ਜੱਗਾ ਗਿੱਲ ਸਾਫੂਵਾਲਾ
ਜੇ ਚੱਲਿਆ ਵਤਨਾਂ ਨੂੰ ਵੀਰਾ
ਪਿੰਡ ਮੇਰੇ ਵੱਲ ਹੋ ਕੇ ਆਵੀਂ
ਜਿਸ ਮਿੱਟੀ ਵਿੱਚ ਹੱਸੇ ਖੇਡੇ
ਨਾਲ ਮੱਥੇ ਦੇ ਛੋਹ ਕੇ ਆਵੀਂ
ਜੇ ਚੱਲਿਆ ਵਤਨਾਂ ਨੂੰ …
ਦੱਸੀਂ ਆ ਕੇ ਸਾਰੀਆਂ ਗੱਲਾਂ
ਪਿੰਡ ਮੇਰੇ ਜੋ ਵੇਖ ਕੇ ਆਇਆ
ਮੇਰੇ ਯਾਰਾਂ ਬੇਲੀਆਂ ਦੇ ਨਾਲ
ਬਹਿ ਜੇ ਧੂਣੀਂ ਸੇਕ ਕੇ ਆਇਆ
ਮੇਰੇ ਲਈ ਵੀ ਥੋੜਾ ਜਿਹਾ ਨਿੱਘ
ਬੁੱਕਲ ਵਿੱਚ ਸਮੋ ਕੇ ਲਿਆਵੀਂ
ਜੇ ਚੱਲਿਆ ਵਤਨਾਂ ਨੂੰ ….
ਜਾਵੀਂ ਪਿੰਡ ਦੇ ਗੁਰੂ ਦੁਆਰੇ
ਨਾਲ ਅਦੁਬ ਦੇ ਸ਼ੀਸ ਝੁਕਾਵੀਂ
ਤੂੰ ਮੇਰੇ ਲਈ ਬਜ਼ੁਰਗਾਂ ਕੋਲੋ
ਵੀਰਾ ਕੋਈ ਅਸੀਸ ਲਿਆਵੀਂ
ਕਿੰਨਾ ਮੈਨੂੰ ਯਾਦ ਨੇ ਕਰਦੇ
ਸੀਨੇ ਸੱਜਣਾਂ ਟੋਹ ਕੇ ਆਵੀਂ
ਜੇ ਚੱਲਿਆ ਵਤਨਾਂ ਨੂੰ …
ਘਰ ਸਾਡੇ ਦੇ ਵਿਹੜੇ ਅੰਦਰ
ਮਾਂ ਮੇਰੀ ਜੇ ਤੈਨੂੰ ਨਜ਼ਰੀਂ ਆਵੇ
ਪੈਰਾਂ ਨੂੰ ਹੱਥ ਲਾ ਬੇਬੇ ਦੇ
ਘੁੱਟ ਕੇ ਲੈ ਲਈ ਵਿੱਚ ਕਲਾਵੇ
ਜੱਗੇ ਗਿੱਲ ਮਰਜਾਣੇ ਦੇ ਲਈ
ਜੇਬਾਂ ਭਰ ਕੇ ਮੋਹ ਲਿਆਵੀਂ
ਜੇ ਚੱਲਿਆ ਵਤਨਾਂ ਨੂੰ ਵੀਰਾ
ਪਿੰਡ ਮੇਰੇ ਵੱਲ ਹੋ ਕੇ ਆਵੀਂ
ਜਿਸ ਮਿੱਟੀ ਵਿੱਚ ਹੱਸੇ ਖੇਡੇ
ਨਾਲ ਮੱਥੇ ਦੇ ਛੋਹ ਕੇ ਆਵੀਂ
ਜੇ ਚੱਲਿਆ …. ਵੀਰਾ ਵੇ ?
