ਅਸ਼ੋਕ ਵਰਮਾ
ਬਠਿੰਡਾ,7ਨਵੰਬਰ2020:ਬਠਿੰਡਾ ਪੁਲਿਸ ਦੇ ਸੀਆਈਏ ਸਟਾਫ ਵਨ ਵੱਲੋਂ ਸ਼ੁੱਕਰਵਾਰ ਨੂੰ ਹਰਿਆਣਾ ਨਾਲ ਲੱਗਦੇ ਪਿੰਡ ਡੰੂਮਵਾਲੀ ਲਾਗਿਓ ਗਿ੍ਰਫਤਾਰ ਮੁਲਜਮਾਂ ਨੇ ਨਕਲੀ ਨੋਟ ਛਾਪਣ ਦੀ ਤਕਨੀਕ ਯੂਟਿਊਬ ਤੋਂ ਹਾਸਲ ਕੀਤੀ ਸੀ। ਪੁਲਿਸ ਵੱਲੋਂ ਸਾਢੇ ਨੌਂ ਲੱਖ ਦੀ ਫਰਜੀ ਕਰੰਸੀ ਤੋਂ ਇਲਾਵਾ ਪਰਿੰਟਰ ਅਤੇ ਸਿਆਹੀ ਸਮੇਤ ਗਿ੍ਰਫਤਾਰ ਕੀਤੇ ਮੁਲਜਮ ਸੋਨੂੰ ਕੁਮਾਰ ਅਤੇ ਪੰਕਜ ਸ਼ਰਮਾ ਵਾਸੀ ਡੱਬਵਾਲੀ ਜਿਲ੍ਹਾ ਸਿਰਸਾ ਤੋਂ ਮੁਢਲੀ ਪੁੱਛ ਪੜਤਾਲ ਦੌਰਾਨ ਇਹ ਤੱਥ ਸਾਹਮਣੇ ਆਏ ਹਨ। ਪੁੱਛਗਿਛ ਦੌਰਾਨ ਇਹ ਵੀ ਭੇਦ ਖੁਲਿਆ ਹੈ ਕਿ ਮੁਲਜਮ ਪੰਕਜ ਸ਼ਰਮਾ ਕਰੀਬ ਸੱਤ ਲੱਖ ਦਾ ਕਰਜਈ ਸੀ ਜਿਸ ਕਰਕੇ ਉਸ ਨੇ ਕਰਜਾ ਲਾਹੁਣ ਲਈ ਦੇਸ਼ ਧਰੋਹ ਵਰਗਾ ਇਹ ਸੰਗੀਨ ਅਪਰਾਧ ਕਰਨ ਵਾਲਾ ਰਾਹ ਫੜ ਲਿਆ। ਮੁਲਜਮਾਂ ਨੇ ਪੁਲਿਸ ਕੋਲ ਇਹ ਵੀ ਮੰਨਿਆ ਹੈ ਕਿ ਉਹਨਾਂ ਨੇ ਨਕਲੀ ਨੋਟ ਛਾਪਣ ਲਈ ਕਾਗਜ਼ ਆਨਲਾਈਨ ਖਰੀਦਦਾਰੀ ਰਾਹੀਂ ਮੰਗਵਾਇਆ ਸੀ।
ਪੁਲਿਸ ਹੁਣ ਇਹ ਪਤਾ ਲਾਉਣ ’ਚ ਜੁਟ ਗਈ ਹੈ ਕਿ ਇਹ ਖਰੀਦ ਕਿਸ ਕੰਪਨੀ ਰਾਹੀਂ ਕੀਤੀ ਹੈ। ਇਸ ਤੋਂ ਬਿਨਾਂ ਕਾਗਜ ਦੀ ਕੀਤੀ ਜਾਣ ਵਾਲੀ ਅਦਾਇਗੀ ਬਾਰੇ ਵੀ ਪੜਤਾਲਿਆ ਜਾਣਾ ਹੈ। ਅੱਜ ਐਸਪੀ ਡੀ ਗੁਰਵਿੰਦਰ ਸਿੰਘ ਸੰਘਾ ਅਤੇ ਸੀਆਈਏ ਸਟਾਫ ਵਨ ਦੇ ਇੰਚਾਰਜ ਇੰਸਪੈਕਟਰ ਅੰਮਿ੍ਰਤਪਾਲ ਸਿੰਘ ਭਾਟੀ ਨੇ ਪ੍ਰੈਸ ਕਾਨਫਰੰਸ ਕਰਕੇ ਪੁਲਿਸ ਨੂੰ ਮਿਲੀ ਸਫਲਤਾ ਬਾਰੇ ਖੁਲਾਸਾ ਕੀਤਾ ਹੈ। ਉਹਨਾਂ ਦੱਸਿਆ ਕਿ ਦੋਵਾਂ ਮੁਲਜਮਾਂ ਚੋਂ ਇੱਕ ਜੁੱਤੀਆਂ ਵਗੈਰਾ ਬਨਾਉਣ ਦਾ ਕੰਮ ਕਰਦਾ ਹੈ ਜਦੋਂਕਿ ਦੂਸਰੇ ਦੀ ਧਾਰਮਿਕ ਪੁਸਤਕਾਂ ਦੀ ਦੁਕਾਨ ਹੈ। ਉਹਨਾਂ ਦੱਸਿਆ ਕਿ ਪੰਕਜ ਜਲਦੀ ਤੋਂ ਜਲਦੀ ਕਰਜਾ ਲਾਹੁਣਾ ਚਾਹੁੰਦਾ ਸੀ ਜਿਸ ਕਰਕੇ ਉਹ ਇਸ ਦਲਦਲ ’ਚ ਫਸ ਗਿਆ । ਉਹਨਾਂ ਦੱਸਿਆ ਕਿ ਮੁਲਜਮਾਂ ਨੇ ਹਾਲ ਤੱਕ ਪੈਟਰੋਲ ਪੰਪਾਂ ਜਾਂ ਦੁਕਾਨਾਂ ਆਦਿ ਤੇ ਥੋਹੜੇ ਜਿਹੇ ਜਾਅਲੀ ਨੋਟ ਚਲਾਏ ਹਨ।
ਉਹਨਾਂ ਦੱਸਿਆ ਕਿ ਲੱਖਾਂ ਰੁਪਏ ਦੀ ਨਕਲੀ ਕਰੰਸੀ ਲੈ ਕੇ ਬਠਿੰਡਾ ਵੱਲ ਆਉਣ ਸਬੰਧੀ ਮਿਲੀ ਗੁਪਤ ਸੂਚਨਾਂ ਦੇ ਅਧਾਰ ਤੇ ਦਬੋਚ ਲਿਆ। ਉਹਨਾਂ ਦੱਸਿਆ ਕਿ ਪੁਲਿਸ ਨੇ ਮੁਲਜਮਾਂ ਦੀ ਨਿਸ਼ਾਨਦੇਹੀ ਤੇ ਰੰਗਦਾਰ ਸਕੈਨਰ ਆਦਿ ਵੀ ਬਰਾਮਦ ਕੀਤਾ ਹੈ। ਐਸਪੀ ਨੇ ਦੱਸਿਆ ਕਿ ਮੁਲਜਮਾਂ ਕੋਲੋਂ 2 ਹਜਾਰ,5 ਸੌ,2 ਸੌ ਅਤੇ ਸੌ ਰੁਪਏ ਦੇ ਨੋਟ ਮਿਲੇ ਹਨ। ਉਹਨਾਂ ਦੱਸਿਆ ਕਿ ਅਸਲ ’ਚ ਉਹਨਾਂ ਦਹ ਮਨਸ਼ਾ ਤਿਉਹਾਰਾਂ ਦੇ ਦਿਨਾਂ ’ਚ ਜਾਲੀ ਨੋਟ ਚਲਾਉਣ ਦੀ ਸੀ ਕਿਉਂਕਿ ਭੀੜਭਾੜ ਹੋਣ ਕਾਰਨ ਬਹੁਤਾ ਸ਼ੱਕ ਵੀ ਨਹੀਂ ਪੈਂਦਾ ਹੈ। ਐਸਪੀ ਨੇ ਦੱਸਿਆ ਕਿ ਥਾਣਾ ਸੰਗਤ ’ਚ ਇਸ ਸਬੰਧੀ ਮੁਲਜਮ ਪੰਕਜ ਸ਼ਰਮਾ ਪੁੱਤਰ ਜਸਪਾਲ ਅਤੇ ਸੋਨੂੰ ਕੁਮਾਰ ਪੁੱਤਰ ਨੰਦ ਰਾਮ ਵਾਸੀ ਡੱਬਵਾਲੀ ਹਰਿਆਣਾ ਨੂੰ ਨਾਮਜਦ ਕੀਤਾ ਗਿਆ ਹੈ। ਉਹਨਾਂ ਦੱਸਿਆ ਕਿ ਪੁਲਿਸ ਹੁਣ ਮੁਲਜਮਾਂ ਕੋਲੋਂ ਹਰ ਪੱਖ ਤੋਂ ਡੂੰਘਾਈ ਨਾਲ ਪੁੱਛਗਿੱਤ ਕਰੇਗੀ ।
