ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ, ਅਮਰ ਮੀਨੀਆਂ )
ਗਲਾਸਗੋ ਦੀ ਵੈਸਟ ਜਾਰਜ ਸਟਰੀਟ ਸਥਿਤ ਪਾਰਕ ਇੰਨ ਹੋਟਲ ਵਿੱਚ ਵਾਪਰੀ ਛੁਰੇਬਾਜ਼ੀ ਦੀ ਘਟਨਾ ਵਿੱਚ ਇੱਕ ਪੁਲਿਸ ਅਧਿਕਾਰੀ ਤੋਂ ਇਲਾਵਾ ਹੋਰ ਪੰਜ ਵਿਅਕਤੀ ਜ਼ਖ਼ਮੀ ਹੋ ਗਏ ਸਨ ਜਦਕਿ ਪੁਲਿਸ ਵੱਲੋਂ ਹਮਲਾਵਰ ਨੂੰ ਗੋਲੀ ਮਾਰ ਦਿੱਤੀ ਗਈ ਸੀ। ਹੁਣ ਪੁਲਿਸ ਨੇ ਉਕਤ ਮਾਰੇ ਗਏ ਹਮਲਾਵਰ ਦੀ ਪਛਾਣ ਜਨਤਕ ਕਰਦਿਆਂ ਦੱਸਿਆ ਹੈ ਕਿ ਉਹ ਸੂਡਾਨ ਦਾ ਰਹਿਣ ਵਾਲਾ ਸੀ ਅਤੇ ਸਕਾਟਲੈਂਡ ਵਿੱਚ ਪਨਾਹ ਲੈਣ ਲਈ ਰਹਿ ਰਿਹਾ ਸੀ। ਉਸਦਾ ਨਾਮ ਬੈਦਰਦੀਨ ਅਬਦੁੱਲਾ ਐਡਮ ਤੇ ਉਮਰ 28 ਸਾਲ ਸੀ। ਇਹ ਨਾਮ ਉਸਨੇ ਪਨਾਹ ਲੈਣ ਲਈ ਦਿੱਤੀ ਜਾਣਕਾਰੀ ਸਮੇਂ ਦਰਜ਼ ਕਰਵਾਇਆ ਸੀ। ਉਸ ਵੱਲੋਂ ਕੀਤੀ ਛੁਰੇਬਾਜ਼ੀ ਵਿੱਚ ਛੇ ਵਿਅਕਤੀ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋਏ ਹਨ। ਜਿਹਨਾਂ ਵਿੱਚੋਂ ਇੱਕ ਪੁਲਿਸ ਅਧਿਕਾਰੀ, ਤਿੰਨ ਪਨਾਹਗੀਰ ਤੇ 2 ਹੋਟਲ ਦੇ ਕਾਮੇ ਹਨ।
