ਗੁਰਿੰਦਰਜੀਤ ਨੀਟਾ ਮਾਛੀਕੇ/ ਕੁਲਵੰਤ ਧਾਲੀਆਂ, ਫਰਿਜ਼ਨੋ (ਕੈਲੀਫੋਰਨੀਆ)
ਅਮਰੀਕਾ ਦੀ ਸਟੇਟ ਅਲਾਬਮਾ ਦੇ ਜੇਲ੍ਹ ਕੈਦੀਆਂ ਦਰਮਿਆਨ ਵਧ ਰਹੇ ਕੋਰੋਨਾ ਵਾਇਰਸ ਦੇ ਮਾਮਲਿਆਂ ਦੇ ਮੱਦੇਨਜ਼ਰ ਡਿਪਾਰਟਮੈਂਟ ਆਫ ਕੋਰੈਕਸ਼ਨਜ ਵੱਲੋਂ ਕੈਦੀਆਂ ਨੂੰ ਕੋਰੋਨਾ ਵੈਕਸੀਨ ਲਗਵਾਉਣ ਲਈ ਉਤਸ਼ਾਹਿਤ ਕੀਤਾ ਜਾ ਰਿਹਾ ਹੈ। ਇਸ ਯੋਜਨਾ ਤਹਿਤ ਟੀਕਾ ਲਗਵਾ ਚੁੱਕੇ ਕੈਦੀ ਅਤੇ ਜੋ ਕੈਦੀ ਟੀਕਾ ਲਗਵਾਉਣਗੇ, ਨੂੰ 5 ਡਾਲਰ ਕੰਟੀਨ ਕ੍ਰੈਡਿਟ ਵਿੱਚ ਪ੍ਰਾਪਤ ਹੋਣਗੇ। ਇਸ ਤੋਂ ਪਹਿਲਾਂ ਅਲਾਬਮਾ ਸੁਧਾਰ ਵਿਭਾਗ ਨੇ ਕੁੱਲ 15 ਲੋਕਾਂ ਦੀ ਰਿਪੋਰਟ ਦਿੱਤੀ ਜਿਹਨਾਂ ਵਿੱਚੋਂ 6 ਕੈਦੀ ਅਤੇ 9 ਸਟਾਫ ਮੈਂਬਰਾਂ ਦੇ 30 ਜੁਲਾਈ ਤੱਕ ਕੋਵਿਡ -19 ਲਈ ਪਾਜੇਟਿਵ ਟੈਸਟ ਕੀਤੇ ਗਏ। ਇਸਦੇ ਇਲਾਵਾ ਪਿਛਲੇ ਹਫਤੇ ਵੀ 9 ਕੈਦੀਆਂ ਅਤੇ 18 ਸਟਾਫ ਮੈਂਬਰਾਂ ਨੇ ਵਾਇਰਸ ਦਾ ਪਾਜੇਟਿਵ ਟੈਸਟ ਕੀਤਾ। ਵਿਭਾਗ ਦੀ ਰਿਪੋਰਟ ਅਨੁਸਾਰ ਇਸ ਯੋਜਨਾ ਨਾਲ 103 ਕੈਦੀਆਂ ਨੇ ਜੇਲ੍ਹ ਦੇ ਮੁਫਤ ਟੀਕਾਕਰਨ ਪ੍ਰੋਗਰਾਮ ਵਿੱਚ ਹਿੱਸਾ ਲਿਆ। ਇਸ ਪਹਿਲ ਦੇ ਨਾਲ ਹੀ ਅਲਾਬਮਾ ਜੇਲ੍ਹ ਵਿਭਾਗ ਨੇ ਹੋਰ ਸਾਵਧਾਨੀਆਂ ਵੀ ਵਰਤੀਆਂ ਹਨ ਜਿਹਨਾਂ ਵਿੱਚ ਜੇਲ੍ਹ ‘ਚ ਵਿੱਚ ਮੁਲਾਕਾਤ ਅਤੇ ਗੈਰ-ਜ਼ਰੂਰੀ ਦਾਖਲੇ ‘ਤੇ ਰੋਕ ਲਗਾਉਣਾ, ਨਵੇਂ ਕੈਦੀਆਂ ਨੂੰ ਅਲੱਗ ਰੱਖਣਾ ਅਤੇ ਗੈਰ-ਐਮਰਜੈਂਸੀ ਡਾਕਟਰੀ ਮੁਲਾਕਾਤਾਂ ਦਾ ਸਮਾਂ ਤਹਿ ਕਰਨਾ ਆਦਿ ਸ਼ਾਮਲ ਹਨ। ਇਸਦੇ ਇਲਾਵਾ ਸੀ ਡੀ ਸੀ ਦੇ ਅਨੁਸਾਰ, ਅਲਾਬਮਾ ਦੀ 34.3% ਆਬਾਦੀ ਨੂੰ ਪੂਰੀ ਤਰ੍ਹਾਂ ਕੋਰੋਨਾ ਟੀਕਾ ਲਗਾਇਆ ਗਿਆ ਹੈ ਅਤੇ 43.2% ਨੂੰ ਵੈਕਸੀਨ ਦੀ ਇੱਕ ਖੁਰਾਕ ਮਿਲੀ ਹੈ।
