ਸ਼ੇਅਰ
ਬੜੇ ਸੁੱਖ ਪ੍ਰਦੇਸਾਂ ਦੇ,ਬੜੇ ਦੁੱਖ ਪ੍ਰਦੇਸਾਂ ਦੇ ,
ਵਾਂਗ ਰੁੱਖ ਪ੍ਰਦੇਸਾਂ ਦੇ ਛਾਂ ਦਿੰਦਾ ਰਿਹਾ ਸੁੱਕ ਗਿਆ,
ਛੱਲਾ ਕਰਦਾ ਕਮਾਈਆਂ ਨੂੰ ਸੰਧੂ ਇੱਕ ਦਿਨ ਮੁੱਕ ਗਿਆ।
ਗੀਤਕਾਰ-ਸੁਰਜੀਤ ਸੰਧੂ
ਛੱਲਾ ਇੰਡੀਆ ਪੜਕੇ,ਜ਼ਮੀਨਾਂ ਗਹਿਣੇ ਧਰਕੇ,
ਵਿੱਚ ਜਹਾਜ਼ਾਂ ਚੱੜ੍ਹਕੇ, ਪਾਰ ਸਮੁੰਦਰੋਂ ਆਇਆ-
ਸਟੱਡੀ ਵੀਜ਼ਾ ਲਵਾਇਆ।
ਛੱਲਾ ਜੌਬਾਂ ਲੱਭਦਾ,ਥਾਂ-ਥਾਂ ਫਿਰਦਾ ਜ਼ੱਬਦਾ,
ਕਿਤੇ ਵੀ ਪਤਾ ਨਹੀਂ ਲੱਗਦਾ,ਹੁਣ ਕੀ ਕੀਤਾ ਜਾਵੇ-
ਬੜਾ ਦਿਲ ਪਿਆ ਘਬਰਾਵੇ।
ਛੱਲਾ ਖਿੱੜ-ਖਿੱੜ ਹੱਸਦਾ,ਮਿਲਗੀ ਜੌਬ ਏ ਦੱਸਦਾ,
ਫਿਰਦਾ ਗਾਉਦਾ ਨੱਚਦਾ,ਨਜ਼ਾਰਾ ਦੇਖੀਂ ਆਊ-
ਯਾਰ ਹੁਣ ਡਾਲਰ ਕਮਾਊ।
ਛੱਲਾ ਟ੍ਰਾਲੀਆਂ ਧੱਕਦਾ,ਜਵਾਂ ਨੀ ਅੱਕਦਾ ਥੱਕਦਾ,
ਦਿਲ ‘ਚ ਦਲੇਰੀ ਰੱਖਦਾ,ਕੰਮ ਨੂੰ ਮੂਹਰੇ ਲਾਵੇ –
ਮਾਣਕ ਦੀਆਂ ਕਲੀਆਂ ਗਾਵੇ।
ਛੱਲਾ ਪੀਜ਼ੇ ਬਣਾਉਂਦਾ ,ਗਾਹਕ ਨਾਲ ਭੁਗਤਾਉਦਾ,
ਫਿਰੇ ਫੁਰਤੀ ਦਿਖਾਉਂਦਾ,ਜਦੋਂ ਹੈ ਔਡਰ ਫੱੜਦਾ-
ਪੀਜ਼ਾ ਡਲਿਵਰੀ ਕਰਦਾ।
ਛੱਲਾ ਕਰਦਾ ਕਮਾਈਆਂ ,ਆਫ਼ਿਸਾਂ ਵਿੱਚ ਸਫ਼ਾਈਆਂ,
ਕਰ-ਕਰ ਰਾਤਾਂ ਲੰਘਾਈਆਂ,ਕਲੀਨਿੰਗ ਜਿਸ ਨੂੰ ਕਹਿੰਦੇ-
ਸਭ ਕੰਮ ਕਰਨੇ ਪੈਂਦੇ।
ਛੱਲਾ ਟੈਕਸੀ ਚਲਾਉਂਦਾ , ਬੱਸਾਂ ਵਿੱਚ ਸ਼ਿਫ਼ਟਾਂ ਲਾਉਂਦਾ ,
ਰੱਜ਼ਕੇ ਡਾਲਰ ਕਮਾਉਂਦਾ,ਡ੍ਰਾਈਵਰੀ ਜਾਨੋ ਪਿਆਰੀ-
ਪਈ ਰੋਡਾਂ ਨਾਲ ਯਾਰੀ।
ਛੱਲਾ ਸੁਰਜੀਤ ਨੇ ਲਿਖਿਆ,ਲਿਖਿਆ ਸੱਚ ਜੋ ਦਿਖਿਆ,
ਝੂਠ ਨਾਂ ਬੋਲਣਾ ਸਿੱਖਿਆ,ਕਹੇ ਸੰਧੂ ਨਿਮਾਣਾ-
ਛੱਲਾ ਸੁਣਕੇ ਹੀ ਜਾਣਾ,
ਛੱਲੇ ਅਰਦਾਸਾਂ ਕਰਦੇ ,ਝੋਲੀਆਂ ਸਭ ਦੀਆਂ ਭਰਦੇ,
ਪੱਲਾ ਇੱਕ ਤੇਰਾ ਫੜਦੇ,ਤੂੰ ਸਭ ਦਾ ਮਾਲਕ ਸੱਚਾ-
ਛੱਲਾ ਹੋਜ਼ੇ ਸਭ ਪੱਕਾ।
