ਗਲਾਸਗੋ/ਲੰਡਨ (ਮਨਦੀਪ ਖੁਰਮੀ ਹਿੰਮਤਪੁਰਾ)
ਕੋਰੋਨਾਂ ਵਾਇਰਸ ਦੀ ਲਾਗ ਵਿੱਚ ਹੋ ਰਹੇ ਵਾਧੇ ਨੇ ਇੱਕ ਵਾਰ ਫਿਰ ਇੰਗਲੈਂਡ ਦੇ ਸਿਹਤ ਵਿਭਾਗ ਲਈ ਸਮੱਸਿਆ ਪੈਦਾ ਕਰ ਦਿੱਤੀ ਹੈ।ਕੋਰੋਨਾਂ ਦੇ ਮਰੀਜ਼ਾਂ ਦੀ ਵਧ ਰਹੀ ਗਿਣਤੀ ਨਾਲ ਇੰਗਲੈਂਡ ਦੇ ਹਸਪਤਾਲਾਂ ਵਿੱਚ 90 ਪ੍ਰਤੀਸ਼ਤ ਦੇ ਕਰੀਬ ਬਿਸਤਰੇ ਮਰੀਜ਼ਾਂ ਨਾਲ ਭਰੇ ਹੋਏ ਹਨ। ਜਿਸ ਨਾਲ ਹਸਪਤਾਲਾਂ ਨੂੰ ਕੋਰੋਨਾਂ ਵਾਇਰਸ ਦੇ ਮਰੀਜ਼ਾਂ ਦੀ ਵੱਧ ਰਹੀ ਗਿਣਤੀ ਨਾਲ ਇਲਾਜ ਕਰਨ ਕਰਨ ਵਿੱਚ ਸਮੱਸਿਆ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਸਿਹਤ ਵਿਭਾਗ ਦੇ ਅੰਕੜਿਆਂ ਅਨੁਸਾਰ ਇੰਗਲੈਂਡ ਦੇ ਹਸਪਤਾਲਾਂ ਵਿੱਚ 16 ਦਸੰਬਰ ਨੂੰ ਕੋਵਿਡ -19 ਦੇ ਮਰੀਜ਼ਾਂ ਦੀ ਕੁੱਲ ਗਿਣਤੀ 15,465 ਦਰਜ਼ ਕੀਤੀ ਗਈ ਜੋ ਕਿ ਇੱਕ ਹਫਤੇ ਪਹਿਲਾਂ 13,467 ਸੀ। ਐਨ ਐਚ ਐਸ ਇੰਗਲੈਂਡ ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ, 13 ਦਸੰਬਰ ਨੂੰ ਖ਼ਤਮ ਹੋਏ ਹਫ਼ਤੇ ਦੌਰਾਨ ਇੰਗਲੈਂਡ ਦੇ ਹਸਪਤਾਲਾਂ ਦੇ ਬੈੱਡਾਂ ਦੀ ਗਿਣਤੀ ਲੱਗਭਗ 89 ਪ੍ਰਤੀਸ਼ਤ ਤੱਕ ਪਹੁੰਚ ਗਈ ਸੀ। ਇਸਦੇ ਨਾਲ ਹੀ ਰਾਜਧਾਨੀ ਲੰਡਨ ਵਿੱਚ ਵਾਇਰਸ ਦੀ ਲਾਗ ਦੇ ਤੇਜ਼ੀ ਨਾਲ ਵਧਣ ਕਾਰਨ 16 ਦਸੰਬਰ ਨੂੰ ਲੱਗਭਗ 2,543 ਕੋਵਿਡ -19 ਮਰੀਜ਼ ਦਰਜ ਕੀਤੇ ਗਏ ਸਨ, ਜੋ ਕਿ ਇੱਕ ਹਫ਼ਤੇ ਪਹਿਲਾਂ 1,787 ਸਨ, ਜਿਸਦੇ ਨਾਲ ਰਾਜਧਾਨੀ ਵਿੱਚ ਹਸਪਤਾਲਾਂ ਦੇ ਬਿਸਤਰੇ ਮਰੀਜਾਂ ਨਾਲ ਭਰ ਰਹੇ ਹਨ। ਇਸ ਸੰਬੰਧੀ ਅੰਕੜਿਆਂ ਅਨੁਸਾਰ ਲੰਡਨ ਦੇ ਐਨ ਐਚ ਐਸ ਟਰੱਸਟ ਦੇ ਹਸਪਤਾਲਾਂ ਵਿੱਚ 13 ਦਸੰਬਰ ਨੂੰ ਖ਼ਤਮ ਹੋਏ ਹਫ਼ਤੇ ਵਿੱਚ ਬੈੱਡਾਂ ਦੀ ਔਸਤ 95.4 ਪ੍ਰਤੀਸ਼ਤ ਸੀ, ਜਿਸਦੇ ਤਹਿਤ ਲੇਵਿਸ਼ਮ ਅਤੇ ਗ੍ਰੀਨਵਿਚ ਦੇ ਹਸਪਤਾਲਾਂ ਵਿੱਚ 95.8 ਪ੍ਰਤੀਸ਼ਤ ਅਤੇ ਕਿੰਗਜ਼ ਕਾਲਜ ਹਸਪਤਾਲ ਵਿੱਚ ਮਰੀਜ਼ਾਂ ਨਾਲ ਭਰੇ ਬਿਸਤਰਿਆਂ ਦੀ ਦਰ 96.8% ਦਰਜ਼ ਕੀਤੀ ਗਈ ਸੀ। ਮਰੀਜ਼ਾ ਦੀ ਵਧ ਰਹੀ ਗਿਣਤੀ ਨਾਲ ਸਾਹਮਣੇ ਆ ਰਹੀ ਇਸ ਸਮੱਸਿਆ ਤੋਂ ਬਚਾਅ ਲਈ ਰਾਇਲ ਕਾਲਜ ਆਫ਼ ਐਮਰਜੈਂਸੀ ਮੈਡੀਸਨ ਦੇ ਸਿਹਤ ਮਾਹਿਰਾਂ ਨੇ ਜਨਤਾ ਨੂੰ ਤਿਉਹਾਰਾਂ ਦੇ ਦਿਨਾਂ ਦੌਰਾਨ ਸਾਵਧਾਨ ਰਹਿਣ ਦੀ ਅਪੀਲ ਕੀਤੀ ਹੈ।
