ਰਜਨੀ ਵਾਲੀਆ
ਧੀਏ ਦੀਵਾਂਸੀ਼ਏ ਨੀ ਜਾਵਾਂ ਤੈਥੋਂ,
ਵਾਰੇ ਬਲਿਹਾਰੇ |
ਤੈਥੋਂ ਵਾਰਾਂ ਪੂਰਾ ਚੰਨ ਤੇ ਵਾਰ ,
ਦਿਆਂ ਸਿਤਾਰੇ |
ਧੀਏ ਦੀਵਾਂਸੀ਼ਏ ਨੀ ਜਾਵਾਂ ਤੈਥੋਂ,
ਵਾਰੇ ਬਲਿਹਾਰੇ
ਦੇਵੇ ਮੇਰੇ ਦਿਲ ਨੂੰ ਸਕੂਨ,
ਤੇਰੀ ਨਿੱਕੀ-ਨਿੱਕੀ ਗੱਲ |
ਚਿੰਤਾ ਕਰਨ ਨਾ ਦੇਵੇਂ,
ਮਸਲੇ ਕਰ ਦੇਵੇਂ ਹੱਲ |
ਤੇਰੇ ਨਾਲ ਘਰਦਾ ਵਿਹੜਾ,
ਤੇਰੇ ਨਾਲ ਨੇ ਚੁਬਾਰੇ |
ਧੀਏ ਦੀਵਾਂਸੀ਼ਏ ਨੀ ਜਾਵਾਂ ਤੈਥੋਂ,
ਵਾਰੇ ਬਲਿਹਾਰੇ
ਭਾਵੇਂ ਤੂੰ ਹਾਲੇ ਨਿੱਕੀ ਗੱਲਾਂ,
ਤਾਂ ਕਰਦੀ ਸਿਆਣੀਆਂ |
ਭਾਂਢਾ-ਟੀਂਡਾ ਵੀ ਧੋਵੇਂ,
ਪਾਵੇਂ ਦੁੱਧ ਚ ਮਧਾਣੀਆਂ |
ਤੇਰਾ ਅੰਮੀ-ਅੰਮੀ ਕਹਿਣਾ,
ਨੀ ਸੀਨਾ ਮੇਰਾ ਠਾਰੇ |
ਧੀਏ ਦੀਵਾਂਸੀ਼ਏ ਨੀ ਜਾਵਾਂ ਤੈਥੋਂ,
ਵਾਰੇ ਬਲਿਹਾਰੇ
ਜਦੋਂ ਘੇਰ ਲੈਂਦੇ ਦੁੱਖ,
ਦਿਸੇਂ ਤੂੰ ਹੀ ਮੈਨੂੰ ਫਿਰ |
ਨੀ ਦੇਵੇਂ ਹੌਸਲੇ ਤਸੱਲੀ,
ਬਣ ਜਾਵੇਂ ਮੇਰੀ ਧਿਰ |
ਭੁੱਲ ਜਾਵਾਂ ਸੱਭੇ ਦੁੱਖ,
ਤੂੰ ਕਰੇਂ ਬਹੁਤ ਚਾਰੇ |
ਧੀਏ ਦੀਵਾਂਸੀ਼ਏ ਨੀ ਜਾਵਾਂ ਤੈਥੋਂ,
ਵਾਰੇ ਬਲਿਹਾਰੇ
ਭਾਵੇਂ ਤੂੰ ਕਰਦੀ ਪੜਾਈਆਂ,
ਮੈਂ ਲਵਾਂ ਤੈਥੋਂ ਸਿੱਖ |
ਤੂੰ ਓਨੀ ਏਂ ਸਿਆਣੀਂ,
ਜਿੰਨੀ ਭੋਲੀ ਤੇਰੀ ਦਿੱਖ |
ਬੜੀ ਸਮਝਦਾਰੀ ਵਰਤੇਂ,
ਪੈਣ ਦੇਵੇਂ ਨਾ ਖਿਲਾਰੇ |
ਧੀਏ ਦੀਵਾਂਸੀ਼ਏ ਨੀ ਜਾਵਾਂ ਤੈਥੋਂ,
ਵਾਰੇ ਬਲਿਹਾਰੇ
ਨਿੱਤ ਗੁੱਡੀਆਂ ਦੇ ਨਾਲ,
ਖੇਡੇਂ ਗੁੱਡੀਆਂ ਪਟੋਲੇ |
ਤੇਰੀ ਮੇਰੀ ਗੱਲ ਸਾਂਝੀ,
ਤੇਰੇ ਮੇਰੇ ਚ ਨਾ ਓਹਲੇ |
ਨੀ ਤੂੰ ਫੁੱਲਾਂ ਨਾਲੋਂ ਹੌਲੀ,
ਮੇਰੇ ਦਿਲ ਤੇ ਨਹੀਂ ਭਾਰੇ |
ਧੀਏ ਦੀਵਾਂਸੀ਼ਏ ਨੀ ਜਾਵਾਂ ਤੈਥੋਂ,
ਵਾਰੇ ਬਲਿਹਾਰੇ
ਤੇਰੀ ਘਰ ਵਿੱਚ ਹੋਂਦ ਨਾਲ,
ਭਰੇ ਲੱਗਣ ਖਜਨੇਂ |
ਤੇਰੇ ਨਾਲ ਜੱਗ ਜਿਉਂਦਾ,
ਤੇਰੇ ਨਾਲ ਨੇਂ ਜਮਾਨੇ |
ਤੇਰੇ ਕਰਕੇ ਹੀ ਮੈਂ,
ਲੱਗ ਗਈ ਹਾਂ ਕਿਨਾਰੇ |
ਧੀਏ ਦੀਵਾਂਸੀ਼ਏ ਨੀ ਜਾਵਾਂ ਤੈਥੋਂ,
ਵਾਰੇ ਬਲਿਹਾਰੇ
ਤੇਰੇ ਵਰਗੀਆਂ ਧੀਆਂ,
ਹਰ ਮਾਂ ਨੂੰ ਥਿਹਾਉਣ |
ਮਾਵਾਂ ਰੱਜ ਮਾਣ ਕਰਨ ਤੇ,
ਖੁਸੀ਼ਆਂ ਮਨਾਉਣ |
ਧੀਆਂ ਪਾ ਕੇ ਤੇਰੇ ਜਹੀਆਂ,
ਸੁਪਨੇਂ ਜਾਵਣ ਸਾਕਾਰੇ |
ਧੀਏ ਦੀਵਾਂਸੀ਼ਏ ਨੀ ਜਾਵਾਂ ਤੈਥੋਂ,
ਵਾਰੇ ਬਲਿਹਾਰੇ
ਰਜਨੀ ਧੀਏ ਤੈਨੂੰ ਪਾ ਕੇ,
ਤਾਂ ਫੁੱਲੀ ਨਹੀਂ ਸਮਾਉਂਦੀ |
ਤੂੰ ਨਾਨੀ ਕੋਲੋਂ ਲਏਂ ਸਿਆਣਪਾਂ ,
ਉਹ ਜਦੋਂ ਵੀ ਹੈ ਆਉਂਦੀ |
ਮੇਰੇ ਤਾਂ ਸੱਚ ਆਖਾਂ ਧੀਏ,
ਹੋ ਗਏ ਪਾਰ ਉਤਾਰੇ |
ਧੀਏ ਦੀਵਾਂਸੀ਼ਏ ਨੀ ਜਾਵਾਂ ਤੈਥੋਂ,
ਵਾਰੇ ਬਲਿਹਾਰੇ
