ਤੇਰੇ ਇਸ਼ਕ ਨੇ ਸਾਨੂੰ,ਰੁਤਬਾ ਉੱਚਾ ਦਿੱਤਾ ਹੈ |
ਧੁੱਖਦੀ ਚਿੰਗਾੜੀ ਦਾ,ਭਾਂਬੜ ਮਚਾ ਦਿੱਤਾ ਹੈ |
ਡੁੱਬ ਗਏ ਇਸ਼ਕ ਚ ਤੇਰੇ,ਹੋ ਕੇ ਫਨਾਹ ਅਸੀਂ ,
ਟੁੱਟੇ ਹੋਏ ਦਿਲ ਚੰਦਰੇ,ਇਤਿਹਾਸ ਰਚਾ ਦਿੱਤਾ ਹੈ |
ਚੜ੍ਹੇ ਅੰਬਰੀਂ ਅਸੀਂ,ਬਿਰਹਾ ਦੀ ਪੌੜੀ ਨਾਲ,
ਇਸ਼ਕੇ ਦੀ ਪੀੜਾ ਨੇ,ਆਲਮ ਨੱਚਾ ਦਿੱਤਾ ਹੈ |
ਲਬ ਬੰਦ ਸੀ ਇਸ ਤਰ੍ਹਾਂ,ਕੁਝ ਬੋਲ ਨਾ ਪਾਵਾਂਗੇ,
ਖੁਦਾ ਰਹਿਮਤ ਨੇ,ਦਰਵੇਸ਼ ਬਚਾ ਦਿੱਤਾ ਹੈ |
ਕੀ ਨਾਮ ਦਈਏ ਅਸੀਂ,ਇਸ ਮੁਹੱਬਤ ਨੂੰ,
ਜਿਸਨੇ ‘ਸਾਥੋਂ’ ਸਾਨੂੰ ਹੀ,ਵੱਖ ਖਿਚਾ ਦਿੱਤਾ ਹੈ |
ਮਿਲ ਜਾਊ ਜੇਕਰ ਹੁਣ ਵੀ,ਰੂਹ ‘ਚ ਰੂਹ ਹੋ ਕੇ,
‘ਜਲੰਧਰੀ’ ਆਖੇਗੀ,ਰਹਿਬਰ ਸੱਚਾ ਦਿੱਤਾ ਹੈ |
ਅਮਨਦੀਪ ਕੌਰ ਜਲੰਧਰੀ
88720-40085
