ਗਲਾਸਗੋ/ ਬਰਮਿੰਘਮ (ਮਨਦੀਪ ਖੁਰਮੀ ਹਿੰਮਤਪੁਰਾ, ਸੰਜੀਵ ਭਨੋਟ)
ਯੂਕੇ ਸਰਕਾਰ ਦੁਆਰਾ ਵਾਤਾਵਰਨ ਵਿਚਲੇ ਗੈਸੀ ਪ੍ਰਦੂਸ਼ਨ ਨੂੰ ਘੱਟ ਕਰਨ ਲਈ ਆਉਂਦੇ ਸਾਲਾਂ ਦੌਰਾਨ ਇਲੈਕਟ੍ਰਿਕ ਵਾਹਨਾਂ ਦੀ ਵਰਤੋਂ ਕਰਨ ‘ਤੇ ਜੋਰ ਦਿੱਤਾ ਜਾ ਰਿਹਾ ਹੈ। ਇਹਨਾਂ ਵਾਹਨਾਂ ਦੀ ਵਰਤੋਂ ਲਈ ਸ਼ਹਿਰਾਂ ਵਿੱਚ ਇਲੈਕਟ੍ਰਿਕ ਚਾਰਜਿੰਗ ਪੁਆਇੰਟ ਵੀ ਲਗਾਏ ਜਾ ਰਹੇ ਹਨ। ਪਰ ਇੱਕ ਨਵੇਂ ਸਰਵੇ ਵਿੱਚ ਪਾਇਆ ਗਿਆ ਹੈ ਬਰਮਿੰਘਮ ਅਤੇ ਮਿਡਲੈਂਡਸ ਵਿੱਚ ਇਲੈਕਟ੍ਰਿਕ ਵਾਹਨ ਚਾਰਜਿੰਗ ਪੁਆਇੰਟਾਂ ਦੀ ਗਿਣਤੀ ਵਿੱਚ ਵਾਧੇ ਦੀ ਲੋੜ ਹੈ। ਇਸ ਅਧਿਐਨ ਅਨੁਸਾਰ ਰਾਜਧਾਨੀ ਲੰਡਨ ਦੇ ਵਾਸੀਆਂ ਕੋਲ ਬਰਮਿੰਘਮ ਨਿਵਾਸੀਆਂ ਦੇ ਮੁਕਾਬਲੇ ਦੁੱਗਣੇ ਤੋਂ ਜ਼ਿਆਦਾ ਜਨਤਕ ਇਲੈਕਟ੍ਰਿਕ ਚਾਰਜਰ ਹਨ। ਮਿਡਲੈਂਡਸ ਕਨੈਕਟ ਦੁਆਰਾ ਕੀਤੇ ਇਸ ਅਧਿਐਨ ਅਨੁਸਾਰ, ਮਿਡਲੈਂਡਸ ਖੇਤਰ ਨੂੰ ਦਹਾਕੇ ਦੇ ਅੰਤ ਤੱਕ, ਹਰ ਦਿਨ 11 ਜਾਂ ਹਰ ਸਾਲ 3,941 ਨਵੇਂ ਜਨਤਕ ਇਲੈਕਟ੍ਰਿਕ ਵਾਹਨ ਚਾਰਜਰਾਂ ਦੀ ਜ਼ਰੂਰਤ ਹੈ। ਯੂਕੇ ਸਰਕਾਰ ਦੁਆਰਾ ਨਵੀਂਆਂ ਪੈਟਰੋਲ ਅਤੇ ਡੀਜ਼ਲ ਕਾਰਾਂ ਦੀ ਵਿਕਰੀ ‘ਤੇ 2030 ਤੋਂ ਪਾਬੰਦੀ ਲਗਾਉਣ ਦੀ ਯੋਜਨਾ ਹੈ ਅਤੇ ਇਸ ਲਈ ਬਰਮਿੰਘਮ ਵਿੱਚ ਚਾਰਜਿੰਗ ਪੁਆਇੰਟਾਂ ਦੀ ਜਰੂਰਤ ਹੈ। ਵੈਸਟ ਮਿਡਲੈਂਡਸ ਵਿੱਚ ਪ੍ਰਤੀ 100,000 ਲੋਕਾਂ ਲਈ ਸਿਰਫ 27 ਇਲੈਕਟ੍ਰਿਕ ਵਾਹਨ ਚਾਰਜਿੰਗ ਪੁਆਇੰਟ ਹਨ, ਜਦਕਿ ਲੰਡਨ ਵਿੱਚ ਪ੍ਰਤੀ 100,000 ਲੋਕਾਂ ਪਿੱਛੇ 83 ਚਾਰਜਿੰਗ ਪੁਆਇੰਟ ਹਨ। ਪਰ ਮਿਡਲੈਂਡਸ ਕਨੈਕਟ ਅਨੁਸਾਰ ਇਸ ਖੇਤਰ ਵਿੱਚ ਇਲੈਕਟ੍ਰਿਕ ਵਾਹਨਾਂ ਦੀ ਗਿਣਤੀ ਵਧੇਗੀ , ਜਿਸ ਲਈ ਚਾਰਜਿੰਗ ਪੁਆਇੰਟਾਂ ਦੀ ਵੀ ਜ਼ਰੂਰਤ ਹੋਵੇਗੀ। ਕਨੈਕਟ ਅਨੁਸਾਰ ਮਿਡਲੈਂਡਸ ਵਿੱਚ ਰਜਿਸਟਰਡ ਇਲੈਕਟ੍ਰਿਕ ਵਾਹਨਾਂ ਦੀ ਗਿਣਤੀ ਵਰਤਮਾਨ ਵਿੱਚ ਲਗਭਗ 45,000 ਹੈ। ਇਹ ਸੰਖਿਆ 2030 ਤੱਕ 1.7 ਮਿਲੀਅਨ ਤੱਕ ਪਹੁੰਚਣ ਦੀ ਉਮੀਦ ਹੈ।
