ਰਜਨੀ ਵਾਲੀਆ, ਕਪੂਰਥਲਾ
ਵਗੇ ਠੰਡੜੀ ਹਵਾ,
ਵੇ ਆ ਕੇ ਸੁਣ ਬਾਬਲਾ |
ਤੇਰਾ ਵਿਹੜਾ ਚੇਤੇ ਆਉਂਦਾ ਏ,
ਓ ਤੱਕੀ ਬਲਦਾਂ ਦੀ ਜੋੜੀ,
ਤੇ ਓ ਰੇੜਾ ਯਾਦ ਆਉਂਦਾ ਏ |
ਮਿੱਟੀ ਦੇ ਨਾਲ ਮਿੱਟੀ ਹੋਣਾ,
ਮਿੱਟੀ ਦੇ ਭਾਂਡੜੇ ਬਣਾਉਣੇਂ |
ਰੇਤੇ ਦੇ ਵਿੱਚ ਪੈਰ ਪਾ ਕੇ,
ਰੇਤ ਦੇ ਕਿਲੇ ਵੀ ਦਿਖਾਉਣੇਂ |
ਤੂੰ ਵੇਖ-ਵੇਖ ਖੁਸ਼ ਹੁੰਦਾ,
ਤੇਰਾ ਓ ਖੇੜਾ ਯਾਦ ਆਉਂਦਾ ਏ |
ਵੇ ਆ ਕੇ ਸੁਣ ਬਾਲਬਾ
ਅੰਮੀਂ ਕਰੇ ਚੁੱਲਾ-ਚੌਂਕਾ,
ਨਾਲ ਹੱਥ ਮੈਂ ਵੰਡਾਵਾਂ |
ਜਦੋਂ ਪੱਕ ਜਾਣੀਂ ਹਾਂਢੀ,
ਛੋਟੇ ਵੀਰ ਨਾਲ ਖਾਵਾਂ |
ਮੈਨੂੰ ਮੇਰੇ ਹੱਥਾਂ ਦਾ ਓ
ਕੀਤਾ ਪੇੜਾ ਯਾਦ ਆਉਦਾ ਏ|
ਵੇ ਆ ਕੇ ਸੁਣ ਬਾਬਲਾ
ਵੇ ਤੂੰ ਕਰਦਾ ਸੀ ਚੇਤੇ,
ਮੈਨੂੰ ਜਾਣ ਲੱਗਾ ਜੱਗੋਂ |
ਐਸਾ ਵਰਤਿਆ ਵੇ ਭਾਣਾਂ,
ਤੈਨੂੰ ਮਿਲੀ ਵੀ ਨਾ ਅੱਗੋਂ |
ਓ ਵੱਜਿਆ ਜੋ ਮੂੰਹ ਤੇ ਸੀ,
ਲਫੇੜਾ ਯਾਦ ਆਉਂਦਾ ਏ|
ਵੇ ਆ ਕੇ ਸੁਣ ਬਾਬਲਾ
ਖੇਡੀ ਕੋਕਲਾ-ਸ਼ਪਾਕੀ ਤੇ,
ਮੈਂ ਕਿੱਕਲੀ ਜੋ ਪਾਈ |
ਰਹੀ ਖੇਡਦੀ ਸ਼ਟਾਪੂ,
ਨਾਲੇ ਚੋਰ ਤੇ ਸਿਪਾਹੀ |
ਮੈਂ ਭੁੱਲੀ ਨਈਂ ਵੇ ਮੈਨੂੰ,
ਜਿਹੜਾ-ਜਿਹੜਾ ਯਾਦ ਆਉਂਦਾ ਏ |
ਵੇ ਆ ਕੇ ਸੁਣ ਬਾਬਲਾ
ਤੇਰੀ ਲਾਡੋ ਜਦੋਂ ਕਹਿਣਾ,
ਤੇਰੇ ਵਿਹੜੇ ਪੀਂਘ ਪੈਂਦੀ |
ਸਖੀਆਂ-ਸਹੇਲੀਆਂ ਦੇ ਨਾਲ,
ਰਜਨੀ ਹੁਲਾਰੇ ਨਿੱਤ ਲੈਂਦੀ |
ਤੇਰੇ ਹੱਥੋਂ ਲਿਆ ਪੀਂਘ ਉੱਤੇ,
ਗੇੜਾ ਯਾਦ ਆਉਂਦਾ ਏ |
ਵੇ ਆ ਕੇ ਸੁਣ ਬਾਬਲਾ
