ਮੁੰਬਈ-ਬਾਲੀਵੁੱਡ ਅਦਾਕਾਰਾ ਮਨੀਸ਼ਾ ਕੋਇਰਾਲਾ ਜੋ ਅੰਡਕੋਸ਼ ਦੇ ਕੈਂਸਰ ਦੀ ਸ਼ਿਕਾਰ ਹੋ ਚੁੱਕੀ ਹੈ। ਹਾਲਾਂਕਿ ਸਮੇਂ ਸਿਰ ਇਲਾਜ ਮਿਲਣ ਤੋਂ ਬਾਅਦ ਉਸ ਨੂੰ ਇਸ ਗੰਭੀਰ ਬੀਮਾਰੀ ਤੋਂ ਨਿਜਾਤ ਮਿਲ ਗਈ ਪਰ ਜਦੋਂ ਉਹ ਇਸ ਨਾਲ ਜੂਝ ਰਹੀ ਸੀ ਤਾਂ ਉਸ ਨੂੰ ਕਾਫੀ ਤਕਲੀਫ ’ਚੋਂ ਲੰਘਣਾ ਪਿਆ। ਜਾਣਕਾਰੀ ਮੁਤਾਬਕ ਇਸ ਸਾਲ ਰਿਲੀਜ਼ ਹੋਈ ਵੈੱਬ ਸੀਰੀਜ਼ ‘ਹੀਰਾਮੰਡੀ’ ਨਾਲ ਸ਼ਾਨਦਾਰ ਵਾਪਸੀ ਕੀਤੀ ਹੈ। ਹਾਲ ਹੀ ਵਿੱਚ ਮਨੀਸ਼ਾ ਨੇ ਆਪਣੇ ਕੈਂਸਰ ਦੇ ਪੜਾਅ ਬਾਰੇ ਗੱਲ ਕੀਤੀ। ਆਪਣੇ ਇਸ ਸਮੇਂ ਬਾਰੇ ਗੱਲਬਾਤ ਕਰਦਿਆਂ ਮਨੀਸ਼ਾ ਕੋਇਰਾਲਾ ਨੇ ਕਿਹਾ ਕਿ ’ਮੈਨੂੰ ਯਾਦ ਹੈ ਕਿ ਮੈਂ ਹਨੇਰੇ, ਨਿਰਾਸ਼ਾ ਅਤੇ ਦਰਦ ਨੂੰ ਮਹਿਸੂਸ ਕਰਕੇ ਟੁੱਟ ਜਾਂਦੀ ਸੀ। 2012 ’ਚ, ਮੈਨੂੰ ਪਤਾ ਲੱਗਿਆ ਅਤੇ ਮੈਨੂੰ ਨਹੀਂ ਪਤਾ ਸੀ ਕਿ ਇਹ ਅੰਡਕੋਸ਼ ਕੈਂਸਰ ਦੀ ਆਖਰੀ ਸਟੇਜ ਸੀ ਅਤੇ ਜਦੋਂ ਮੈਨੂੰ ਨੇਪਾਲ ’ਚ ਪਤਾ ਲੱਗਿਆ ਤਾਂ ਮੈਂ ਬਹੁਤ ਡਰੀ ਹੋਈ ਸੀ। ਜ਼ਾਹਿਰ ਹੈ, ਹਰ ਕਿਸੇ ਦੀ ਤਰ੍ਹਾਂ ਮੈਂ ਵੀ ਹਸਪਤਾਲ ’ਚ ਸੀ। ਉਥੇ ਵੀ ਜਦੋਂ ਡਾਕਟਰ ਆਏ – ਦੋ, ਤਿੰਨ ਡਾਕਟਰ, ਚੋਟੀ ਦੇ ਡਾਕਟਰ, ਅਤੇ ਮੈਂ ਉਨ੍ਹਾਂ ਨਾਲ ਗੱਲ ਕੀਤੀ, ਮੈਨੂੰ ਲੱਗਾ ਕਿ ਮੈਂ ਮਰਨ ਵਾਲੀ ਹਾਂ ਅਤੇ ਮੈਨੂੰ ਲੱਗਾ ਕਿ ਇਹ ਮੇਰਾ ਅੰਤ ਹੈ। ਮਨੀਸ਼ਾ ਕੋਇਰਾਲਾ ਨੇ ਅੱਗੇ ਦੱਸਿਆ ਕਿ ਉਹ 5-6 ਮਹੀਨੇ ਤੱਕ ਨਿਊਯਾਰਕ ’ਚ ਰਹੀ ਅਤੇ ਆਪਣਾ ਇਲਾਜ ਕਰਵਾਉਂਦੀ ਰਹੀ। ਉਨ੍ਹਾਂ ਨੇ ਆਪਣਾ 11 ਘੰਟੇ ਤੱਕ ਆਪਰੇਸ਼ਨ ਕਰਵਾਇਆ ਸੀ। ਉਨ੍ਹਾਂ ਨੇ ਦੱਸਿਆ ਕਿ ਇਸ ਦੌਰਾਨ ਡਾਕਟਰਾਂ ਨੇ ਉਸ ਦਾ ਬਹੁਤ ਵਧੀਆ ਇਲਾਜ ਕੀਤਾ ਅਤੇ ਕੀਮੋਥੈਰੇਪੀ ਲਈ ਵੀ ਉਨ੍ਹਾਂ ਦਾ ਰਿਸਪਾਂਸ ਰਿਹਾ। ਮਨੀਸ਼ਾ ਨੇ ਦੱਸਿਆ ਕਿ ਉਸ ਦੀ ਮਾਂ ਨੇ ਨੇਪਾਲ ਤੋਂ ਮਹਾਮਰਿਤੁੰਜਯ ਪੂਜਾ ਕਰਨ ਤੋਂ ਬਾਅਦ ਰੁਦਰਾਕਸ਼ ਦੀ ਮਾਲਾ ਲਿਆਂਦੀ ਸੀ ਅਤੇ ਸਰਜਰੀ ਦੌਰਾਨ ਰੱਖਣ ਲਈ ਡਾਕਟਰ ਨੂੰ ਦਿੱਤੀ ਸੀ। ਸਰਜਰੀ ਤੋਂ ਬਾਅਦ ਡਾਕਟਰ ਨੇ ਕਿਹਾ ਕਿ ਮਾਲਾ ਨੇ ਚੰਗਾ ਕੰਮ ਕੀਤਾ ਹੈ।
