ਗਲਾਸਗੋ/ਲੰਡਨ (ਮਨਦੀਪ ਖੁਰਮੀ ਹਿੰਮਤਪੁਰਾ)
ਯੂਕੇ ਇਸ ਸਮੇਂ ਕੋਰੋਨਾਂ ਵਾਇਰਸ ਦੀ ਲਾਗ ਦੇ ਫੈਲਣ ਦਾ ਸਾਹਮਣਾ ਕਰ ਰਿਹਾ ਹੈ। ਇਸ ਨੂੰ ਰੋਕਣ ਦੇ ਯਤਨਾਂ ਵਿੱਚ ਸਰਕਾਰ ਵੱਲੋਂ ਕਈ ਨਵੇਂ ਪਾਬੰਦੀਆਂ ਵਾਲੇ ਨਿਰਦੇਸ਼ ਵੀ ਜਾਰੀ ਕੀਤੇ ਗਏ ਹਨ। ਦੇਸ਼ ਦੀ ਵਾਇਰਸ ਸੰਬੰਧੀ ਚਿੰਤਾਜਨਕ ਹਾਲਤ ਨੂੰ ਦੇਖਦੇ ਹੋਇਆ ਸੁਰੱਖਿਆ ਕਾਰਨਾਂ ਕਰਕੇ ਕਈ ਯੂਰਪੀਅਨ ਦੇਸ਼ਾਂ ਨੇ ਬ੍ਰਿਟੇਨ ਤੋਂ ਆਉਣ ਵਾਲੇ ਲੋਕਾਂ ਤੇ ਅਸਥਾਈ ਯਾਤਰਾ ਪਾਬੰਦੀਆਂ ਲਗਾਈਆਂ ਹਨ। ਇਹਨਾਂ ਦੇਸਾਂ ਵਿੱਚ ਆਇਰਲੈਂਡ, ਜਰਮਨੀ, ਫਰਾਂਸ, ਇਟਲੀ, ਨੀਦਰਲੈਂਡਜ਼ ਅਤੇ ਬੈਲਜੀਅਮ ਆਦਿ ਯੂਕੇ ਤੋਂ ਆਉਣ ਵਾਲੀਆਂ ਸਾਰੀਆਂ ਉਡਾਣਾਂ ਰੋਕ ਰਹੇ ਹਨ। ਇਸ ਸੰਬੰਧੀ ਸੋਮਵਾਰ ਨੂੰ ਯੂਰਪੀਅਨ ਯੂਨੀਅਨ ਦੀ ਬੈਠਕ ਵਿੱਚ ਹੋਰ ਵਿਚਾਰ ਵਟਾਂਦਰੇ ਕੀਤੇ ਵੀ ਜਾਣਗੇ।ਇਸ ਸਮੇਂ ਵਾਇਰਸ ਦੀ ਲਾਗ ਲੰਡਨ ਅਤੇ ਦੱਖਣ-ਪੂਰਬੀ ਇੰਗਲੈਂਡ ਵਿੱਚ ਤੇਜ਼ੀ ਨਾਲ ਫੈਲ ਰਹੀ ਹੈ ਜਦਕਿ ਪ੍ਰਧਾਨ ਮੰਤਰੀ ਬੋਰਿਸ ਜੌਹਨਸਨ ਨੇ ਇਸ ਕਾਬੂ ਤੋਂ ਬਾਹਰ ਹੋ ਰਹੀ ਸਥਿਤੀ ਨਾਲ ਨਜਿੱਠਣ ਲਈ ਸ਼ਨੀਵਾਰ ਨੂੰ ਲੱਖਾਂ ਲੋਕਾਂ ਲਈ ਕ੍ਰਿਸਮਸ ਦੇ ਅਰਸੇ ਦੌਰਾਨ ਨਿਯਮਾਂ ਵਿੱਚ ਯੋਜਨਾਬੱਧ ਢਿੱਲ ਨੂੰ ਖਤਮ ਕਰਦਿਆਂ ਲੈਵਲ ਚਾਰ ਦੀਆਂ ਪਾਬੰਦੀ ਲਾਗੂ ਕੀਤੀਆਂ ਹਨ। ਯੂਕੇ ਦੁਆਰਾ ਸ਼ਨੀਵਾਰ ਨੂੰ ਟੀਅਰ 4 ਪਾਬੰਦੀਆਂ ਦੀ ਘੋਸ਼ਣਾ ਦੇ ਬਾਅਦ ਨੀਦਰਲੈਂਡਜ਼ ਸਰਕਾਰ ਨੇ ਐਲਾਨ ਕੀਤਾ ਕਿ 1 ਜਨਵਰੀ ਤੱਕ ਯੂਕੇ ਤੋਂ ਸਾਰੀਆਂ ਯਾਤਰੀਆਂ ਦੀਆਂ ਉਡਾਣਾਂ ‘ਤੇ ਪਾਬੰਦੀ ਲਗਾਈ ਜਾਵੇਗੀ ਅਤੇ ਇਸਦੇ ਨਾਲ ਹੀ ਫਰਾਂਸ ਨੇ ਵੀ ਐਤਵਾਰ ਅੱਧੀ ਰਾਤ ਤੋਂ 48 ਘੰਟਿਆਂ ਲਈ ਯੂਕੇ ਨਾਲ ਆਪਣੇ ਸਾਰੇ ਯਾਤਰਾ ਲਿੰਕਾਂ ਨੂੰ ਮੁਅੱਤਲ ਕਰ ਦਿੱਤਾ ਹੈ। ਫਰਾਂਸ ਦੀ ਪਾਬੰਦੀ ਦੇ ਨਾਲ ਯੂਰੋਟਨਲ ਨੇ ਵੀ ਇਸ ਦੇ ਫੋਕੈਸਟੋਨ ਟਰਮੀਨਲ ਤੱਕ ਜਾਣ ਵਾਲੇ ਟ੍ਰੈਫਿਕ ਨੂੰ ਬੰਦ ਕਰਨ ਦੀ ਗੱਲ ਕਹੀ ਹੈ।ਇਹਨਾਂ ਦੇਸ਼ਾਂ ਸਮੇਤ ਕਈ ਦੂਜੇ ਯੂਰਪੀਅਨ ਰਾਸ਼ਟਰਾਂ ਨੇ ਵੀ ਵਾਇਰਸ ਤੋਂ ਆਪਣਾ ਬਚਾਅ ਕਰਨ ਲਈ ਇਹ ਪਾਬੰਦੀਆਂ ਲਾਗੂ ਕੀਤੀਆਂ ਹਨ।
