ਰੋਮ ਇਟਲੀ (ਕੈਂਥ)
*ਕਈ ਮਾਪਿਆਂ ਦੀਆਂ ਅੱਖਾਂ ਵੀ ਲਾਕਡਾਊਨ ਨੇ ਖੋਲੀਆਂ
*ਨਸ਼ੇ ਦੀ ਥੋੜ ਨਸ਼ੇੜੀਆਂ ਲਈ ਕੋਰੋਨਾਵਾਇਰਸ ਤੋਂ ਵੀ ਵੱਡਾ ਸੰਕਟ
ਇਟਲੀ ਨੂੰ ਕੋਰੋਨਾਵਾਇਰਸ ਨੇ ਜਿਸ ਤਰ੍ਹਾਂ ਝੰਬਿਆ ਹੈ ਉਸ ਕਾਰਨ ਇਟਲੀ ਨੂੰ ਪਿਆਰ ਕਰਨ ਵਾਲੀ ਹਰ ਰੂਹ ਕੁਰਲਾ ਉੱਠੀ ।ਇਟਲੀ ਸਰਕਾਰ ਵੱਲੋਂ ਲੋਕਾਂ ਦੀ ਜਾਨੀ ਮਾਲੀ ਸੁਰੱਖਿਆ ਕਰਨ ਲਈ 13 ਅਪ੍ਰੈਲ ਤੱਕ ਲਾਕਡਾਊਨ ਕੀਤਾ ਗਿਆ ਹੈ ਤਾਂ ਜੋ ਕੋਰੋਨਾਵਾਇਰਸ ਦੀ ਉਸ ਕੜੀ ਨੂੰ ਤੋੜਿਆ ਜਾ ਸਕੇ ਜਿਸ ਨਾਲ ਮਹਾਂਮਾਰੀ ਨੇ ਇਟਲੀ ਦੇ 15887 ਲੋਕਾਂ ਨੂੰ ਜਮਦੂਤ ਬਣ ਦਰਦਨਾਕ ਮੌਤ ਦਿੱਤੀ ਹੈ ।ਕੋਰੋਨਾ ਸੰਕਟ ਦੌਰਾਨ ਬੇਸ਼ੱਕ ਕਰੋੜਾਂ ਲੋਕ ਔਖੇ ਹੋਕੇ ਵੀ ਇਟਲੀ ਵਿੱਚ ਸਰਕਾਰੀ ਹੁਕਮਾਂ ਦੀ ਪਾਲਣ ਕਰਕੇ ਦੇਸ਼ ਭਗਤੀ ਦਾ ਸਬੂਤ ਦੇ ਰਹੇ ।ਉਹਨਾਂ ਮਜ਼ਦੂਰਾਂ ਨੂੰ ਭੁੱਖ ਹਾਲੋ-ਬੇਹਾਲ ਕਰਦੀ ਹੈ ਜਿਹਨਾਂ ਲੋਕ ਨਾ ਇਟਲੀ ਦੇ ਪੇਪਰ ਅਤੇ ਨਾਂਹੀ ਖਾਣ ਲਈ ਰੋਟੀ।ਜਦੋਂ ਇਟਲੀ ਵਿੱਚ ਕੋਰੋਨਾ ਸੰਕਟ ਨਹੀਂ ਸੀ ਉਂਦੋਂ ਵੀ ਮਸਾਂ ਗੈਰ-ਕਾਨੂੰਨੀ ਕਾਮਿਆਂ ਦਾ ਗੁਜ਼ਾਰਾ ਚੱਲਦਾ ਸੀ ਪਰ ਹੁਣ ਤਾਂ ਹਾਲਾਤ ਬਦ ਤੋਂ ਬਦਤਰ ਹੋਏ ਪਏ ਹਨ।ਗੈਰ ਕਾਨੂੰਨੀ ਕਾਮੇ ਹਰ ਰੋਜ਼ ਜਿੱਥੇ ਕੋਰੋਨਾਵਾਇਰਸ ਨੂੰ ਰੁਜ਼ਗਾਰ ਬੰਦ ਕਰਨ ਲਈ ਲੱਖਾਂ ਬਦਦੁਆਵਾਂ ਦਿੰਦੇ ਹਨ ਉੱਥੇ ਹੀ ਪ੍ਰਮਾਤਮਾ ਅੱਗੇ ਗੋਡਿਆ ਭਾਰ ਹੋ ਅਰਦਾਸਾਂ ਵੀ ਕਰਦੇ ਹਨ ਕਿ ਇਟਲੀ ਦੇ ਹਾਲਾਤ ਜਲਦ ਸੁਧਰ ਜਾਣ ਤਾਂ ਜੋ ਉਹ ਵੀ ਕੋਈ ਸੁੱਖ ਦਾ ਸਾਹ ਲੈ ਸਕਣ ਪਰ ਇਸ ਸਭ ਦੇ ਬਾਵਜੂਦ ਉਹ ਲੋਕ ਬਹੁਤ ਹੀ ਰੌਣਹਾਕੇ ਦੇਖੇ ਗਏ ਹਨ ਜਿਹੜੇ ਕਿ ਕਿਸੇ ਨਾ ਕਿਸੇ ਨਸ਼ੇ ਦੇ ਆਦਿ ਹਨ ਤੇ ਕੋਰੋਨਾ ਸੰਕਟ ਉਹਨਾਂ ਲਈ ਜੀਵਨ ਸੰਕਟ ਬਣਦਾ ਜਾ ਰਿਹਾ ਹੈ।ਲਾਕਡਾਊਨ ਨਾਲ ਅਜਿਹੇ ਬਹੁਤ ਨਸ਼ੇੜੀਆਂ ਨੂੰ ਜਾਨ ਦੀ ਬਣੀ ਹੋਈ ਹੈ ਜਿਹੜੇ ਕਿ ਘਰਦਿਆਂ ਤੋਂ ਅੱਖ ਬਚਾਕੇ ਸਵੇਰੇ ਹੀ ਨਸ਼ਿਆਂ ਦੇ ਸਰੂਰ ਵਿੱਚ ਅੱਖਾਂ ਖੋਲਦੇ ਸਨ ।ਅਜਿਹੇ ਨੌਜਵਾਨਾਂ ਦੇ ਮਾਪੇ ਵੀ ਡਾਢੇ ਦੁੱਖੀ ਦੇਖੇ ਜਾ ਰਹੇ ਜਿਹਨਾਂ ਨੇ ਕਦੀ ਵੀ ਨਸ਼ਿਆਂ ਕਾਰਨ ਤਬਾਹ ਹੁੰਦੇ ਆਪਣੇ ਜਿਗਰ ਦੇ ਟੋਟਿਆਂ ਦੀ ਕੰਮ ਵਿੱਚ ਰੁੱਝੇ ਹੋਣ ਕਾਰਨ ਕਦੀ ਸਾਰ ਨਹੀਂ ਲਈ ਤੇ ਹੁਣ ਜਦੋਂ ਸਰਕਾਰ ਨੇ ਸਭ ਨੂੰ ਕੋਰੋਨਾਵਾਇਰਸ ਕਾਰਨ ਘਰਾਂ ਵਿੱਚ ਹੀ ਰਹਿਣ ਦੇ ਨਿਰਦੇਸ਼ ਦਿੱਤੇ ਹਨ ਤਾਂ ਬਹੁਤੇ ਇਟਾਲੀਅਨ ਤੇ ਵਿਦੇਸ਼ੀ ਮਾਪਿਆਂ ਨੂੰ ਪਤਾ ਲੱਗਾ ਹੈ ਕਿ ਉਹਨਾਂ ਦੇ ਬੱਚੇ ਪੂਰੀ ਤਰ੍ਹਾਂ ਨਸ਼ੇੜੀ ਬਣ ਚੁੱਕੇ ਹਨ ।ਇਟਲੀ ਵਿੱਚ ਹੋਏ ਲਾਕਡਾਊਨ ਕਾਰਨ ਇਹ ਨਸ਼ੇੜੀ ਬਿਨ੍ਹਾਂ ਕਿਸੇ ਐਂਮਰਜੈਂਸੀ ਘਰੋਂ ਬਾਹਰ ਜਾ ਨਹੀਂ ਸਕਦੇ ਤੇ ਘਰ ਵਿੱਚ ਨਸ਼ਾ ਇਹਨਾਂ ਨੂੰ ਮਿਲ ਨਹੀਂ ਰਿਹਾ।ਅਜਿਹੇ ਹਾਲਤਾਂ ਵਿੱਚ ਇਹ ਨਸੇæੜੀ ਘਰਦਿਆਂ ਨਾਲ ਲੜਾਈਆਂ ਝਗੜੇ ਕਰ ਰਹੇ ਹਨ ਪਰ ਮਾਪਿਆਂ ਨੂੰ ਕੁਝ ਸਮਝ ਨਹੀਂ ਲੱਗ ਰਹੀ ਕਿ ਉਹ ਕਿ ਕਰਨ ।ਨਸ਼ਿਆਂ ਕਾਰਨ ਮਰ ਰਹੇ ਆਪਣੇ ਬੱਚਿਆਂ ਨੂੰ ਘਰੋਂ ਬਾਹਰ ਨਸ਼ਾ ਲੈਣ ਜਾਣ ਦੇਣ ਜਾਂ ਕੋਰੋਨਾਵਾਇਰਸ ਤੋਂ ਬਚਾਉਣ ਲਈ ਘਰ ਵਿੱਚ ਹੀ ਬੰਦ ਰੱਖਣ ।ਇੱਥੇ ਇਹ ਵੀ ਜ਼ਿਕਰਯੋਗ ਹੈ ਕਿ ਇਟਲੀ ਵਿੱਚ ਕਈ ਭਾਰਤੀ ਨੌਜਵਾਨ ਵੀ ਅਜਿਹੇ ਹਨ ਜਿਹੜੇ ਕਿ ਨਸੇæ ਵੇਚਦੇ ਵੀ ਹਨ ਤੇ ਨਸ਼ਿਆਂ ਨੂੰ ਖਾਂਦੇ ਵੀ ਹਨ ।ਕੋਰੋਨਾ ਸੰਕਟ ਨੇ ਅਜਿਹੇ ਲੋਕਾਂ ਲਈ ਵੀ ਵੱਡਾ ਸੰਕਟ ਖੜ੍ਹਾ ਕਰ ਦਿੱਤਾ ਹੈ ਕਿਉਂ ਕਿ ਘਰਾਂ ਵਿੱਚ ਬੰਦ ਹੋਣ ਕਾਰਨ ਨਸ਼ੇੜੀਆਂ ਨੂੰ ਨਸ਼ਿਆਂ ਦੀ ਸਪਲਾਈ ਨਹੀਂ ਮਿਲ ਰਹੀ ਜਿਸ ਕਾਰਨ ਉਹਨਾਂ ਦੀ ਜਾਨ ਮੂੰਹ ਵਿੱਚ ਆਈ ਹੋਈ ਹੈ।ਨਸ਼ਿਆਂ ਕਾਰਨ ਟੁੱਟ ਰਿਹਾ ਸਰੀਰ ਉਹਨਾਂ ਨੂੰ ਪਲ-ਪਲ ਮਰਨ ਲਈ ਮਜ਼ਬੂਰ ਕਰ ਰਿਹਾ ਹੈ।ਦੂਜੇ ਪਾਸੇ ਜਿਹੜੇ ਕੁਝ ਭਾਰਤੀ ਨਸ਼ਾ ਵੇਚਦੇ ਹਨ ਉਹ ਵੀ ਘਰਾਂ ਵਿੱਚ ਬੰਦ ਹਨ ਤੇ ਉਹਨਾਂ ਦੀ ਆਮਦਨ ਦਾ ਸਾਧਨ ਖੁੱਸਣ ਕਾਰਨ ਭੁੱਖ ਅਤੇ ਨਸ਼ੇ ਦੀ ਥੋੜ ਉਹਨਾਂ ਨੂੰ ਕੋਰੋਨਾਵਾਇਰਸ ਤੋਂ ਵੀ ਵੱਡਾ ਸੰਕਟ ਲੱਗ ਰਿਹਾ ਹੈ।
