ਡੱਡੂ ਬੋਲਦਾ ਨਾ ਥੱਕੇ ਖੜੇ ਪਾਣੀ ਵਿੱਚ ।
ਖੋਰੇ ਹਾਣ ਨੂੰ ਕੀ ਦਿੱਖਦਾ ਹਾਣੀ ਵਿੱਚ ।
ਮਾਪੇ ਦੇਣ ਫੀਸਾਂ ਨਾਲੇ ਬਟੂਏ ਭਰਦੇ ,
ਪੁੱਤ ਬੈਠਦਾ ਵੈਲੀਆਂ ਦੀ ਢਾਣੀ ਵਿੱਚ ।
ਪੈਲਸਾ ਤੇ ਡੀ ਜੇ ਫਾਲਤੂ ਹੀ ਖਰਚੇ ਨੇ ,
ਵਿਆਹ ਹੁੰਦੇ ਨੇ ਬੱਸ ਚਾਹ ਪਾਣੀ ਵਿੱਚ ।
ਰੰਗ ਬਰੰਗੇ ਲਿਬਾਸਾ ਚ ਸ਼ੈਤਾਨ ਬੈਠੇ ,
ਗੁਰਸਿੱਖ ਤਾ ਸ਼ਰਧਾ ਰੱਖੇ ਬਾਣੀ ਵਿੱਚ ।
ਜੱਗ ਬੀਤੀ ਨਾਲ ਸ਼ੇਅਰ ਨਹੀ ਬਣਦੇ ,
ਲੇਖਕ ਆਪਣੇ ਦੁੱਖ ਦੱਸੇ ਕਹਾਣੀ ਵਿੱਚ ।
ਧੀਆਂ ਕੂੰਜਾਂ ਦੀ ਉਡਾਰੀ ਉੱਡ ਜਾਵਣ ,
ਸੱਸ ਅਕਸ ਨਾ ਦੇਖੇ ਨੂੰਹ ਰਾਣੀ ਵਿੱਚ ।
ਸੱਤੀ ਮੇਰੀ ਮੇਰੀ ਕਰਦਾ ਬੰਦਾ ਤੁਰ ਜਾਦਾ ,
ਉਲਝਿਆ ਰਹੇ ਮੋਹ ਵਾਲੀ ਤਾਣੀ ਵਿੱਚ ।
ਸੱਤੀ ਉਟਾਲਾਂ ਵਾਲਾ
ਨੇੜੇ ਜਾਡਲਾ, ਸ਼.ਭ. ਸਿੰਘ ਨਗਰ
