ਚੰਡੀਗੜ੍ਹ: ਪੰਜਾਬ ਕਲਾ ਪਰਿਸ਼ਦ ਚੰਡੀਗੜ੍ਹ ਵਲੋਂ ਲੜੀਵਾਰ ਸੰਗੀਤਕ ਪ੍ਰੋਗਰਾਮ ‘ਸੁਰਮਈ ਸ਼ਾਮ’ ਤਹਿਤ ਗਾਇਕਾ ਰਜਾ ਹੀਰ ਨੇ ਆਪਣੀ ਗਾਇਕੀ ਦੇ ਰੰਗ ਬਿਖੇਰੇ। ਸ਼ਮਾ ਜਲਾਉਣ ਤੇ ਪ੍ਰਧਾਨਗੀ ਦੀ ਰਸਮ ਪਰਿਸ਼ਦ ਦੇ ਚੇਅਰਮੈਨ ਡਾ ਸੁਰਜੀਤ ਪਾਤਰ ਨੇ ਕੀਤੀ ਤੇ ਰਜਾ ਹੀਰ ਦੀ ਸਾਫ ਸੁਥਰੀ ਗਾਇਕੀ ਵਾਸਤੇ ਉਸਨੂੰ ਸਾਬਾਸ਼ ਦਿੱਤੀ। ਡਾ ਪਾਤਰ ਨੇ ਕਿਹਾ ਕਿ ਪਰਿਸ਼ਦ ਨੌਜਵਾਨ ਕਲਾਕਾਰਾਂ ਦੀ ਹੌਸਲਾ ਅਫਜਾਈ ਲਈ ਹਮੇਸ਼ਾ ਉਪਰਾਲੇ ਕਰਦੀ ਰਹੇਗੀ। ਗਾਇਕਾ ਰਜਾ ਹੀਰ ਨੇ ਵਾਰਿਸ ਦੀ ਹੀਰ,ਟੱਪੇ, ਸੂਫੀ ਕਲਾਮ, ਤੇ ਗੀਤ ਗਾਏ ਤਾਂ ਦਰਸ਼ਕ ਝੂੰਮਣ ਲੱਗ ਪਏ। ਪਰਿਸ਼ਦ ਦੇ ਉਪ ਚੇਅਰਮੈਨ ਡਾ ਯੋਗਰਾਜ ਨੇ ਸਾਰੇ ਸਰੋਤਿਆਂ ਦਾ ਸਮਾਪਤੀ ਮੌਕੇ ਧੰਨਵਾਦ ਕੀਤਾ। ਮੰਚ ਸੰਚਾਲਕ ਦੇ ਫਰਜ ਡਾ ਨਿਰਮਲ ਜੌੜਾ ਨੇ ਨਿਭਾਏ। ਇਸ ਸਮਾਰੋਹ ਵਿਚ ਮੀਡੀਆ ਅਧਿਕਾਰੀ ਨਿੰਦਰ ਘੁਗਿਆਣਵੀ, ਪ੍ਰੀਤਮ ਰੁਪਾਲ, ਭੋਲਾ ਕੁਲੈਹਰੀ, ਸਰਦਾਰਾ ਸਿੰਘ ਚੀਮਾ, ਬਲਕਾਰ ਸਿਧੂ, ਹਰਪ੍ਰੀਤ ਸਿੰਘ ਚਨੰ ਤੇ ਹੋਰ ਪਤਵੰਤੇ ਹਾਜਰ ਰਹੇ।
