ਤਮੰਨਾ

ਰਜਨੀ ਵਾਲੀਆ
ਇਹ ਮੇਰੀ ਏ ਤਮੰਨਾਂ,
ਹਮੇਸ਼ਾਂ ਤੂੰ ਹੋਵੇਂ ਨਾਲ ਮੇਰੇ,
ਜਦੋਂ ਹੋਵਾਂ ਮੈਂ ਉਦਾਸ |
ਤੂੰ ਹੋ ਕੇ ਦੂਰ ਨੇੜੇ,
ਓ ਰੱਬਾ ਤੂੰ ਹੀ ਮੇਰਾ ਖਾਸ |
ਇਹ ਮੇਰੀ ਏ ਤਮੰਨਾਂ,
ਹਮੇਸ਼ਾਂ ਤੂੰ ਹੋਵੇਂ ਨਾਲ ਮੇਰੇ,
ਜਦੋਂ ਹੋਵਾਂ ਮੈਂ ਉਦਾਸ |
ਇਹ ਮੇਰੀ ਏ ਤਮੰਨਾਂ,

ਹੋਵਣ ਤੇਰੇ ਰੰਗ ਨਿਆਰੇ,
ਤੂੰ ਕੀ-ਕੀ ਕਰ ਦੇਵੇਂ |
ਜੋ ਸੋਚਿਆ ਵੀ ਨਾ ਹੋਵੇ,
ਓ ਅੱਗੇ ਧਰ ਦੇਵੇਂ |
ਮੇਰੀ ਰੂਹ ਰੱਜੀ ਰਵੇ,
ਤਾਈਓਂ ਲੱਗੇ ਨਾ ਪਿਆਸ |
ਹਮੇਸ਼ਾਂ ਤੂੰ ਹੋਵੇਂ ਨਾਲ ਮੇਰੇ,
ਜਦੋਂ ਹੋਵਾਂ ਮੈਂ ਉਦਾਸ |
ਇਹ ਮੇਰੀ ਏ ਤਮੰਨਾਂ,

ਨੀਯਤ ਨੂੰ ਮੁਰਾਦ ਦੇਵੇਂ,
ਤੂੰ ਡਾਢੜਾ ਸਿਆਣਾ |
ਖਾਲੀ ਝੋਲੀ ਝੱਟ ਭਰੇਂ,
ਤਾਂ ਹੀ ਮੰਨਾਂ ਤੇਰਾ ਭਾਣਾ |
ਤੂੰ ਮਹਿਸੂਸ ਹੋਣ ਨਾ ਦੇਵੇਂ,
ਭਾਵੇਂ ਆਉਣ ਦੁੱਖ ਰਾਸ |
ਹਮੇਸ਼ਾਂ ਤੂੰ ਹੋਵੇਂ ਨਾਲ ਮੇਰੇ,
ਜਦੋਂ ਹੋਵਾਂ ਮੈਂ ਉਦਾਸ |
ਇਹ ਮੇਰੀ ਏ ਤਮੰਨਾਂ,

ਦਿਲ ਦਾ ਘਰ ਤੇਰੇ ਨਾਲ,
ਤੇਰੇ ਨਾਲ ਬੂਹਾ ਬਾਰੀ |
ਤੂੰ ਪਾਵੇਂ ਵਜ਼ਨ ਖੰਭਾਂ ਵਿੱਚ,
ਤੇਰੇ ਨਾਲ ਹੀ ਉਡਾਰੀ |
ਤੇਰੀ ਯਾਦ ਹੀ ਸਹਾਰਾ,
ਜੋ ਬੜਾ ਦੇਵੇ ਧਰਵਾਸ |
ਹਮੇਸ਼ਾਂ ਤੂੰ ਹੋਵੇਂ ਨਾਲ ਮੇਰੇ,
ਜਦੋਂ ਹੋਵਾਂ ਮੈਂ ਉਦਾਸ |
ਇਹ ਮੇਰੀ ਏ ਤਮੰਨਾਂ,

ਮੈਂ ਤੋਰੇਂ ਤੇ ਤੁਰ ਪਵਾਂ,
ਨੰਗੀ ਤਲਵਾਰ ਉੱਤੇ |
ਮੈਂ ਤੋਰੇਂ ਤੇ ਤੁਰ ਪਵਾਂ,
ਖੰਡੇ ਦੀ ਧਾਰ ਉੱਤੇ |
ਉਮਰ ਭਰ ਬਣਾਈ ਰੱਖੀਂ,
ਬਣੀਂ ਰਹੂੰ ਤੇਰੀ ਦਾਸ |
ਹਮੇਸ਼ਾਂ ਤੂੰ ਹੋਵੇਂ ਨਾਲ ਮੇਰੇ,
ਜਦੋਂ ਹੋਵਾਂ ਮੈਂ ਉਦਾਸ |
ਇਹ ਮੇਰੀ ਏ ਤਮੰਨਾਂ,

ਬੜੇ ਬੈਠੇ ਲੋਕ ਏਥੇ,
ਜਿਹੜੇ ਸੋਚਦੇ ਨੇਂ ਮਾੜਾ |
ਜੋ ਕਰ ਸਕਦੇ ਨਈਂ ਖੁਦ,
ਓ ਕਰਦੇ ਨੇਂ ਸਾੜਾ |
ਕਿਸੇ ਦੀ ਮਿਲੇ ਕੋਈ ਕਮਜੋਰੀ,
ਲਾਈ ਰੱਖਣ ਕਿਆਸ |
ਹਮੇਸ਼ਾਂ ਤੂੰ ਹੋਵੇਂ ਨਾਲ ਮੇਰੇ,
ਜਦੋਂ ਹੋਵਾਂ ਮੈਂ ਉਦਾਸ |
ਇਹ ਮੇਰੀ ਏ ਤਮੰਨਾਂ,

ਰਜਨੀ ਕਿਰਤਾਂ ਦੇ ਮੁੱਲ,
ਓ ਪਾਉਣ ਵਾਲਾ ਬੈਠਾ |
ਉਹੀ ਹਿੰਮਤ ਦੇਣ ਵਾਲਾ,
ਝੰਡੇ ਝੜਾਉਣ ਵਾਲਾ ਬੈਠਾ |
ਮੈਂ ਕਿਰਤੀ ਦੀ ਜਾਈ,
ਕਿਰਤੀ ਮੇਰਾ ਲੂੰ-ਲੂੰ ਮਾਾਸ |
ਹਮੇਸ਼ਾਂ ਤੂੰ ਹੋਵੇਂ ਨਾਲ ਮੇਰੇ,
ਜਦੋਂ ਹੋਵਾਂ ਮੈਂ ਉਦਾਸ |
ਇਹ ਮੇਰੀ ਏ ਤਮੰਨਾਂ,