ਹੱਕ

ਰਜਨੀ ਵਾਲੀਆ
ਜਦ ਹੱਕ ਮੰਗਿਆਂ ਵੀ ਮਿਲਦੇ,
ਨਹੀਂ ਤਾਂ ਖੋਹਣੇ ਪੈਂਦੇ ਨੇ |
ਕੋਈ ਆਪਣਾ ਹੋਵੇ ਦੁਖੀ ਤਾਂ,
ਦੁੱਖ ਵੰਡਾਉਣੇ ਪੈਂਦੇ ਨੇ |
ਜਦ ਹੱਕ ਮੰਗਿਆਂ ਵੀ ਮਿਲਦੇ,
ਨਹੀਂ ਤਾਂ ਖੋਹਣੇ ਪੈਂਦੇ ਨੇ |

ਉਸਦੇ ਨਾਲ-ਨਾਲ ਹੀ ਰਹਿਣਾ,
ਨਾਲ ਹੀ ਬਹਿਣਾ ਪੈਂਦਾ ਏ |
ਜੋ ਉਸਦੀ ਮੰਗ ਹੋਵੇ ਉਸ,
ਉੱਤੇ ਢਹਿਣਾ ਪੈਂਦਾ ਏ |
ਉਸਦੀ ਕਹੀ ਤੇ ਫੁੱਲ ਕਾਲੀਨ,
ਵਿਛਾਉਣੇ ਪੈਂਦੇ ਨੇਂ |
ਜਦ ਹੱਕ ਮੰਗਿਆਂ ਵੀ ਮਿਲਦੇ,
ਨਹੀਂ ਤਾਂ ਖੋਹਣੇ ਪੈਂਦੇ ਨੇ |

ਵਿੱਚ ਭੱਠ ਦੇ ਪੈਣਾ ਪੈ ਜਾਏ,
ਤਾਂ ਪੈ ਜਾਂਦੇ ਪੈਣ ਵਾਲੇ |
ਨੰਗੀਆਂ ਤੇਗਾਂ ਨਾਲ ਖਹਿਣਾ,
ਪਏ ਤਾਂ ਖਹਿ ਜਾਂਦੇ ਖਹਿਣ ਵਾਲੇ |
ਆਪਣੇ ਸਿਰ ਖਾਰਾਂ ਦੇ ਤਾਜ,
ਕਦੇ ਸਜਾਉਣੇ ਪੈਂਦੇ ਨੇ |
ਜਦ ਹੱਕ ਮੰਗਿਆਂ ਵੀ ਮਿਲਦੇ,
ਨਹੀਂ ਤਾਂ ਖੋਹਣੇ ਪੈਂਦੇ ਨੇ |

ਹਰ-ਦਮ ਸੁੱਕਿਆਂ ਪੱਤਿਆਂ ਵਾਂਗੂ,
ਹੋ ਹੌਲਿਆਂ ਰਹਿਣਾ ਪੈਂਦਾ ਏ |
ਹਰ-ਦਮ ਸੁੱਕਿਆਂ ਪੱਤਿਆਂ ਵਾਂਗੂ,
ਕਦਮੀਂ ਲਹਿਣਾ ਪੈਂਦਾ ਏ |
ਸੁੱਖ ਸਮੇਂ ਦੇ ਹੱਥੋਂ ਸੱਜਣਾ ਦੇ,
ਛੁਡਾਉਣੇ ਪੈਂਦੇ ਨੇਂ |
ਜਦ ਹੱਕ ਮੰਗਿਆਂ ਵੀ ਮਿਲਦੇ,
ਨਹੀਂ ਤਾਂ ਖੋਹਣੇ ਪੈਂਦੇ ਨੇ |

ਬਾਹਵਾਂ ਬਣਕੇ ਰਹਿਣਾ ਪੈਂਦਾ,
ਜੇ ਸਾਥ ਨਿਭਾਉਣੇ ਹੋਵਣ |
ਹੱਕਾਂ ਖਾਤਿਰ ਲੜਨਾ ਪੈਂਦਾ,
ਜੇ ਹੱਕ ਜਤਾਉਣੇ ਹੋਵਣ |
ਬੜੇ-ਬੜੇ ਫਿਰ ਨਾਡੂ ਖਾਂ,
ਵੀ ਢਾਉਣੇ ਪੈਂਦੇ ਨੇਂ |
ਜਦ ਹੱਕ ਮੰਗਿਆਂ ਵੀ ਮਿਲਦੇ,
ਨਹੀਂ ਤਾਂ ਖੋਹਣੇ ਪੈਂਦੇ ਨੇ |

ਸਭ ਹੱਦਾਂ ਬੰਨੇ ਟੁੱਟ ਜਾਵਣ,
ਜਦ ਹੱਕ ਨਹੀਂ ਮਿਲਦੇ |
ਮਿਹਨਤ ਕੀਤਿਆਂ ਮਾਲੀ ਦੇ,
ਜਦ ਫੁੱਲ ਨਹੀਂ ਖਿਲਦੇ |
ਨੱਕ ਹਾਕਮਾਂ ਨੂੰ ਫੇਰ,
ਘਸਾਉਣੇ ਪੈਂਦੇ ਨੇਂ |
ਜਦ ਹੱਕ ਮੰਗਿਆਂ ਵੀ ਮਿਲਦੇ,
ਨਹੀਂ ਤਾਂ ਖੋਹਣੇ ਪੈਂਦੇ ਨੇ |

ਰਜਨੀ ਹਰ ਮਸਲੇ ਦਾ ਹੱਲ,
ਕਦੇ ਨਈਂ ਮਿਲਦਾ ਜੰਗਾਂ ਚੋਂ |
ਕੁਝ ਵੀ ਗਲਤ ਨਈ ਹੁੰਦਾ,
ਮੰਗੀਆਂ ਜਾਇਜ਼ ਮੰਗਾਂ ਚੋਂ |
ਡਾਹੁਣੇ ਪੈਣ ਜੇ ਹੱਥ ਮੱਚਦੀ,
ਵਿੱਚ ਡਾਹੁਣੇ ਪੈਂਦੇ ਨੇਂ |
ਜਦ ਹੱਕ ਮੰਗਿਆਂ ਵੀ ਮਿਲਦੇ,
ਨਹੀਂ ਤਾਂ ਖੋਹਣੇ ਪੈਂਦੇ ਨੇ |