ਵੇ ਤੇਰਾ ਚੇਤਾ

ਰਜਨੀ ਵਾਲੀਅਾ, ਕਪੂਰਥਲਾ

ਮੈਨੂੰ ਤੇਰਾ ਚੇਤਾ ਹੁਣੇਂ-ਹੁਣੇਂ ਆ ਕੇ ਗਿਆ ਏ,
ਹਾਏ ਮਿਲਜਾ ਵੇ ਦੁੱਖ ਤੇਰਾ ਖਾ ਕੇ ਗਿਆ ਏ,
ਮੈਨੂੰ ਤੇਰਾ ਚੇਤਾ ਹੁਣੇਂ-ਹੁਣੇਂ ਆ ਕੇ ਗਿਆ ਏ |

ਜਿੰਨਾਂ ਕਰਦੀ ਮੈਂ ਤੇਰਾ ਓਨਾਂ ਕਰਦਾ ਏਂ ਤੂੰ,
ਵੇ ਹੌਕਾ ਜੇ ਮੈਂ ਭਰਾਂ ਪੀੜਾਂ ਜਰਦਾ ਏਂ ਤੂੰ,
ਰਾਤ ਰੋਣੇਂ ਨੂੰ ਕੋਈ ਮਨਾ ਕੇ ਗਿਆ ਏ |
ਮੈਨੂੰ ਤੇਰਾ ਚੇਤਾ ਹੁਣੇਂ-ਹੁਣੇਂ ਆ ਕੇ ਗਿਆ ਏ ,

ਮਿਲਿਅਾ ਤੂੰ ਐਂਵੇ ਨਈਂ ਗੱਲ ਕੋਈ ਜਰੂਰ ਏ,
ਕੋਈ ਹੋਵੇ ਨਾ ਹੋਵੇ ਰੱਬਾ ਵੱਲ ਕੋਈ ਜਰੂਰ ਏ,
ਦੁੱਖ ਦੀ ਕੋਈ ਰਗ ਨੂੰ ਦਬਾ ਕੇ ਗਿਆ ਏ |
ਮੈਨੂੰ ਤੇਰਾ ਚੇਤਾ ਹੁਣੇਂ-ਹੁਣੇਂ ਆ ਕੇ ਗਿਆ ਏ ,

ਦੂਰ ਏਂ ਤੂੰ ਮੈਥੋਂ ਬੜਾ ਮਨ ਸਮਝਾਨੀ ਆਂ,
ਰੋਜ਼ ਬੁਰਕੀਆਂ ਦੋ ਤੇਰੇ ਨਾਂ ਦੀਆਂ ਖਾਨੀ ਆਂ,
ਕੋਈ ਨੀਂਦ ਵਿੱਚ ਮੈਨੂੰ ਸਮਝਾ ਕੇ ਗਿਆ ਏ |
ਮੈਨੂੰ ਤੇਰਾ ਚੇਤਾ ਹੁਣੇਂ-ਹੁਣੇਂ ਆ ਕੇ ਗਿਆ ਏ ,

ਆਜਾ ਮਾਹੀ ਸੋਹਣਿਅਾਂ ਵੇ ਤੈਨੂੰ ਰਹਾਂ ਟੋਲਦੀ,
ਘਰ ਦਿਲ ਦਾ ਏ ਤੇਰਾ ਮੈਂ ਤਾਂ ਨਹੀਂ ਕੁੰਡਾ ਖੋਲਦੀ
ਬਾਗੀਂ ਦਿਲ ਦੇ ਕੋਈ ਅੱਜ ਫੇਰਾ ਪਾ ਕੇ ਗਿਆ ਏ
ਮੈਨੂੰ ਤੇਰਾ ਚੇਤਾ ਹੁਣੇਂ-ਹੁਣੇਂ ਆ ਕੇ ਗਿਆ ਏ ,

ਤੇਹ ਕਿੰਨਾਂ ਤੇਰੇ ਨਾਲ ਬੋਲਣਾਂ ਵੀ ਔਖਾ ਏ,
ਹੱਟ ਇਸ਼ਕੇ ਦੀ ਵੜ ਮੋਹ ਤੋਲਣਾ ਵੀ ਔਖਾ ਏ,
ਕੋਈ ਲੱਭ ਕੇ ਗਿਆ ਕੋਈ ਗਵਾ ਕੇ ਗਿਆ ਏ |
ਮੈਨੂੰ ਤੇਰਾ ਚੇਤਾ ਹੁਣੇਂ-ਹੁਣੇਂ ਆ ਕੇ ਗਿਆ ਏ ,

ਰਜਨੀ ਨੇ ਤੇਰੇ ਹਿੱਸੇ ਸਾਹਾਂ ਦੀ ਸੌਗਾਤ ਰੱਖੀ,
ਤੇਰੇ ਨਾਲ ਬੈਠਣੇਂ ਨੂੰ ਉਹਨੇ ਇੱਕ ਰਾਤ ਰੱਖੀ,
ਹੰਝੂਆਂ ਨਾ ਮੁੱਖ ਕੋਈ ਧਵਾ ਕੇ ਗਿਆ ਏ |
ਮੈਨੂੰ ਤੇਰਾ ਚੇਤਾ ਹੁਣੇਂ-ਹੁਣੇਂ ਆ ਕੇ ਗਿਆ ਏ ,