ਜੀਅ ਲੱਗਣਾ ਨਈਂ ਤੇਰਾ

ਦੁੱਖਭੰਜਨ ਰੰਧਾਵਾ
0351920036369

ਜੀਅ ਲੱਗਣਾ ਨਈਂ ਤੇਰਾ,
ਜੀਅ ਲੱਗਣਾ ਨਈਂ ਮੇਰਾ |
ਦਿਨੇਂ ਦਿਸਣੈਂ ਹਨੇਰਾ,
ਰਾਤੀਂ ਦਿਸਣੈਂ ਸਵੇਰਾ |
ਜੀਅ ਲੱਗਣਾ ਨਈਂ ਤੇਰਾ,
ਜੀਅ ਲੱਗਣਾ ਨਈਂ ਮੇਰਾ |

ਕੋਈ ਪੁੱਛ ਕੇ ਤਾਂ ਦੱਸੋ,
ਉਹਦੇ ਆਊਣ ਦੀ ਤਰੀਕ |
ਮਰਨੋਂ ਪਹਿਲਾਂ ਮਿਲ ਜਾਵੇ,
ਮੈਨੂੰ ਬੜੀ ਏ ਉਡੀਕ |
ਹੁਣ ਭੁੱਲਦਾ ਕਿਉਂ ਨਈਂ,
ਚੰਨ ਜਿਆ ਤੇਰਾ ਚਿਹਰਾ |
ਜੀਅ ਲੱਗਣਾ ਨਈਂ ਤੇਰਾ,
ਜੀਅ ਲੱਗਣਾ ਨਈਂ ਮੇਰਾ |

ਕਾਵਾਂ-ਕਾਵਾਂ ਰੌਲੀ ਪਾਈ,
ਕਿ ਤੂੰ ਆਵੇਂਗੀ ਅੱਜ |
ਦਿਲ ਮੰਨਣਾਂ ਨਈਂ ਤੇਰਾ,
ਕੀ ਇਹਨੂੰ ਲਾਵੇਂਗੀ ਪੱਜ |
ਤੂੰ ਆਈ ਕਿਉਂ ਨਈਂ ਹਾਲੇ,
ਨੀ ਕਾਂ ਵੇਖਦੈ ਬਨੇਰਾ |
ਜੀਅ ਲੱਗਣਾ ਨਈਂ ਤੇਰਾ,
ਜੀਅ ਲੱਗਣਾ ਨਈਂ ਮੇਰਾ |

ਨੀ ਸਾਡੇ ਖੀਸੇ ਵਿੱਚ ਚੰਦ,
ਚੀਸਾਂ ਹੌਕਿਆਂ ਦੇ ਕਿੱਸੇ |
ਰੱਬਾ ਵਿਛੋੜੇ ਤੋਂ ਪਹਿਲਾਂ,
ਆਵੇ ਮੌਤ ਸਾਡੇ ਹਿੱਸੇ |
ਸਾਡਾ ਹੌਕਿਅਾਂ ਦਾ ਟਿੱਲਾ,
ਸਾਡਾ ਹੰਝੂਅਾਂ ਦਾ ਡੇਰਾ |
ਜੀਅ ਲੱਗਣਾ ਨਈਂ ਤੇਰਾ,
ਜੀਅ ਲੱਗਣਾ ਨਈਂ ਮੇਰਾ |

ਮੈਂ ਤੈਨੂੰ ਪਾਉਣ ਲਈ ਯਾਰਾ,
ਅੱਗੀਂ ਆਸਣ ਵਿਛਾਵਾਂ |
ਵਾਅ ਤੱਤੀ ਲੱਗੇ ਨਾ ਤੈਨੂੰ,
ਇਹ ਨੇ ਮੇਰੀਅਾਂ ਦੁਅਾਵਾਂ |
ਮੇਰੇ ਸਾਹੀਂ ਅਾ ਸਮਾਜਾ,
ਸਾਡਾ ਈ ਜੋਗੀ ਵਾਲਾ ਫੇਰਾ |
ਜੀਅ ਲੱਗਣਾ ਨਈਂ ਤੇਰਾ,
ਜੀਅ ਲੱਗਣਾ ਨਈਂ ਮੇਰਾ |

ਸੂਈ ਦੇ ਨੱਕੇ ਵਿੱਚੋਂ ਨੀ,
ਮੈਂ ਖੁਦ ਨੂੰ ਲੰਘਾਵਾਂ |
ਜੇ ਤੇਰਾ ਨਿਕਲੇ ਨੀ ਹੌਕਾ,
ਤਾਂ ਮੈਂ ਥਾਂ ਈਂ ਮਰ ਜਾਵਾਂ |
ਨੀ ਮੈਂ ਅਗਨ ਗੁਫਾ ਦੇ,
ਵਿੱਚ ਕਰਜਾਂ ਵਸੇਰਾ |
ਜੀਅ ਲੱਗਣਾ ਨਈਂ ਤੇਰਾ,
ਜੀਅ ਲੱਗਣਾ ਨਈਂ ਮੇਰਾ |

ਕਿਉਂ ਦੁੱਖਭੰਜਨ ਤੋਂ ਦੁੱਖ,
ਤੇਰਾ ਜਰਿਆ ਨਈਂ ਜਾਦਾਂ |
ਓ ਮਜਬੂਰ ਬੜਾ ਬੈਠਾ,
ਕੁਝ ਕਰਿਅਾ ਨਈ ਜਾਦਾਂ |
ਉਹਨੂੰ ਵੱਢ-ਵੱਢ ਖਾਂਦਾ,
ਓਪਰਾ ਚਾਰ ਚੁਫੇਰਾ |
ਜੀਅ ਲੱਗਣਾ ਨਈਂ ਤੇਰਾ,
ਜੀਅ ਲੱਗਣਾ ਨਈਂ ਮੇਰਾ