ਜੱਗਾ ਗਿੱਲ ਸਾਫੂਵਾਲਾ
ਵੇ ਮੈਂ ਚੰਨ ਬਣ ਜਾਵਾਂ
ਜੇ ਤੂੰ ਬਣ ਜਾਏ ਚਕੋਰ
ਪਾਈਏ ਪਿਆਰ ਦੀਆਂ ਬਾਤਾਂ
ਸਾਨੂੰ ਚਾਹੀਦਾ ਕੀ ਹੋਰ
ਵੇ ਮੈਂ ਬਣ ਕੇ ਪਤੰਗ
ਗੋਤੇ ਅੰਬਰਾਂ ਚ ਲਾਵਾਂ
ਪਾਵੀਂ ਕਾਗ਼ਜ਼ਾਂ ਦੇ ਖੱਤ
ਜਦੋਂ ਵਗਣ ਹਵਾਵਾਂ
ਤੇਰੇ ਹੱਥਾਂ ਵਿੱਚ ਹੋਵੇ
ਵੇ ਹੁਲਾਰਿਆਂ ਦੀ ਡੋਰ
ਪਾਈਏ ਪਿਆਰ ਦੀਆਂ ਬਾਤਾਂ
ਸਾਨੂੰ ਚਾਹੀਦਾ ਕੀ ਹੋਰ
ਮੇਰਾ ਚਿੱਤ ਕਰੇ ਚੰਨਾ
ਕਲੀ ਬਾਗ਼ਾਂ ਦੀ ਮੈ ਹੋਵਾਂ
ਬਣ ਭੰਵਰਾ ਤੂੰ ਆਵੇਂ
ਵੇ ਮੈਂ ਦੇਵਾਂ ਖੁਸ਼ਬੋਵਾਂ
ਆਣ ਠੰਡੇ ਸੀਤ ਬੁੱਲੇ
ਸੁਣੇ ਪੱਤਿਆਂ ਦਾ ਛੋਰ
ਪਾਈਏ ਪਿਆਰ ਦੀਆਂ ਬਾਤਾਂ
ਸਾਨੂੰ ਚਾਹੀਦਾ ਕੀ ਹੋਰ
ਦਿਲ ਕਰਦਾ ਏ ਗਿੱਲਾ
ਵੇ ਮੈਂ ਬਣ ਜਾਵਾਂ ਪਾਣੀ
ਤੇਰੇ ਰੋਮ-ਰੋਮ ਵਿੱਚ
ਜਾਵਾਂ ਰਗ਼-ਰਗ਼ ਥਾਣੀਂ
ਸਾਫੂ ਵਾਲੀਆ ਵੇ ਲਈਏ
ਆ ਮੁਹੱਬਤਾਂ ਦੀ ਲੋਰ
ਪਾਈਏ ਪਿਆਰ ਦੀਆਂ ਬਾਤਾਂ
ਸਾਨੂੰ ਚਾਹੀਦਾ ਕੀ ਹੋਰ
ਵੇ ਮੈਂ ਚੰਨ ਬਣ ਜਾਵਾਂ
ਜੇ ਤੂੰ ਬਣ ਜਾਏ ਚਕੋਰ
ਪਾਈਏ ਪਿਆਰ ਦੀਆਂ ਬਾਤਾਂ
ਸਾਨੂੰ ਚਾਹੀਦਾ ਕੀ ਹੋਰ
