ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ)
ਕੋਰੋਨਾ ਵਾਇਰਸ ਮਹਾਂਮਾਰੀ ਮਨੁੱਖਤਾ ਲਈ ਪ੍ਰਕੋਪ ਸਾਬਿਤ ਹੋ ਰਹੀ ਹੈ।ਇਸਨੇ ਕੰਮ ਦੇ ਕਈ ਖੇਤਰਾਂ ਨੂੰ ਵਿਨਾਸ਼ ਦੇ ਕੰਢੇ ‘ਤੇ ਲੈ ਆਂਦਾ ਹੈ। ਇਸਦੇ ਉੱਪਰ ਕਾਬੂ ਪਾਉਣ ਲਈ ਕੀਤੀ ਤਾਲਾਬੰਦੀ ਕਰਕੇ ਸੰਸਾਰ ਭਰ ਵਿੱਚ ਸੈਂਕੜੇ ਲੋਕ ਆਪਣੀਆਂ ਨੌਕਰੀਆਂ ਗਵਾ ਚੁੱਕੇ ਹਨ ਅਤੇ ਕਈ ਹੋਰਾਂ ‘ਤੇ ਇਹ ਖਤਰਾ ਮੰਡਰਾ ਰਿਹਾ ਹੈ। ਇਸੇ ਮਾਰ ਤਹਿਤ ਹੁਣ ਇਹ ਖਦਸ਼ਾ ਪ੍ਰਗਟ ਕੀਤਾ ਜਾ ਰਿਹਾ ਹੈ ਕਿ ਯੂਕੇ ਵਿੱਚ 2020 ਦੇ ਅੰਤ ਤਕ ਪਰਾਹੁਣਚਾਰੀ ਖੇਤਰ ਵਿਚ 500,000 ਤੋਂ ਵੱਧ ਨੌਕਰੀਆਂ ਦੀ ਘਾਟ ਹੋ ਸਕਦੀ ਹੈ। ਇਸ ਉਦਯੋਗ ਦੇ ਮਾਹਰਾਂ ਨੇ ਸੰਸਦ ਮੈਂਬਰਾਂ ਨੂੰ ਉਨ੍ਹਾਂ ਦੇ ਇਸ ਡਰ ਬਾਰੇ ਸੂਚਿਤ ਕੀਤਾ ਹੈ। ਸਥਾਨਕ ਲਾਕਡਾਊਨ ਕਰਕੇ ਰਾਤ ਦੇ 10 ਵਜੇ ਦਾ ਕਰਫਿਊ ਅਤੇ ਹੋਰ ਪਾਬੰਦੀਆਂ ਪੱਬਾਂ, ਬਾਰਾਂ ਅਤੇ ਰੈਸਟੋਰੈਂਟਾਂ ਦੇ ਵਪਾਰ ਨੂੰ ਪ੍ਰਭਾਵਤ ਕਰ ਰਹੀਆਂ ਹਨ। ਇਸ ਉਦਯੋਗ ਦੀ ਮੁੱਖ ਕਾਰਜਕਰਤਾ ਕੇਟ ਨਿਕੋਲਸ ਨੇ ਹਾਸਪਿਟਾਲਿਟੀ ਖੇਤਰ ਨੂੰ ਆਰਥਿਕਤਾ ਦੀ ਰੀੜ ਦੀ ਹੱਡੀ ਦੱਸਿਆ ਹੈ। ਉਸ ਅਨੁਸਾਰ ਇਹ ਇੱਕ ਬਹੁਤ ਵੱਡਾ ਖ਼ਤਰਾ ਹੈ ਜਿਸ ਨਾਲ ਅਸੀਂ ਆਰਥਿਕਤਾ ਦੇ ਵੱਡੇ ਹਿੱਸੇ ਨੂੰ ਗੁਆ ਦੇਵਾਂਗੇ।
