ਵਿਦੇਸ਼ਾਂ ਵਿੱਚ ਜਨਮ ਲੈ ਰਹੀ ਭਾਰਤੀ ਪੀੜ੍ਹੀ ਨੂੰ ਨਹੀ ਕੋਈ ਮਹਾਨ ਸ਼ਹੀਦਾਂ ਬਾਰੇ ਜਾਣਕਾਰੀ
ਰੋਮ, ਇਟਲੀ (ਕੈਂਥ) ਭਾਰਤ ਮਾਤਾ ਦੇ ਜਿਨ੍ਹਾਂ ਸੂਰਵੀਰ ਬਹਾਦਰ ਯੋਧਿਆਂ ਨੇ ਹੱਸਦਿਆਂ ਹੱਸਦਿਆਂ ਸ਼ਹੀਦੀ ਜਾਮ ਪੀਕੇ ਦੇਸ਼ ਨੂੰ ਗੁਲਾਮੀ ਦੀਆਂ ਜੰਜ਼ੀਰਾਂ ਤੋਂ ਆਜ਼ਾਦ ਕਰਵਾਇਆ ਅੱਜ ਉਹ ਕੌਮ ਦੇ ਮਹਾਨ ਸ਼ਹੀਦ ਸ਼ਹੀਦ-ਏ-ਆਜ਼ਮ ਸ:ਭਗਤ ਸਿੰਘ ਵਰਗੇ ਯੋਧੇ ਬਸ ਫੁੱਲਾਂ ਦੇ ਹਾਰਾਂ ਜੋਗੇ ਹੀ ਰਹਿ ਗਏ ਹਨ ।ਹਰ ਸਾਲ ਉਹਨਾਂ ਬੱਬਰ ਸ਼ੇਰਾਂ ਨੂੰ ਅਸੀਂ ਯਾਦ ਜ਼ਰੂਰ ਕਰਦੇ ਹਾਂ ਪਰ ਸਾਡਾ ਜੀਵਨ ਸ਼ਹੀਦਾਂ ਦੀ ਸੋਚ ਤੋਂ ਬਹੁਤ ਦੂਰ ਹੈ।ਇਸ ਗੱਲ ਦਾ ਪ੍ਰਗਟਾਵਾ ਇਟਲੀ ਦੇ ਉੱਘੇ ਕਾਰੋਬਾਰੀ ਤੇ ਸਮਾਜ ਸੇਵਕ ਰਾਜਬੀਰ ਸਿੰਘ ਗਿੱਲ ਨੇ ਸ਼ਹੀਦ-ਏ-ਆਜ਼ਮ ਸ:ਭਗਤ ਸਿੰਘ ਜੀ ਦੇ 114ਵੇਂ ਜਨਮ ਦਿਨ ਮੌਕੇ ਇਟਾਲੀਅਨ ਪੰਜਾਬੀ ਪ੍ਰੈੱਸ ਕਲੱਬ ਨਾਲ ਕਰਦਿਆਂ ਕਿਹਾ ਕਿ ਵਿਦੇਸ਼ਾਂ ਵਿੱਚ ਵੱਸਦੇ ਭਾਰਤੀ ਬੇਸ਼ੱਕ ਕੌਮ ਦੇ ਮਹਾਨ ਸ਼ਹੀਦਾਂ ਦੇ ਨਾਮ ਉੱਪਰਅਨੇਕਾਂ ਸੰਸਥਾਵਾਂ ਨੂੰ ਚਲਾ ਰਹੇ ਹਨ ਪਰ ਇਸ ਦੇ ਬਾਵਜੂਦ ਵਿਦੇਸ਼ਾਂ ਵਿੱਚ ਜਨਮ ਲੈ ਰਹੀ ਭਾਰਤੀ ਪੀੜ੍ਹੀ ਨੂੰ ਭਾਰਤ ਮਾਤਾ ਦੇ ਮਹਾਨ ਸ਼ਹੀਦਾਂ ਬਾਰੇ ਕੋਈ ਜ਼ਿਆਦਾ ਜਾਣਕਾਰੀ ਨਹੀਂ ਜੋ ਕਿ ਸਮੁੱਚੇ ਐਨ,ਆਰ,ਆਈ ਭਾਰਤੀਆਂ ਲਈ ਸੋਚਣ ਦਾ ਵਿਸ਼ਾ ਹੀ ਨਹੀਂ ਸਗੋ ਬਹੁਤ ਹੀ ਸੰਜੀਦਾ ਢੰਗ ਨਾਲ ਵਿਚਾਰਨ ਯੋਗ ਗੱਲ ਵੀ ਹੈ।
ਗਿੱਲ ਨੇ ਕਿਹਾ ਕਿ ਅੱਜ ਅਸੀਂ ਬਹੁਤ ਹੀ ਫੱਕਰ ਨਾਲ ਕਹਿੰਦੇ ਨਹੀਂ ਥੱਕ ਦੇ ਕਿ ਅਸੀਂ ਸਭ ਪੰਜਾਬੀ ਸ਼ਹੀਦਾਂ ਦੇ ਵਾਰਸ ਪਰ ਕਿ ਕਦੀ ਅਸੀਂ ਇਸ ਗੱਲ ਦੇ ਅਰਥਾਂ ਨੂੰ ਡੂੰਘਾਈ ਨਾਲ ਸਮਝਿਆ ਹੈ ਕਿ ਕੌਮ ਦੇ ਸ਼ਹੀਦਾਂ ਦੇ ਵਾਰਸ ਬਣਨ ਦਾ ਅਸਲ ਮਤਲਬ ਕੀ ਹੈ।ਕੀ ਅਸੀਂ ਕਦੀਂ ਸ਼ਹੀਦ-ਏ-ਆਜ਼ਮ ਸ:ਭਗਤ ਸਿੰਘ ,ਸ਼ਹੀਦ ਊਧਮ ਸਿੰਘ ਸੁਨਾਮ,ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਜਾਂ ਕੌਮ ਦੇ ਹੋਰ ਸ਼ਹੀਦਾਂ ਦੀ ਸੋਚ ਦਾ ਦੀਵਾ ਆਪਣੇ ਵਿਕਾਰਾਂ ਨਾਲ ਭਰੇ ਮਨ ਦੇ ਹਨੇਰੇ ਵਿੱਚ ਬਾਲਣ ਦੀ ਕੋਸ਼ਿਸ ਕੀਤੀ ।ਕਦੀਂ ਅਸੀਂ ਵਿਦੇਸ਼ੀ ਧਰਤੀ ਉਪੱਰ ਵਿਚਰਦਿਆਂ ਖਾਸਕਰ ਇਟਲੀ ਦੇ ਭਾਰਤੀਆਂ ਨੇ ਆਪਣੇ ਬੱਚਿਆਂ ਨੂੰ ਗਦਰੀ ਬਾਬਿਆਂ ਦਾ ਇਤਿਹਾਸ ਸੁਣਾਇਆ ।ਇਟਲੀ ਵਿੱਚ ਪੈਦੇ ਹੋਏ ਭਾਰਤੀ ਬੱਚਿਆਂ ਵਿੱਚੋਂ ਕੋਈ ਵਿਰਲਾ ਹੀ ਹੋਵੇਗਾ ਜਿਸ ਨੂੰ ਜ਼ਿਲ੍ਹਿਆਂ ਵਾਲੇ ਬਾਗ ਵਿੱਚ ਵਾਪਰੇ ਗੋਲੀਕਾਂਡ ਦਾ ਪਤਾ ਹੋਊ।ਜੇਕਰ ਇਟਲੀ ਦੇ ਭਾਰਤੀ ਇੰਝ ਹੀ ਅਵੇਸਲੇ ਅਤੇ ਗੈਰ-ਜਿੰਮੇਵਾਰ ਹੋ ਤੁਰਦੇ ਰਹੇ ਤਾਂ ਉਹ ਦਿਨ ਦੂਰ ਨਹੀਂ ਜਦੋਂ ਇਟਲੀ ਦੇ ਭਾਰਤੀ ਬੱਚੇ ਭਾਰਤ ਦੇਸ਼ ਦੇ ਨਾਮ ਤੋਂ ਵੀ ਅਣਜਾਣ ਹੋ ਜਾਣਗੇ।ਗਿੱਲ ਨੇ ਕਿਹਾ ਉਹ ਇਟਲੀ ਦਾ ਭਾਰਤੀ ਨੌਜਵਾਨ ਕੌਮ ਦੇ ਮਹਾਨ ਸ਼ਹੀਦਾਂ ਦਾ ਇਤਿਹਾਸ ਜ਼ਰੂਰ ਪੜ੍ਹੇ ਅਤੇ ਦੇਸ਼ ਨੂੰ ਆਜਾਦ ਕਰਾਉਣ ਲਈ ਸ਼ਹਾਦਤ ਦੇਣ ਵਾਲੇ ਸੂਰਵੀਰ ਯੋਧਿਆਂ ਦੀ ਸੋਚ ਨੂੰ ਸਮਝ ਕੇ ਉਹਨਾਂ ਦੀ ਸੋਚ ਨੂੰ ਇਟਲੀ ਭਰ ਵਿੱਚ ਪਹੁੰਚਾਉਣ ਲਈ ਲਾਮਬੰਦ ਹੋਣਾ ਚਾਹੀਦਾ ਹੈ।ਇਹੀ ਕੌਮ ਦੇ ਮਹਾਨ ਯੋਧਿਆਂ ਨੂੰ ਸੱਚੀ ਸ਼ਰਧਾਜਲੀ ਹੋਵੇਗੀ।
