ਵਿਭਾਗ ਦੇ ਕਿਸੇ ਸਟਾਫ ਮੈਂਬਰ ਨਾਲ ਸਨ ਅਣਉਚਿਤ ਸਬੰਧ
-ਟਵੀਟਰ ਅਤੇ ਫੇਸ ਬੁੱਕ ਅਕਾਉਂਟ ਹਟਾਇਆ ਗਿਆ
ਔਕਲੈਂਡ 22 ਜੁਲਾਈ (ਹਰਜਿੰਦਰ ਸਿੰਘ ਬਸਿਆਲਾ)
ਕਹਿੰਦੇ ਨੇ ਕਿਹੜੇ ਵੇਲੇ ਸ਼ੇਰਾਂ ਨੂੰ ਘਾਹ ਖਾਣਾ ਪੈ ਜਾਏ ਕੁਝ ਪਤਾ ਨਹੀਂ ਚਲਦਾ। ਅਜਿਹਾ ਹੀ ਨਿਊਜ਼ੀਲੈਂਡ ਦੇ ਇਮੀਗ੍ਰੇਸ਼ਨ ਮੰਤਰੀ ਸ੍ਰੀ ਇਆਨ ਲੀਸ ਗਾਲੋਵੇਅ (41) ਦੇ ਨਾਲ ਹੋਇਆ। ਨਿਊਜ਼ੀਲੈਂਡ ਦੀ ਪ੍ਰਧਾਨ ਮੰਤਰੀ ਮਾਣਯੋਗ ਸ੍ਰੀਮਤੀ ਜੈਸਿੰਡਾ ਆਰਡਨ ਨੇ ਅੱਜ ਉਸਦੀ ਮਹਿਕਮੇ ਤੋਂ ਛੁੱਟੀ (ਬਰਖਾਸਤੀ) ਕਰ ਦਿੱਤੀ ਹੈ। ਇਥੇ ਹੀ ਬਸ ਨਹੀਂ ਉਹ ਸਤੰਬਰ ਮਹੀਨੇ ਹੋਣ ਵਾਲੀ ਚੋਣ ਵੀ ਨਹੀਂ ਲੜ ਰਿਹਾ ਭਾਂਵੇ ਉਸ ਨੂੰ ਇਸ ਸਬੰਧੀ ਖੁਦ ਫੈਸਲਾ ਲੈਣ ਲਈ ਕਿਹਾ ਗਿਆ ਸੀ। ਮਾਮਲਾ ਇਹ ਸੀ ਕਿ ਉਸਦੇ ਵਿਭਾਗ ਦੇ ਵਿਚ ਕਿਸੇ ਸਟਾਫ ਮੈਂਬਰ ਨਾਲ ਅਣਉਚਿਤ ਸਬੰਧ ਸਨ। ਸਾਲ ਕੁ ਪਹਿਲਾਂ ਦੀ ਇਹ ਗੱਲ ਹੈ ਅਤੇ ਇਸ ਵੇਲੇ ਭਾਵੇਂ ਉਹ ਸਟਾਫ ਵਿਚ ਨਹੀਂ ਹੈ ਪਰ ਮਾਮਲਾ ਨਿਯਮਾਂ ਦਾ ਹੈ। ਮੰਤਰੀ ਨੇ ਭਾਵੇਂ ਆਪਣੀ ਸਫਾਈ ਦੇ ਵਿਚ ਬਹੁਤ ਕੁਝ ਕਿਹਾ ਅਤੇ ਸਹਿਮਤੀ ਨਾਲ ਸਾਰਾ ਕੁਝ ਹੋਣ ਦੀ ਗੱਲ ਕਹੀ, ਪਰ ਪਹਿਲ ਨਿਯਮਾਂ ਦੀ ਹੈ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਇਮੀਗ੍ਰੇਸ਼ਨ ਮੰਤਰੀ ਦੇ ਉਪਰੋਂ ਉਸਦਾ ਅੱਜ ਵਿਸ਼ਵਾਸ਼ ਟੁੱਟ ਗਿਆ ਹੈ ਕਿ ਉਸਨੇ ਗੈਰ ਅਣਉਚਿਤ ਤਰੀਕੇ ਨਾਲ ਅਹੁਦੇ ਦੀ ਵਰਤੋਂ ਕੀਤੀ ਹੈ। ਉਸਨੇ ਮੰਤਰੀ ਪਦ ਦਾ ਉਸ ਤਰ੍ਹਾਂ ਪਾਲਣ ਨਹੀਂ ਕੀਤਾ ਜਿਸ ਤਰ੍ਹਾਂ ਦੀ ਉਸਨੂੰ ਆਸ ਸੀ। ਪ੍ਰਧਾਨ ਮੰਤਰੀ ਅਨੁਸਾਰ ਇਮੀਗ੍ਰੇਸ਼ਨ ਮੰਤਰੀ ਨੇ ਪਿਛਲੇ 12 ਮਹੀਨਿਆਂ ਦੇ ਵਿਚ ਕਾਫੀ ਕਮੀਆਂ ਵਿਖਾਈਆਂ। ਇਮੀਗ੍ਰੇਸ਼ਨ ਮੰਤਰੀ ਦਾ ਟਵੀਟਰ ਅਤੇ ਫੇਸ ਬੁੱਕ ਅਕਾਉਂਟ ਵੀ ਹਟਾ ਦਿੱਤਾ ਗਿਆ ਹੈ। ਉਸਦੀ ਮਨਿਸਟਰ ਵਾਲੀ ਪ੍ਰੋਫਾਈਲ ਹਟਾ ਦਿੱਤੀ ਗਈ ਹੈ। ਅੰਤ ਕਿਹਾ ਜਾ ਸਕਦਾ ਹੈ ਉਸਦਾ ਸਾਰਾ ਰਾਜਨੀਤਕ ਜੀਵਨ ਖਤਮ ਹੋ ਗਿਆ ਹੈ।
ਮੰਤਰੀ ਨੇ ਮੰਗੀ ਪ੍ਰਧਾਨ ਮੰਤਰੀ ਅਤੇ ਆਪਣੇ ਪਰਿਵਾਰ ਤੋਂ ਮਾਫੀ: ਨਿਊਜ਼ੀਲੈਂਡ ਇਮੀਗ੍ਰੇਸ਼ਨ ਮੰਤਰੀ ਨੇ ਬਿਨਾਂ ਦੇਰੀ ਕੀਤੇ ਪ੍ਰਧਾਨ ਮੰਤਰੀ ਕੋਲੋਂ ਮਾਫੀ ਮੰਗ ਲਈ ਹੈ। ਉਸਦੇ ਦਫਤਰ ਤੋਂ ਪੰਜਾਬੀ ਹੈਰਲਡ ਨੂੰ ਮਿਲੀ ਜਾਣਕਾਰੀ ਅਨੁਸਾਰ ਮੰਤਰੀ ਸਾਹਿਬ ਦੇ ਫੈਸਲੇ ਨੂੰ ਮੰਜ਼ੂਰ ਕਰ ਲਿਆ ਗਿਆ ਹੈ ਅਤੇ ਕਿਹਾ ਹੈ ਕਿ ਉਸ ਕੋਲੋਂ ਪੂਰੀ ਤਰ੍ਹਾਂ ਅਣਉਚਿਤ ਤਰੀਕੇ ਨਾਲ ਮੰਤਰੀ ਪਦ ਦਾ ਉਪਯੋਗ ਕੀਤਾ ਗਿਆ ਹੈ ਅਤੇ ਉਹ ਇਕ ਮੰਤਰੀ ਵਜੋਂ ਸੇਵਾ ਨਹੀਂ ਦੇ ਸਕਣਗੇ। ਇਮੀਗ੍ਰੇਸ਼ਨ ਮੰਤਰੀ ਜਿਨ੍ਹਾਂ ਕੋਲ ਦੋ ਹੋਰ ਮਹਿਕਮੇ ਵੀ ਸਨ ਨੇ ਮਾਫੀ ਦਾ ਦਾਇਰਾ ਅੱਗੇ ਵਧਾਉਂਦਿਆਂ ਆਪਣੇ ਪਰਿਵਾਰ ਕੋਲੋਂ ਵੀ ਮਾਫੀ ਮੰਗੀ ਹੈ ਕਿਉਂਕਿ ਉਨ੍ਹਾਂ ਦੀ ਵੀ ਹੇਠੀ ਹੋਈ ਹੈ। ਪਰ ਉਸਨੇ ਪਰਿਵਾਰ ਦੀ ਪ੍ਰਾਵੇਸੀ (ਨਿਜੀ ਜ਼ਿੰਦਗੀ) ਨੂੰ ਵਿਚ ਨਾ ਲਿਆਉਣ ਦੀ ਅਪੀਲ ਕੀਤੀ ਹੈ। ਮੰਤਰੀ ਸਾਹਿਬ ਨੇ ਉਨ੍ਹਾਂ ਸਾਰੇ ਲੋਕਾਂ ਕੋਲੋਂ ਮਾਫੀ ਮੰਗੀ ਹੈ ਜਿਨ੍ਹਾਂ ਦੇ ਮਨਾਂ ਨੂੰ ਢੇਸ ਪਹੁੰਚੀ ਹੈ। ਵਰਨਣਯੋਗ ਹੈ ਕਿ ਹੁਣ ਮੰਤਰੀ ਸਾਹਿਬ ਸਿਰਫ ਸੰਸਦ ਮੈਂਬਰ ਹਨ ਅਤੇ ਸਤੰਬਰ ਮਹੀਨੇ ਵਾਲੀ ਚੋਣ ਦੇ ਵਿਚ ਉਹ ਹਿੱਸਾ ਨਹੀਂ ਲੈਣਗੇ। ਨਿਊਜ਼ੀਲੈਂਡ ਦੇ ਨਵੇਂ ਇਮੀਗ੍ਰੇਸ਼ਨ ਮੰਤਰੀ ਕ੍ਰਿਸ ਫਾਫੂਈ ਨੂੰ ਬਣਾਇਆ ਗਿਆ ਹੈ।
