ਰੌਲੇ ਵਿਚ ਬਹੁਤ ਘੱਟ ਸੁਣਿਆ ਗਿਆ ਹੋਵੇ ਜਾਂ ਫ਼ਿਰ ਅਣਸੁਣਿਆ ਕਰ ਦਿੱਤਾ ਗਿਆ ਹੋਵੇ। ਪਾਸ਼ ਅੰਬਰ ਦੀਆਂ ਕਵਿਤਾਵਾਂ ਵਰਗ, ਜਾਤੀ, ਧਰਮ, ਲਿੰਗ, ਖੇਤਰ ਜਿਹੇ ਵਿਭਾਜਨਾ ਤੋਂ ਉੱਪਰ ਉੱਠਕੇ ਸੱਤਾ ਦੇ ਕੇਂਦਰ, ਸ਼ਹਿਰਾਂ ਮਹਾਂਨਗਰਾਂ ਦੇ ਖਾਸ ਇਲਾਕੇ ਤੋਂ ਦੂਰ ਪਿੰਡਾਂ, ਕਸਬਿਆਂ , ਜਨਪਦਾਂ ਵਿੱਚ ਵੱਸੇ ਲੋਕਾਂ ਦੀ ਨੁਮਾਇੰਦਗੀ ਕਰਦੀ ਹੈ।ਪਾਸ਼ ਅੰਬਰ ਦੀ ਪਲੇਠੀ ਕਾਵਿ ਪੁਸਤਕ ਮੌਜੂਦਾ ਸਮੇਂ ਅਤੇ ਸਮਾਜ ਦੇ ਅਭਾਸੀ ਸੱਚ ਨੂੰ ਹੀ ਨਹੀਂ ਦਿਖਾਉਂਦੀ ਸਗੋਂ ਉਸਦੇ ਮੂਲ ਤੱਤਵ ਨੂੰ ਅੱਗੇ ਲੈ ਜਾਂਦੀ ਹੈ ਅਤੇ ਮਾਨਵੀ ਸੰਵੇਦਨਾਵਾਂ ਦਾ ਵਿਸਤਾਰ ਕਰਦੀ ਹੈ। ਉਸ ਦੀ ਆਵਾਜ਼ ਵਿੱਚ ਕਿਸੇ ਕਿਸਮ ਦਾ ਦਿਖਾਵਾ ਨਹੀਂ ਹੈ ਬਲਕਿ ਉਹ ਪਹਾੜੀ ਨਦੀ ਦੀ ਤਰ੍ਹਾਂ ਪਾਰਦਰਸ਼ੀ ਹੈ ਅਤੇ ਪਰਬਤਾਂ ਦੀ ਤਰ੍ਹਾਂ ਬੁਲੰਦ, ਬੇਖ਼ੌਫ਼ ਹੈ।ਮੈਂ ਪਾਸ਼ ਅੰਬਰ ਦੀ ਇਸ ਪਲੇਠੀ ਕਾਵਿ ਕਿਤਾਬ ਨੂੰ ਖੁਸ਼ਆਮਦੀਦ ਕਹਿੰਦਾ ਹਾਂ ਤੇ ਉਮੀਦ ਕਰਦਾ ਹਾਂ ਕਿ ਉਸ ਦੀਆਂ ਆਉਣ ਵਾਲੀਆਂ ਰਚਨਾਵਾਂ ਵੀ ਏਸੇ ਤਰ੍ਹਾਂ ਬੇਬਾਕ ਹੋਣਗੀਆਂ, ਅਤੇ ਆਪਣੀ ਮਿੱਟੀ, ਆਪਣੇ ਚੌਗਿਰਦੇ ਨਾਲ ਜੁੜੀਆਂ ਰਹਿਣਗੀਆਂ ਅਤੇ ਸੱਚ ਦੀ ਅਭਿਵਿਅਕਤੀ ਕਰਦੀਆਂ ਰਹਿਣਗੀਆਂ।
ਰਾਜਿੰਦਰ ਬਿਆਲਾਮੋ: 9818114391
