ਗਲਾਸਗੋ/ਲੰਡਨ (ਮਨਦੀਪ ਖੁਰਮੀ ਹਿੰਮਤਪੁਰਾ)
ਯੂਕੇ ਨੇ ਕਰੋਨਾਂ ਵਾਇਰਸ ਨਾਲ ਹੋ ਰਹੀਆਂ ਰੋਜ਼ਾਨਾਂ ਮੌਤਾਂ ਦੀ ਗਿਣਤੀ ਵਿੱਚ ਰਿਕਾਰਡ ਵਾਧਾ ਦਰਜ਼ ਕੀਤਾ ਹੈ। ਇਸ ਸੰਬੰਧੀ ਤਾਜ਼ਾ ਅੰਕੜਿਆਂ ਅਨੁਸਾਰ 1,325 ਮੌਤਾਂ ਦਰਜ਼ ਹੋਈਆਂ ਹਨ ਜੋ ਕਿ ਮਹਾਂਮਾਰੀ ਦੀ ਸ਼ੁਰੂਆਤ ਤੋਂ ਬਾਅਦ ਸਭ ਤੋਂ ਵੱਧ ਗਿਣਤੀ ਹੈ। ਇਸ ਵਧ ਰਹੀ ਗਿਣਤੀ ਨਾਲ ਸਿਹਤ ਵਿਗਿਆਨੀ ਤੀਜੀ ਰਾਸ਼ਟਰੀ ਤਾਲਾਬੰਦੀ ਦੇ ਬਾਵਜੂਦ ਦੇਸ਼ ਭਰ ਵਿੱਚ ਰੋਜ਼ਾਨਾ 150,000 ਤੋਂ ਵੱਧ ਲਾਗ ਦੇ ਕੇਸ ਹੋਣ ਦਾ ਖਦਸ਼ਾ ਪ੍ਰਗਟ ਕਰ ਰਹੇ ਹਨ। ਸ਼ੁੱਕਰਵਾਰ ਨੂੰ ਦਰਜ਼ ਕੀਤਾ ਗਿਆ 1,325 ਮੌਤਾਂ ਦਾ ਇਹ ਅੰਕੜਾ 21 ਅਪ੍ਰੈਲ 2020 ਨੂੰ ਹੋਈਆਂ 1232 ਮੌਤਾਂ ਦੇ ਰਿਕਾਰਡ ਨੂੰ ਪਾਰ ਕਰ ਗਿਆ ਹੈ ਅਤੇ ਇਹਨਾਂ ਨਾਲ ਦੇਸ਼ ਵਿੱਚ ਮੌਤਾਂ ਦੀ ਕੁੱਲ ਗਿਣਤੀ 79,833 ਹੋ ਗਈ ਹੈ। ਇਸਦੇ ਇਲਾਵਾ ਰੋਜ਼ਾਨਾ ਲਾਗ ਦੇ ਵੀ 68,053 ਮਾਮਲੇ ਦਰਜ਼ ਹੋਣ ਨਾਲ ਸਿਹਤ ਅਤੇ ਸਮਾਜਕ ਦੇਖਭਾਲ ਵਿਭਾਗ ਅਨੁਸਾਰ ਯੂਕੇ ‘ਚ ਵਾਇਰਸ ਦੀ ਲਾਗ ਦਾ ਕੁੱਲ ਅੰਕੜਾ ਤਕਰੀਬਨ 2,957,472 ਤੱਕ ਪਹੁੰਚ ਗਿਆ ਹੈ। ਇੰਗਲੈਂਡ ਦੇ ਸਾਰੇ ਵੱਡੇ ਹਸਪਤਾਲਾਂ ਵਿਚ ਵਾਇਰਸ ਦੀ ਪਹਿਲੀ ਲਹਿਰ ਨਾਲੋਂ 29,200 ਦੀ ਗਿਣਤੀ ਨਾਲ ਜ਼ਿਆਦਾ ਮਰੀਜ਼ ਹਨ। ਦੇਸ਼ ਦੀ ਰਾਜਧਾਨੀ ਵਿੱਚ ਵਾਇਰਸ ਦੇ ਬੇਕਾਬੂ ਹੋਣ ਕਾਰਨ ਸ਼ੁੱਕਰਵਾਰ ਨੂੰ ਲੰਡਨ ਦੇ ਮੇਅਰ ਸਾਦਿਕ ਖਾਨ ਨੇ ਰਾਜਧਾਨੀ ਵਿੱਚ ਕੋਰੋਨਾਂ ਦੀ ਇੱਕ ਵੱਡੀ ਘਟਨਾ ਦਾ ਐਲਾਨ ਕੀਤਾ ਕਿਉਂਕਿ ਖੇਤਰ ਵਿੱਚ ਹਸਪਤਾਲਾਂ ਦੀਆਂ ਸਿਹਤ ਸਹੂਲਤਾਂ ਆਪਣੇ ਆਖਰੀ ਸਾਹਾਂ ‘ਤੇ ਹਨ ,ਜਿਸ ਨਾਲ ਅਗਲੇ ਦੋ ਹਫ਼ਤਿਆਂ ਤੱਕ ਬਿਸਤਰਿਆਂ ਦੇ ਖ਼ਤਮ ਹੋਣ ਦੀ ਸੰਭਾਵਨਾ ਹੈ। ਇਸਦੇ ਨਾਲ ਹੀ ਲੰਡਨ ਦੇ ਹਸਪਤਾਲਾਂ ‘ਚ 7,000 ਤੋਂ ਵੱਧ ਕੋਵਿਡ ਮਰੀਜ਼ ਦਾਖਲ ਹੋਣ ਕਾਰਨ ਸੈਂਕੜੇ ਕੈਂਸਰ ਦੇ ਅਪ੍ਰੇਸ਼ਨ ਰੱਦ ਕੀਤੇ ਜਾ ਰਹੇ ਹਨ। ਇਸ ਦੌਰਾਨ ਦੇਸ਼ ਵਿੱਚ ਟੀਕਾਕਰਨ ਨੂੰ ਤੇਜ਼ ਕਰਨ ਲਈ ਯੂ ਐਸ ਬਾਇਓਟੈਕ ਫਰਮ ਮੋਡਰਨਾ ਦੇ ਟੀਕੇ ਨੂੰ ਯੂਕੇ ਵਿੱਚ ਤੀਜੀ ਵੈਕਸੀਨ ਦੇ ਰੂਪ ਵਿੱਚ ਮੈਡੀਸਨਜ਼ ਐਂਡ ਹੈਲਥਕੇਅਰ ਪ੍ਰੋਡਕਟਸ ਰੈਗੂਲੇਟਰੀ ਏਜੰਸੀ (ਐਮ.ਐਚ.ਆਰ.ਏ) ਦੁਆਰਾ ਵਰਤੋਂ ਲਈ ਪ੍ਰਵਾਨਗੀ ਦਿੱਤੀ ਗਈ ਹੈ।
