ਮੋਗਾ (ਪੰਜ ਦਰਿਆ ਬਿਊਰੋ) ਦਿੱਲੀ ਘੋਲ਼ ਦੇ ਸ਼ਹੀਦਾਂ ਨੂੰ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਅਤੇ ਕਿਸਾਨ ਘੋਲ਼ ਸਹਾਇਤਾ ਕਮੇਟੀ ਨਿਹਾਲ ਸਿੰਘ ਵਾਲਾ ਦੀ ਅਗਵਾਈ ਵਿੱਚ ਪਹਿਲਾਂ ਪਿੰਡਾਂ ਵਿੱਚ ਅਤੇ ਅੱਜ ਬਲਾਕ ਪੱਧਰੀ ਸਮਾਗਮ ਸਮੇਂ ਨਿਹਾਲ ਸਿੰਘ ਵਾਲਾ ਵਿਖੇ ਸ਼ਰਧਾਂਜਲੀ ਦਿੱਤੀ ਗਈ।ਕੇਂਦਰ ਦੀ ਮੋਦੀ ਹਕੂਮਤ ਵੱਲੋਂ ਪਾਸ ਕੀਤੇ ਖੇਤੀ ਵਿਰੋਧੀ ਕਾਲੇ ਕਾਨੂੰਨ, ਬਿਜਲੀ ਸੋਧ ਐਕਟ 2020 ਅਤੇ ਪਰਾਲੀ ਐਕਟ ਖਿਲਾਫ ਦਿੱਲੀ ਵਿਖੇ ਚੱਲ ਰਹੇ ਸ਼ਾਨਦਾਰ ਸੰਘਰਸ਼ ਵਿੱਚ ਆਪਣੀਆਂ ਕੀਮਤੀ ਜਿੰਦਗੀਆਂ ਵਾਰਨ ਵਾਲੇ ਬਹਾਦਰ ਸਾਥੀਆਂ ਨੂੰ ਸ਼ਰਧਾਂਜਲੀ ਸਮਾਗਮ ਸਮੇਂ ਨਿਹਾਲ ਸਿੰਘ ਵਾਲਾ ਵਿਖੇ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਦੇ ਆਗੂ ਕੁਲਦੀਪ ਕੌਰ ਕੁੱਸਾ, ਚਰਨਜੀਤ ਕੌਰ, ਸੁਦਾਗਰ ਸਿੰਘ ਖਾਈ, ਬੂਟਾ ਸਿੰਘ ਭਾਗੀਕੇ, ਇੰਦਰਮੋਹਨ ਸਿੰਘ ਪੱਤੋ, ਗੁਰਚਰਨ ਰਾਮਾਂ ,ਡੀਟੀਐੱਫ਼ ਦੇ ਅਮਨਦੀਪ ਮਾਛੀਕੇ, ਨੌਜਵਾਨ ਭਾਰਤ ਸਭਾ ਅਤੇ ਕਿਸਾਨ ਘੋਲ਼ ਸਹਾਇਤਾ ਕਮੇਟੀ ਨਿਹਾਲ ਸਿੰਘ ਵਾਲਾ ਦੇ ਕਨਵੀਨਰ ਦਰਸ਼ਨ ਸਿੰਘ ਹਿੰਮਤਪੁਰਾ, ਕਰਮ ਰਾਮਾਂ, ਗੁਰਮੁਖ ਹਿੰਮਤਪੁਰਾ, ਜਗਮੋਹਨ ਸਿੰਘ ਸੈਦੋਕੇ ਬੁਲਾਰਿਆਂ ਨੇ ਸ਼ਹੀਦੀ ਪ੍ਰਾਪਤ ਕਰਨ ਵਾਲੇ ਸਾਥੀਆਂ ਨੂੰ ਸ਼ਰਧਾਂਜਲੀ ਭੇਟ ਕਰਦਿਆਂ ਕਿਹਾ ਕਿ ਜਦੋਂ ਸਰਕਾਰਾਂ ਜੁਲਮ ਕਰਦੀਆਂ ਹਨ ਅਤੇ ਲੋਕ ਇਸ ਜ਼ਬਰ ਵਿਰੁੱਧ ਟੱਕਰ ਲੈਂਦੇ ਹਨ ਤਾਂ ਸ਼ਹੀਦੀਆਂ ਪ੍ਰਾਪਤ ਕਰਦੇ ਹਨ। ਹੁਣ ਤੱਕ ਇਸ ਸੰਘਰਸ਼ ਵਿਚ 40 ਸ਼ਹੀਦੀਆਂ ਹੋ ਚੁਕੀਆਂ ਹਨ। ਇਹਨਾਂ ਯੋਧਿਆਂ ਦੀ ਸ਼ਹੀਦੀ ਅਜਾਈਂ ਨਹੀਂ ਜਾਵੇਗੀ। ਇਹਨਾਂ ਦੀ ਸ਼ਹਾਦਤ ਦਿੱਲੀ ਮੋਰਚੇ ਦੀ ਜਿੱਤ ਦਾ ਰਾਹ ਰੌਸ਼ਨ ਕਰੇਗੀ। ਕਿਸਾਨ ਘੋਲ਼ ਨੇ ਇਹ ਸਾਬਤ ਕਰ ਦਿੱਤਾ ਹੈ ਕੇਂਦਰ ਦੀ ਮੋਦੀ ਹਕੂਮਤ ਨੂੰ ਚੁਣੌਤੀ ਦਿੱਤੀ ਜਾ ਸਕਦੀ ਹੈ,ਇਹ ਸਰਕਾਰ ਲੋਕਾਂ ਤੋਂ ਵੱਡੀ ਨਹੀਂ ਹੋ ਸਕਦੀ। ਕਾਰਪੋਰੇਟ ਘਰਾਣਿਆਂ, ਸਾਮਰਾਜੀ ਨੀਤੀਆਂ ਪ੍ਰਤੀ ਵਫ਼ਾਦਾਰੀ ਤੇ ਉੱਤਰੀ ਮੋਦੀ ਹਕੂਮਤ ਲੋਕਾਂ ਨਾਲ ਧ੍ਰੋਹ ਕਮਾ ਕੇ ਆਪਣੇ ਜ਼ਬਰੀ ਫੈਸਲੇ ਥੋਪਣ ਵਿਚ ਕਾਮਯਾਬ ਨਹੀਂ ਹੋ ਸਕਦੀ।ਪੂਰੇ ਮੁਲਕ ਪੱਧਰ ਤੇ ਉੱਠ ਰਹੀ ਲੋਕ ਆਵਾਜ਼ ਨੂੰ ਦਬਾਇਆ ਨਹੀਂ ਜਾ ਸਕਦਾ। ਪੰਜਾਬ ਦੇ ਸੰਘਰਸ਼ੀ ਲੋਕ ਅੰਬਾਨੀ ਦੀ ਜੀਓ ਕੰਪਨੀ ਦੇ ਸਿਮ ਪੋਰਟ ਕਰਵਾ ਰਹੇ ਹਨ, ਟਾਵਰਾਂ ਦੇ ਬਿਜਲੀ ਕੁਨੈਕਸ਼ਨ ਕੱਟ ਰਹੇ ਹਨ। ਲੋਕਾਂ ਦੇ ਇਸ ਆਪ ਮੁਹਾਰੇ ਵਿਰੋਧ ਤੋਂ ਇਹਨਾਂ ਲੁਟੇਰੀਆਂ ਜਮਾਤਾਂ ਦੇ ਹਾਕਮਾਂ ਤੇ ਉਹਨਾਂ ਦੇ ਪ੍ਰਭੂਆਂ ਨੂੰ ਸਬਕ ਲੈਣਾ ਚਾਹੀਦਾ ਕਿ ਲੋਕ ਲਹਿਰ ਉਹਨਾਂ ਨੂੰ ਜੜ੍ਹੋਂ ਉਖਾੜਨ ਦੀ ਤਾਕਤ ਰੱਖਦੀ ਹੈ। ਕੇਂਦਰ ਸਰਕਾਰ ਵੱਲੋਂ ਪਾਸ ਕੀਤੇ ਗਏ ਖੇਤੀ ਉਜਾੜੂ ਕਾਲੇ ਕਾਨੂੰਨ ਹਰ ਕਿਰਤੀ ਵਰਗ ਲਈ ਮੌਤ ਦੇ ਵਾਰੰਟ ਹਨ। ਜਿੰਨ੍ਹਾਂ ਤਹਿਤ ਜਨਤਕ ਵੰਡ ਪ੍ਰਣਾਲੀ ਤਬਾਹ ਕਰਕੇ, ਖੁੱਲ੍ਹੀਆਂ ਮੰਡੀਆਂ ਉਸਾਰ ਕੇ ਨਿੱਜੀਕਰਨ ਦੀਆਂ ਨੀਤੀਆਂ ਦਾ ਪੂਰਾ ਪੂਰ ਲੱਦਿਆ ਜਾ ਰਿਹਾ ਹੈ। ਆਗੂਆਂ ਨੇ ਦੱਸਿਆ ਕਿ ਦਿੱਲੀ ਵਿਖੇ ਕਿਸਾਨ ਮੋਰਚੇ ਵਿੱਚ ਸ਼ਮੂਲੀਅਤ ਕਰਨ ਲਈ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਦਾ 26 ਦਸੰਬਰ ਨੂੰ ਖਨੌਰੀ ਬਾਰਡਰ ਤੋਂ 15 ਹਜ਼ਾਰ ਦਾ ਜੱਥਾ ਅਤੇ 27 ਦਸੰਬਰ ਡੱਬਵਾਲੀ ਵਾਲੇ ਰਸਤੇ 15 ਹਜ਼ਾਰ ਦਾ ਜੱਥਾ ਰਵਾਨਾ ਹੋਵੇਗਾ।ਇਸ ਸਮੇਂ ਕਿਸਾਨ ਘੋਲ਼ ਸਹਾਇਤਾ ਕਮੇਟੀ ਨਿਹਾਲ ਸਿੰਘ ਵਾਲਾ ਤੋਂ ਕਮਲੇਸ਼ ਰਾਣੀ, ਬਰਿੰਦਰ ਕੌਰ ਰਾਮਾਂ ਅਤੇ ਸੁਖਮੰਦਰ ਨਿਹਾਲ ਸਿੰਘ ਵਾਲਾ, ਸੁਖਮੰਦਰ ਰਣਸੀਂਹ, ਮਹਿੰਦਰ ਕੌਰ, ਪਰਮਜੀਤ ਕੌਰ ਰਣਸੀਂਹ ਖੁਰਦ ਪੱਤੋ, ਮਨਪ੍ਰੀਤ ਸਿੰਘ ਲੋਪੋਂ ਹਾਜ਼ਰ ਸਨ।
