ਅਸ਼ੋਕ ਵਰਮਾ
ਬਠਿੰਡਾ,4 ਜੁਲਾਈ2021: ਪੰਜਾਬੀ ਸਾਹਿਤ ਸਭਾ ਬਠਿੰਡਾ ( ਰਜਿ) ਦੀ ਮਹੀਨਾਵਾਰ ਸਾਹਿਤਕ ਇਕੱਤਰਤਾ ਸਭਾ ਦੇ ਪ੍ਰਧਾਨ ਜੇ ਸੀ ਪਰਿੰਦਾ ਦੀ ਪ੍ਰਧਾਨਗੀ ਹੇਠ ਸਥਾਨਕ ਟੀਚਰਜ ਹੋਮ ਵਿਖੇ ਹੋਈ ਜਿਸ ਵਿੱਚ ਤਾਲਾਬੰਦੀ ਖੁੱਲ੍ਹਣ ਤੋਂ ਬਾਅਦ ਤਕਰੀਬਨ ਚਾਰ ਦਰਜਨ ਲੇਖਕਾਂ ਅਤੇ ਸਾਹਿਤ ਪ੍ਰੇਮੀਆਂ ਨੇ ਭਾਗ ਲਿਆ । ਸਾਹਿਤ ਸਭਾ ਦੇ ਪ੍ਰਚਾਰ ਸਕੱਤਰ ਅਮਨ ਦਾਤੇਵਾਸੀਆ ਨੇ ਦੱਸਿਆ ਕਿ ਇਤਿਹਾਸਕਾਰ ਅਤੇ ਅਨੁਵਾਦਕ ਪ੍ਰੋ ਅਮਨਦੀਪ ਸੇਖੋਂ ਨੇ ਹਾਵਰਡ ਫਾਸਟ ਦਾ ਨਾਵਲ ਮਾਈ ਗਲੋਰੀਅਸ ਬ੍ਰਦਰਜ ਦੇ ਪੰਜਾਬੀ ਅਨੁਵਾਦ “ ਸ਼ਾਨਾਂ – ਮੱਤੇ “ ਸੰਬੰਧੀ ਵਿਚਾਰ ਪੇਸ਼ ਕੀਤੇ। ਉਹਨਾਂ ਕਿਹਾ ਇਹ ਨਾਵਲ ਈਸਾ ਪੂਰਵ ਰੋਮਨ ਸਾਮਰਾਜ ਦੀ ਚੜ੍ਹਤ ਤੋਂ ਪਹਿਲਾਂ ਦੀ ਕਹਾਣੀ ਹੈ ਜਦੋਂ ਯਹੂਦੀ ਕਿਸਾਨਾਂ ਨੇ ਯੂਨਾਨੀ ਸਾਮਰਾਜ ਵਿਰੁੱਧ ਹਥਿਆਰ ਚੁੱਕੇ ਸਨ। ਇਸ ਬਗਾਵਤ ਦੀ ਅਗਵਾਈ ਛੇ ਮਕਾਬੀਆਂ ( ਆਗੂਆਂ ) ਨੇ ਕੀਤੀ ਸੀ।
ਇਹ ਮਕਾਬੀ ਅਦੋਨ ਮਟਾਬੀਆ ਅਤੇ ਉਸਦੇ ਪੰਜ ਪੁੱੱਤਰ ਸਨ ਜਿਨ੍ਹਾਂ ਦੀ ਅਮਰ ਕਹਾਣੀ ਯਹੂਦੀਆਂ ਦੀ ਇੱਕ ਪੁਰਾਤਨ ਪੋਥੀ ਦੇ ਅਧਾਰ ’ਤੇ ਹਾਵਰਡ ਫਾਸਟ ਨੇ ਆਪਣੇ ਇਸ ਨਾਵਲ ਦੀ ਰਚਨਾ ਕੀਤੀ।ਇਸ ਨਾਵਲ ਤੇ ਬੋਲਦਿਆਂ ਨਾਵਲਕਾਰ ਜਸਪਾਲ ਮਾਨਖੇੜਾ ਨੇ ਕਿਹਾ ਕਿ ਵਿਸ਼ਵ ਪੱਧਰੀ ਨਾਵਲ ਮਾਂ ਬੋਲੀ ਦੀ ਝੋਲੀ ਪਾਉਣ ਲਈ ਇਸ ਦੇ ਅਨੁਵਾਦਕ ਪੋ ਅਮਨਦੀਪ ਸੇਖੋਂ ਅਤੇ ਪ੍ਰਕਾਸ਼ਕ ਪੀਪਲਜ ਫੋਰਮ ਬਰਗਾੜੀ ਵਿਸ਼ੇਸ਼ ਧੰਨਵਾਦ ਦੇ ਹੱਕਦਾਰ ਹਨ। ਬਠਿੰਡਾ ਵਾਸੀਆਂ ਲਈ ਇਹ ਖੁਸ਼ੀ ਦੀ ਗੱਲ ਹੈ ਕਿ ਅਨੁਵਾਦਕ ਲੇਖਕ ਬਠਿੰਡਾ ਦਾ ਵਸਨੀਕ ਹੈ। ਇਸ ਤੋਂ ਇਲਾਵਾ ਪਿ੍ਰੰਸੀਪਲ ਜਗਦੀਸ਼ ਘਈ, ਕਹਾਣੀਕਾਰ ਅਤਰਜੀਤ, ਆਲੋਚਕ ਗੁਰਦੇਵ ਖੋਖਰ ਅਤੇ ਡਾ ਰਵਿੰਦਰ ਸੰਧੂ, ਨਾਵਲਕਾਰ ਜਸਵਿੰਦਰ ਜੱਸ ਨੇ ਵੀ ਇਸ ਵਿਚਾਰ ਚਰਚਾ ਵਿੱਚ ਹਿੱਸਾ ਲਿਆ ਅਤੇ ਨਾਵਲ ਸਬੰਧੀ ਕਈ ਤਰਾਂ ਦੀ ਜਾਣਕਾਰੀ ਸਾਂਝੀ ਕੀਤੀ।
ਰਚਨਾਵਾਂ ਦੇ ਦੌਰ ਵਿੱਚ ਰਾਜਦੇਵ ਕੌਰ ਸਿੱਧੂ ਨੇ ਮਿੰਨੀ ਕਹਾਣੀ – ‘ਨਾਸੂਰ’,ਸੇਵਕ ਸ਼ਮੀਰੀਆ ਨੇ ਵਿਅੰਗਾਤਮਕ ਟੋਟਕੇ, ਦਿਲਬਾਗ ਸਿੰਘ ਅਤੇ ਸੁਖਵਿੰਦਰ ਕੌਰ ਫਰੀਦਕੋਟ ਨੇ ਕਵਿਤਾ, ਅਮਰਜੀਤ ਜੀਤ ਨੇ ਗਜਲ, ਬਲਵਿੰਦਰ ਭੁੱਲਰ ਨੇ ‘ ਆ ਨੀ ਭੈਣੇ ਡੇਰੇ ਚੱਲੀਏ‘, ਅਮਰਜੀਤ ਸਿੱਧੂ ਨੇ ਲੋਕ ਬੋਲੀਆਂ, ਪਿ੍ਰੰਸੀਪਲ ਅਮਰਜੀਤ ਸਿੰਘ ਸਿੱਧੂ ਨੇ ਉਰਦੂ ਦੇ ਸ਼ੇਅਰ, ਕੰਵਲਜੀਤ ਕੁਟੀ, ਮਨਜੀਤ ਬਠਿੰਡਾ, ਰਣਬੀਰ ਰਾਣਾ ਅਤੇ ਕੁਲਦੀਪ ਬੰਗੀ ਨੇ ਗਜਲਾਂ, ਅੰਮਿ੍ਰਤਪਾਲ ਬੰਗੇ ਅਤੇ ਲੀਲਾ ਸਿੰਘ ਰਾਏ ਨੇ ਗੀਤ, ਜੇ ਸੀ ਪਰਿੰਦਾ ਨੇ ਵਿਅੰਗਾਤਮਕ ਕਵਿਤਾ “ ਦਾਹੜੀ ਵਿੱਚ ਤਿਣਕਾ“ ਅਤੇ ਅਮਨ ਦਾਤੇਵਾਸੀਆ ਨੇ “ ਮੇਰੀ ਮੌਤ ਤੇ ਨਾ ਰੋਇਓ“ ਗੀਤ ਸੁਣਾਇਆ। ਇਸ ਮੌਕੇ ਪੰਜਾਬ ਨਾਵਲਕਾਰ ਜਸਪਾਲ ਮਾਨਖੇੜਾ ਨੂੰ ਸਾਹਿਤ ਅਕਾਦਮੀ ਦਾ ਅਐਸੋਸੀਏਟ ਮੈਂਬਰ ਨਿਯੁਕਤ ਹੋਣ ਤੇ ਸ਼ਹਿਰ ਦੀਆਂ ਸਾਹਿਤਕ ਸੰਸਥਾਵਾਂ ਨੇ ਵਧਾਈ ਦਿੱਤੀ ।
ਇਸ ਮੌਕੇ ਵਿੱਛੜੇ ਸਾਹਿਤਕਾਰ ਅਤੇ ਸਭਾ ਦੇ ਪਰਿਵਾਰਕ ਮੈਂਬਰਾਂ ਪਿ੍ਰੰਸੀਪਲ ਸੁਲੱਖਣ ਮੀਤ, ਡਾ ਹਰਨੇਕ ਸਿੰਘ ਕੋਮਲ, ਮਹਿੰਦਰ ਸਾਥੀ, ਡਾ ਜੋਧ ਸਿੰਘ , ਸੁਰਿੰਦਰ ਕੌਰ ਖਰਲ, ਰਣਜੀਤ ਗੌਰਵ ਦੇ ਪਿਤਾ ਜੋਰਾ ਸਿੰਘ, ਅਜੀਮ ਸ਼ੇਖਰ ਦੀ ਮਾਤਾ ਮਾਇਆ ਦੇਵੀ , ਰਣਬੀਰ ਰਾਣਾ ਦੀ ਸੁਪਤਨੀ ਸੋਮਾ ਰਾਣੀ ਅਤੇ ਕਿਸਾਨੀ ਸੰਘਰਸ਼ ਦੌਰਾਨ ਸ਼ਹੀਦ ਕਿਸਾਨਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ । ਸਟੇਜ ਸੰਚਾਲਨ ਸਭਾ ਦੇ ਸਕੱਤਰ ਰਣਬੀਰ ਰਾਣਾ ਨੇ ਕੀਤਾ। ਇਸ ਮੌਕੇ ਰਣਜੀਤ ਗੌਰਵ, ਦਮਜੀਤ ਦਰਸ਼ਨ, ਧਰਮਪਾਲ, ਅਗਾਜਵੀਰ, ਗੁਰਮੀਤ ਸਿੰਘ , ਮਾਸਟਰ ਗਿਆਨ ਸਿੰਘ, ਵਿਕਾਸ ਕੌਂਸਲ, ਗੁਰਅਵਤਾਰ ਸਿੰਘ ਗੋਗੀ, ਅਮਨਦੀਪ ਸਿੰਘ ,ਹਰਬੰਸ ਸਿੰਘ ਬਰਾੜ, ਨਾਟਕਕਾਰ ਕੀਰਤੀ ਕਿਰਪਾਲ, ਚਰਨਜੀਤ ਸੰਧੂ, ਹਰਮੰਦਰ ਸਿੰਘ ਢਿੱਲੋਂ , ਲਛਮਣ ਮਲੂਕਾ, ਹਰਬੰਸ ਲਾਲ ਗਰਗ, ਜੇ ਸੀ ਪਰਿੰਦਾ ,ਦਰਸ਼ਨ ਦਰਸ਼ੀ ਅਤੇ ਭੋਲਾ ਸਿੰਘ ਸ਼ਮੀਰੀਆ ਆਦਿ ਹਾਜਰ ਸਨ।
