–ਮਨਦੀਪ ਖੁਰਮੀ ਹਿੰਮਤਪੁਰਾ
ਕੁਲਵੰਤ ਸੇਖੋਂ ਨਾਲ਼ ਮੇਰੀ ਸਾਂਝ 25 ਵਰ੍ਹੇ ਪੁਰਾਣੀ ਹੈ, ਢੁੱਡੀਕੇ ਕਾਲਜ ਵਿੱਚ ਓਹ ਮੇਰੇ ਨਾਲ਼ੋਂ ਇੱਕ ਜਮਾਤ ਪਿੱਛੇ ਆ ਦਾਖਲ ਹੋਇਆ ਸੀ। ਕਾਲਜ਼ ਦੇ ਸੱਭਿਆਚਾਰਕ ਸਮਾਗਮਾਂ ‘ਚ ਓਹ ਸਭ ਦਾ ਚਹੇਤਾ ਕਲਾਕਾਰ ਸੀ। ਕਾਲਜ਼ ਪੜ੍ਹਦਿਆਂ ਹੀ ਉਹ ਸ਼ੁਹਰਤ ਦੀ ਬੁਲੰਦੀ ਵੱਲ ਨੂੰ ਐਸਾ ਤੁਰਿਆ ਕਿ ਸਭ ਦੋਸਤ ਮਿੱਤਰ ਮਾਣ ਕਰਦੇ ਨਹੀਂ ਥੱਕਦੇ। ਭਰੋਵਾਲ ਦੀਦਾਰ ਸੰਧੂ ਯਾਦਗਾਰੀ ਮੇਲੇ ‘ਤੇ ਜਗਦੇਵ ਸਿੰਘ ਜੱਸੋਵਾਲ ਜੀ ਦੀ ਪਾਰਖੂ ਅੱਖ ਨੇ ਅਜਿਹਾ ਪਛਾਣਿਆ ਕਿ ਕੁਲਵੰਤ ਸੇਖੋਂ ਨੂੰ ਆਵਾਜ਼ ਦੇ ਧਨੀ ਗਾਇਕ ਅੰਗਰੇਜ਼ ਅਲੀ ਦਾ ਸੰਗੀ ਬਣਾ ਦਿੱਤਾ। ਦੋਵਾਂ ਦੀ ਦੋਸਤੀ ਵੀ ਅਜਿਹੀ ਕਿ 25 ਵਰ੍ਹਿਆਂ ਤੋਂ ਸਕੇ ਭਰਾਵਾਂ ਨਾਲੋਂ ਵਧੇਰੇ ਮੋਹ ਹੈ ਦੋਹਾਂ ਵਿਚਕਾਰ।
ਕੁਲਵੰਤ ਸੇਖੋਂ ਨੂੰ ਗੁਣਾਂ ਦੀ ਗੁਥਲੀ ਕਹਿਣਾ ਉਸਦੇ ਗੁਣਾਂ ਨਾਲ ਬੇਇਨਸਾਫ਼ੀ ਹੈ। ਕਦੇ ਕਦੇ ਲਗਦੈ ਜਿਵੇਂ ਉਹ ਆਪਣੇ ਨਿੱਕੇ ਜਿਹੇ ਸਰੀਰ ਮਗਰ ਗੁਣਾਂ ਲੱਦੀ ਭੂੰਗ ਵਾਲੀ ਟਰਾਲੀ ਖਿੱਚੀ ਫਿਰਦਾ ਹੋਵੇ। ਓਹਨਾਂ ਗੁਣਾਂ ‘ਚੋਂ ਉਸਦੇ ਦੋ ਗੁਣ ਲਿਖਣਾ ਤੇ ਗਾਉਣਾ ਵੀ ਹਨ।
ਕੁਲਵੰਤ, ਸਾਡੇ ਸਨਮੁੱਖ ਆਪਣਾ ਨਵਾਂ ਗੀਤ “ਘੁੱਗੀਆਂ ਦਾ ਜੋੜਾ” ਲੈ ਕੇ ਹਾਜ਼ਰ ਹੋਇਆ ਹੈ। ਦੋ ਘੁੱਗੀਆਂ ਨੂੰ ਆਧਾਰ ਬਣਾ ਕੇ ਉਸਨੇ ਅਜੋਕੇ ਹਾਲਾਤਾਂ ਦੀ ਅਜਿਹੀ ਹਿਰਦੇਵੇਧਕ ਤਸਵੀਰ ਗੀਤ ਰਾਹੀਂ ਪੇਸ਼ ਕੀਤੀ ਹੈ ਕਿ ਸੁਣਨ ਵਾਲੇ ਦੇ ਕਾਲਜ਼ੇ ‘ਚੋਂ ਰੁੱਗ ਭਰਿਆ ਜਾਂਦਾ ਹੈ। ਗੀਤ ਸੁਣਦਿਆਂ ਇਉਂ ਮਹਿਸੂਸ ਹੁੰਦਾ ਹੈ ਜਿਵੇਂ ਸਚਮੁੱਚ ਹੀ ਦੋ ਘੁੱਗੀਆਂ ਮਨੁੱਖ ਦੀ ਬੇਰਹਿਮੀ, ਆਪਹੁਦਰੀਆਂ, ਬੇਵਸੀ ਦੀ ਬਾਤ ਪਾ ਰਹੀਆਂ ਹੋਣ। ਉਮੀਦ ਕਰਦਾ ਹਾਂ ਕਿ ਤੁਸੀਂ ਵੀ “ਦੋ ਘੁੱਗੀਆਂ” ਦੀ ਕੁਲਵੰਤ ਸੇਖੋਂ ਦੇ ਮੂੰਹੋਂ ਉਚਰੀ ਵਾਰਤਾ ਨੂੰ ਜ਼ਰੂਰ ਪਸੰਦ ਕਰੋਗੇ।
ਗਲਾਸਗੋ, ਸਕਾਟਲੈਂਡ।
07519112312
