ਏਹ ਨਾ ਸਮਝੀਂ

ਦੁੱਖਭੰਜਨ ਰੰਧਾਵਾ
0351920036369

ਏਹ ਨਾ ਸਮਝੀਂ ਕਿ ਅੜੀਏ,

ਮੈਂ ਤੈਨੂੰ ਪਿਆਰ ਕਰਦਾ ਨਈਂ |

ਬਸ ਏਨਾ ਹੀ ਜਾਣੀਂ ਕਿ,

ਡਰਦਾ ਹੀ ਹੌਕਾ ਭਰਦਾ ਨਈਂ |

ਅੱਜ-ਕੱਲ ਤੇਰੇ ਸ਼ਹਿਰ-ਮੁਹੱਲੇ,

ਗਲੀ ਚ ਗੇੜਾ ਹੁੰਦਾ ਏ |

ਲੋਕੀ ਕਹਿੰਦੇ ਘਰ ਨਈਂ ਜਾਂਦਾ,

ਪਤਾ ਮੈਨੂੰ ਮੇਰੇ ਘਰ ਦਾ ਨਈਂ |

ਸ਼ਾਮ ਸਵੇਰੇ ਤੇਰੇ ਨਾਂ ਦਾ ਰੋਜਾ,

ਰੱਖ ਕੇ ਖੋਲ ਦਿਆਂ |

ਮੈਂ ਕਾਫਰ ਦੇ ਦਰ ਤੇ ਜਾ ਕੇ,

ਐਂਵੇਈ ਚੌਕੀ ਭਰਦਾ ਨਈਂ |

ਮੈਂ ਮੁਜਰਿਮ ਹਾਂ ਤੇਰਾ,

ਮੈਨੂੰ ਸਜਾ ਤਾਂ ਦੇ |

ਆ ਚਾੜ ਕਟਹਿਰੇ ਮੈਨੂੰ,

ਮੈਂ ਓਦਾਂ ਮਰਦਾ ਨਹੀਂ |

ਰੋਮ ਰੋਮ ਮੇਰਾ ਵਿਲਕੇ,

ਤੇ ਰੋਵੇ ਰੂਹ ਚੰਦਰੀ |

ਪੱਥਰ ਹੋਈਆਂ ਅੱਖੀਆਂ,

ਕਿ ਹੰਝੂ ਤਰਦਾ ਈ ਨਈ |

ਇੱਕੋ ਈ ਹਿੰਡ ਪੁਗਾਉਣੀ,

ਮੈਂ ਚਾਹੇ ਮਰ ਜਾਵਾਂ |

ਹਿਜਰ ਦਾ ਖੂਹ ਮੈਂ ਗੇੜਾਂ,

ਦੁੱਖ ਥੀਂ ਜਰਦਾ ਈ ਨਈ |

ਜੇ ਤੂੰ ਡੋਬਣ ਤੇ ਆਇਆ,

ਤੇ ਮੈਨੂੰ ਡੋਬ ਦੇਵੀਂ |

ਮੈਨੂੰ ਵਿੱਚ ਸਮੁੰਦਰ ਡੋਬੀਂ,

ਫਿਰ ਮੈਂ ਤਰਦਾ ਈ ਨਈਂ |

ਦੁੱਖਭੰਜਨ ਦੇ ਗਲ ਕੰਡਿਆਂ,

ਦਾ ਹਾਰ ਸਜਾ |

ਹਾਰਾਂ ਖਾ ਖਾ ਹਰਿਆ ਹੁਣ,

ਤਾਂ ਹਰਦਾ ਈ ਨਈਂ |