ਅਸ਼ੋਕ ਵਰਮਾ
ਬਠਿੰਡਾ, 28 ਸਤੰਬਰ।ਮਹਾਰਾਜਾ ਰਣਜੀਤ ਸਿੰਘ ਪੰਜਾਬ ਟੈਕਨੀਕਲ ਯੂਨੀਵਰਸਿਟੀ ਬਠਿੰਡਾ ਦੇ ਭੌਤਿਕ ਵਿਗਿਆਨ ਵਿਭਾਗ ਨੂੰ ਬੋਰਡ ਆਫ਼ ਰਿਸਰਚ ਇਨ ਨਿਊਕਲੀਅਰ ਸਾਇੰਸ ਵੱਲੋਂ ‘ਵਾਯੂਮੰਡਲ ਦੇ ਕਣਾਂ ਦੀ ਏਰੋਸੋਲ ਘਣਤਾ ਦਾ ਅੰਦਾਜਾ ਲਗਾਉਣ ਲਈ ਸੰਖਿਆ ਅਤੇ ਸਮੂਹਿਕ ਇਕਾਗਰਤਾ ਦਾ ਇਕੋ ਸਮੇਂ ਮਾਪ ਕਰਨਾ’ ਵਰਗਾ ਵਕਾਰੀ ਪ੍ਰਾਜੈਕਟ ਮਿਲਿਆ ਹੈ। ਯੂਨੀਵਰਸਿਟੀ ਦੇ ਭੌਤਿਕ ਵਿਗਿਆਨ ਵਿਭਾਗ ਦੇ ਮੁਖੀ ਅਤੇ ਡੀਨ ਰਿਸਰਚ ਐਂਡ ਡਿਵੈਲਪਮੈਂਟ, ਪ੍ਰੋਫੈਸਰ (ਡਾ.) ਜਸਬੀਰ ਸਿੰਘ ਹੁੰਦਲ ਨੇ ਦੱਸਿਆ ਕਿ ਪ੍ਰਮਾਣੂ ਸਾਇੰਸਜ ਦੇ ਖੋਜ ਬੋਰਡ (ਬੀ.ਆਰ.ਐਨ.ਐਸ.) ਨੇ ਪ੍ਰਜੈਕਟ ਲਈ 41 ਲੱਖ ਰੁਪਏ ਦੀ ਗਰਾਂਟ ਮਨਜੂਰ ਕੀਤੀ ਹੈ। ਇਸ ਪ੍ਰੋਜੈਕਟ ਦੀ ਪ੍ਰਮੁੱਖ ਜਾਂਚ ਅਧਿਕਾਰੀ ਯੂਨੀਵਰਸਿਟੀ ਦੇ ਭੌਤਿਕ ਵਿਗਿਆਨ ਵਿਭਾਗ ਦੀ ਸਹਾਇਕ ਪ੍ਰੋਫੈਸਰ ,ਡਾ. ਵੀਨਾ ਸਰਮਾ ਹੈ ਜਦੋਂ ਕਿ ਇਸੇ ਵਿਭਾਗ ਦੇ ਦੋ ਸਹਿ-ਪ੍ਰਮੁੱਖ ਜਾਂਚ ਅਧਿਕਾਰੀ ’ਡਾ. ਸੰਦੀਪ ਕਾਂਸਲ ਅਤੇ ਮਿਸ ਡਾ. ਗਗਨ ਗੁਪਤਾ ਹਨ।ਗੌਰਤਲਬ ਹੈ ਕਿ ਕਣ ਪਦਾਰਥ(ਪੀ.ਐਮ.) ਮੁਅੱਤਲ ਠੋਸ ਜਾਂ ਤਰਲ ਪਦਾਰਥ ਹੁੰਦੇ ਹਨ। ਇਹ ਵੱਖ-ਵੱਖ ਕਿਸਮਾਂ ਦੇ ਵਿਆਸ ਤੇ ਅਧਾਰਿਤ ਹੁੰਦੇ ਹਨ।
ਇਹਨਾਂ ਦੇ ਕਣਾਂ ਦਾ ਮਨੁੱਖੀ ਸਿਹਤ ‘ਤੇ ਮਾੜਾ ਪ੍ਰਭਾਵ ਪੈਂਦਾ ਹੈ ਅਤੇ ਇਹਨਾਂ ਦੀ ਮਾਤਰਾ ਏਅਰ ਕਵਾਲਿਟੀ ਇੰਡੈਕਸ (ਹਵਾ ਦੀ ਗੁਣਵੱਤਾ) ਨਿਰਧਾਰਤ ਕਰਦੀ ਹੈ। ਡਾ. ਹੁੰਦਲ ਨੇ ਦੱਸਿਆ ਕਿ ਹੁਣ ਤੱਕ ਇਨਾਂ ਕਣ ਪਦਾਰਥਾਂ ਨੂੰ ਮਾਪਣ ਲਈ ਉਪਕਰਣ ਫੈਕਟਰੀ ਕੈਲੀਬ੍ਰੇਸਨਾਂ ‘ਤੇ ਨਿਰਭਰ ਕਰਦੇ ਹਨ, ਜੋ ਕਿ ਸਹੀ ਨਹੀਂ ਹੈ। ਇਹ ਪ੍ਰੋਜੈਕਟ ਉਪਕਰਣਾਂ ਦੀ ਫੈਕਟਰੀ ਕੈਲੀਬ੍ਰੇਸਨ ਦੀ ਵਰਤੋਂ ਕਰਨ ਵਾਲੇ ਮਾਪਾਂ ਅਤੇ ਅੰਕਾਂ ਦੇ ਅਸਲ ਮੁੱਲਾਂਕਣ ਅਤੇ ਕਣ ਦੇ ਪਦਾਰਥਾਂ ਦੀ ਵਿਆਪਕ ਇਕਾਗਰਤਾ ਵਿਚਕਾਰਲੇ ਪਾੜੇ ਨੂੰ ਦੂਰ ਕਰੇਗਾ। ਇਸ ਪ੍ਰੋਜੈਕਟ ਵਿਚ ਕਣ ਪਦਾਰਥਾਂ ਦਾ ਗਾੜਾਪਣ, ਮੌਸਮ ਦੇ ਜਹਿਰੀਲੇ ਪ੍ਰਦੂਸ਼ਕ ਤੱਤਾਂ ਅਤੇ ਉਨਾਂ ਦੇ ਸਰੋਤ ਦੇ ਅਨੁਪਾਤ ਤੇ ਮੌਸਮ ਵਿਗਿਆਨ ਦੇ ਮਾਪਦੰਡਾਂ ਦੇ ਪ੍ਰਭਾਵਾਂ ਦਾ ਵੀ ਅਧਿਐਨ ਕੀਤਾ ਜਾਵੇਗਾ। ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਪ੍ਰੋ. (ਡਾ.) ਮੋਹਨ ਪਾਲ ਸਿੰਘ ਈਸਰ ਅਤੇ ਪ੍ਰੋ. ਜਸਬੀਰ ਸਿੰਘ ਹੁੰਦਲ ਨੇ ਯੂਨੀਵਰਸਿਟੀ ਦੀ ਭੌਤਿਕ ਵਿਗਿਆਨ ਖੋਜ ਟੀਮ, ਨੂੰ ਵਧਾਈ ਦਿਂਦਿਆਂ ਇਸ ਦੇ ਸਫਲਤਾਪੂਰਵਕ ਸੰਪੂਰਨ ਹੋਣ ਲਈ ਸੁਭ ਕਾਮਨਾਵਾਂ ਦਿੱਤੀਆਂ ਹਨ।
