ਹਰਪ੍ਰੀਤ ਸਿੰਘ ਲਲਤੋਂ
ਦੱਸਣ ਲੱਗੀ ਹਾਂ ਦਿਲ ਦੀ ,ਨਾ ਝੂਠ ਦਾ ਰਲੇਵਾਂ,
ਹਿਜਰ ਤੇਰੇ ਵਿੱਚ ਸੜਦੀ ,ਸਬੂਤ ਭਲਾਂ ਕੀ ਦੇਵਾਂ।
ਤੇਰੀਆਂ ਹੀ ਸੋਚਾਂ ਰਹਿੰਦੀਆਂ,ਰੋਟੀ ਮੱਚ ਜਾਂਦੀ ਤਵੇ,
ਮੈਨੂੰ ਅੱਖੀਆਂ ਦੇਣ ਉਲਾਮਾ,ਨੀਂਦ ਲੱਗਦੀ ਨੀ ਲਵੇ।
ਲਾਰੇ ਤੇਰੇ ਨਾ ਮੁੱਕੇ ,ਮੁੱਕਿਆ ਚੇਤ ਤੋਂ ਲੈ ਕੇ ਕੱਤਾ,
ਡਾਲਰ ਛੱਡ ਕੇ ਢੋਲਾ,ਮੇਰੇ ਬਾਰੇ ਵੀ ਸੋਚ ਲੈ ਰੱਤਾ।
ਤੈਨੂੰ ਦੂਰ ਮੇਰੇ ਤੋਂ ਕਰਦੀ,ਕਮਾਈ ਚੁੱਲੇ ਵਿੱਚ ਪਵੇ,
ਮੈਨੂੰ ਅੱਖੀਆਂ ….।
ਭੁੱਖ ਪਿਆਸ ਵੀ ਮੇਰੀ,ਤੇਰੇ ਨਾਲ ਹੀ ਜਾਂਦੀ ਲੱਗੀ,
ਹੱਥਾਂ ਵਿੱਚ ਦਿਲ ਆਜੇ,ਜਦ ਫਰਕੇ ਮੇਰੀ ਅੱਖ ਸੱਜੀ।
ਦੂਰ ਵਸੇਂਦਿਆ ਸੱਜਣਾ,ਸਦਾ ਹੀ ਤੇਰਾ ਫਿਕਰ ਰਵੇ,
ਮੈਨੂੰ ਅੱਖੀਆਂ……।
ਉੱਤਲੇ ਮਨੋਂ ਹੀ ਹੱਸਦੀ ,ਤੈਨੂੰ ਭੋਰਾ ਨੀ ਸਾਰ ਲਲਤੋਂ,
ਹੁੰਦਾ ਹੋਰ ਮੇਰੇ ਤੋਂ ਤੇਰਾ ,ਹੁਣ ਨੀ ਇੰਤਜਾਰ ਲਲਤੋਂ।
ਭੁੱਲ ਕੇ ਵੀ ਤੇਰੇ ਆਉਣੇ ਦਾ,ਕਾਂ ਸੁਨੇਹਾ ਨਾ ਦਵੇ,
ਮੈਨੂੰ ਅੱਖੀਆਂ………।
