ਰਜਨੀ ਵਾਲੀਆ
ਮੈਂ ਬੱਦਲ ਗਮ ਦਾ ਵਰਦਾ ਤੱਕਿਐ,
ਨੀ ਮੈਂ ਹੰਝੂ ਨੈਣੀਂ ਤਰਦਾ ਤੱਕਿਐ |
ਕਦੇ ਬਾਲ ਨਿਆਣਾਂ ਰੋੜੀ ਕੁੱਟਦੈ,
ਤੇ ਕਦੇ ਠੰਡ ਚ ਠਰ-ਠਰ ਠਰਦਾ ਤੱਕਿਐ |
ਮਿਹਨਤ ਕਰਦਾ ਨਾਲੇ ਠੇਡੇ ਖਾਂਦਾ,
ਗਰੀਬੜਾ ਸਭ ਦੀ ਜਰਦਾ ਤੱਕਿਐ |
ਬਿਮਾਰੀ ਨਾਲ ਲੜਦੈ ਝੁੱਗੀਆਂ ਥੱਲੇ,
ਗਰੀਬ ਪਿਆ ਮੈਂ ਮਰਦਾ ਤੱਕਿਐ |
ਅਮੀਰਜਾਦਾ ਦੁਨੀਆ ਜਿੱਤਣ ਵਾਲਾ,
ਬਿਮਾਰੀ ਦੇ ਹੱਥੋਂ ਮੈਂ ਹਰਦਾ ਤੱਕਿਐ |
ਮਨਾਵੇ ਰੌਸ਼ਨੀਆਂ ਨਾਲ ਅਮੀਰ ਦੀਵਾਲੀ,
ਬਾਰ ਬਿਨ ਦੀਵੇ ਗਰੀਬ ਦੇ ਘਰ ਦਾ ਤੱਕਿਐ |
ਅਮੀਰ ਹਨੇਰੇ ਤੋਂ ਵੀ ਖੌਫ ਨਾ ਖਾਵੇ,
ਗਰੀਬ ਤਾਂ ਚਾਨਣ ਤੋਂ ਵੀ ਡਰਦਾ ਤੱਕਿਐ |
ਰਜਨੀ ਅਮੀਰ ਦੇ ਕੁੱਤੇ ਵੀ ਰੱਜਕੇ ਖਾਂਦੇ,
ਬਿਨ ਰੋਟੀ ਗਰੀਬ ਦਾ ਸਰਦਾ ਤੱਕਿਐ |
