ਲੰਡਨ/ ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ) ਲੰਡਨ ਵਿੱਚ ਬਿੱਟੂ ਦਾ ਕੈਮਰਾ ਅਤੇ ਐਕਟਿਵ ਪੰਜਾਬੀਜ ਵੱਲੋਂ ਤੀਆਂ ਦੇ ਰੌਣਕ ਮੇਲੇ ਦਾ ਪ੍ਰਬੰਧ ਕੀਤਾ ਗਿਆ। ਪੰਜਾਬਣਾਂ ਦੇ ਦਿਲਾਂ ਦੇ ਵਲਵਲੇ, ਹੱਸਣ ਨੱਚਣ ਟੱਪਣ ਦੇ ਚਾਅ, ਜਵਾਨ ਵੇਗਮਈ ਮਨੋਭਾਵਾਂ ਦੇ ਖੁੱਲ੍ਹੇ ਪ੍ਰਗਟਾਵੇ, ਪੰਜਾਬ ਦੇ ਵਿਰਸੇ ਦੀ ਸੰਭਾਲ਼ ਦਾ ਜਜ਼ਬਾ ਅਤੇ ਇਸ ਖ਼ਿੱਤੇ ਦੀ ਅਮੀਰ ਵਿਰਾਸਤ ਨੂੰ ਰੂਪਮਾਨ ਕਰਦਾ ਸਾਉਣ ਮਹੀਨੇ ਵਿੱਚ ਕੁੜੀਆਂ ਦੇ ਹੱਸਣ, ਨੱਚਣ ਟੱਪਣ ਵਾਲਾ ਗਿੱਧੇ ਦਾ ਤਿਉਹਾਰ ਜਿਸਨੂੰ ਮਾਲਵੇ ਵਿੱਚ ਤੀਆਂ, ਮਾਝੇ ਵਿੱਚ ਸਾਂਵੇ ਕਹਿੰਦੇ ਹਨ, ਮਨਾਉਣ ਦਾ ਉਪਰਾਲਾ ਕੀਤਾ ਗਿਆ। ਇਸ ਵਿੱਚ ਹਰ ਉਮਰ ਦੀਆਂ ਸੁਆਣੀਆਂ ਨੇ ਵੱਧ ਚੜਕੇ ਹਿੱਸਾ ਲਿਆ। ਰਵਾਇਤੀ ਹਾਸਾ ਠੱਠਾ, ਗਿੱਧਾ ਬੋਲੀਆਂ, ਲੰਮੀ ਹੇਕ ਦੇ ਗੀਤਾਂ ਨਾਲ ਖ਼ੂਬ ਰੌਣਕਾਂ ਲੱਗੀਆਂ। ਇਸ ਵਿੱਚ ਇੰਗਲੈਂਡ ਦੇ ਵੱਖ ਵੱਖ ਹਿੱਸਿਆਂ ਤੋਂ ਆਈਆਂ ਕੁੜੀਆਂ ਨੇ ਹਿੱਸਾ ਲਿਆ। ਸਾਉਣ ਦੇ ਛਰਾਟੇ ਵਾਂਗ ਬੋਲੀਆਂ ਦਾ ਮੀਂਹ ਵਰ੍ਹਿਆ, ਝੜੀ ਵਾਂਗੂੰ ਲਗਾਤਾਰ ਗਿੱਧੇ ਵਿੱਚ ਪੈਰ ਥਿਰਕੇ। ਇਸ ਮੌਕੇ ‘ਤੇ ਪੰਜਾਬੀ ਸਾਹਿਤ ਤੇ ਕਲਾ ਕੇਂਦਰ ਦੇ ਪ੍ਰਧਾਨ ਕੁਲਵੰਤ ਕੌਰ ਢਿੱਲੋ ਨੇ ਕਿਹਾ ਜਦੋਂ ਸਭ ਔਰਤਾਂ ਗਿੱਧੇ ਵਿੱਚ ਜੁੜਕੇ ਇੱਕਸਾਰ ਤਾੜੀਆਂ ਵਜਾਉਂਦੀਆਂ ਹਨ ਤਾਂ ਇੰਜ ਲਗਦਾ ਹੈ ਜਿਵੇਂ ਹਰ ਵਰਗ ਦੀਆ ਔਰਤਾਂ ਵਿਰਸੇ ਦੀ ਸੰਭਾਲ਼ ਲਈ ਲੈਅਬੱਧ ਹੋ ਗਈਆਂ ਹੋਣ। ਦੇਸੀ ਰੇਡੀਓ ਪਰੈਜੈਂਟਰ ਪੰਮੀ, ਅਨੀਤਾ, ਅੰਨੂ, ਇੱਕ ਦੂਜੇ ਤੋਂ ਵੱਧ ਚੜਕੇ ਬੋਲੀਆਂ ਪਾ ਰਹੀਆਂ ਸਨ, ਗਾਇਕਾ ਗੁਰਮੇਲ ਸੰਘਾ ਨੇ ਆਪਣੀ ਸੁਰੀਲੀ ਅਵਾਜ਼ ਨਾਲ ਗੀਤ ਸੁਣਾਏ, ਸਾਹਿਤਕਾਰ ਮਨਜੀਤ ਪੱਡਾ, ਭਿੰਦਰ ਜਲਾਲਾਬਾਦੀ ਨੇ ਰਵਾਇਤੀ ਬੋਲੀਆਂ ਦੀ ਝੜੀ ਲਾ ਦਿੱਤੀ। ਕੁਲਦੀਪ ਕੌਰ ਕਿੱਟੀ ਨੇ ਆਪਣੇ ਗਿੱਧੇ ਅਤੇ ਬੋਲੀਆਂ ਨਾਲ ਅਜਿਹਾ ਮਾਹੌਲ ਸਿਰਜਿਆ ਜਿਵੇਂ ਕੋਈ ਯੂਥ ਫੈਸਟੀਵਲ ਹੋ ਰਿਹਾ ਹੋਵੇ। ਮਨਜੀਤ ਕੌਰ ਸੁੰਨੜ ਨੇ ਤੀਆਂ ਦੀ ਸ਼ੁਰੂਆਤ ਕਰਦਿਆਂ ਤੀਆਂ ਦੀ ਮਹੱਤਤਾ ਬਾਰੇ ਦੱਸਿਆ। ਕੁੜੀਆਂ ਦੇ ਪਾਏ ਰਵਾਇਤੀ ਸੂਟ, ਫੁਲਕਾਰੀਆਂ, ਪਰਾਂਦੀਆਂ, ਟਿੱਕੇ, ਵੰਗਾਂ ਰੰਗ ਬਿਰੰਗੇ ਦੁਪੱਟੇ, ਚੁੰਨੀਆਂ ਇੰਜ ਲਗਦਾ ਸੀ, ਜਿਵੇਂ ਪੰਜਾਬ ਇੰਗਲੈਂਡ ਵਿੱਚ ਉੱਤਰ ਆਇਆ ਹੋਵੇ, ਅੰਤ ਵਿੱਚ ਬਿੱਟੂ ਖੰਗੂੜਾ ਵੱਲੋਂ ਸਾਰਿਆ ਦਾ ਧੰਨਵਾਦ ਕੀਤਾ ਗਿਆ ਤੇ ਕਿਹਾ ਕਿ ਗੀਤ ਸੰਗੀਤ ਆਪਣੀ ਵਿਰਾਸਤ ਨੂੰ ਆਉਣ ਵਾਲ਼ੀਆਂ ਪੀੜੀਆ ਤੱਕ ਪਹੁੰਚਾਉਣ ਦਾ ਸਭ ਤੋਂ ਕਾਰਗਰ ਹਥਿਆਰ ਹੈ। ਬੱਲੋ ਪਾਉਣ ਤੋਂ ਬਾਅਦ ਖੀਰ ਪੂੜੇ ਛੱਕ ਕੇ ਅਗਲੇ ਸਾਲ ਮਿਲਣ ਦਾ ਵਾਅਦਾ ਕਰਕੇ ਮੇਲਾ ਵਿੱਛੜ ਗਿਆ।
