ਗੁਰਿੰਦਰਜੀਤ ਨੀਟਾ ਮਾਛੀਕੇ/ ਕੁਲਵੰਤ ਧਾਲੀਆਂ, ਫਰਿਜ਼ਨੋ (ਕੈਲੀਫੋਰਨੀਆ)
ਅਮਰੀਕਾ ਵਿੱਚ ਇੱਕ ਫਰਮਾਸਿਸਟ ਵੱਲੋਂ ਸ਼ਾਪਿੰਗ ਵੈੱਬਸਾਈਟ ‘ਈਬੇ’ ਉੱਪਰ 125 ਕੋਰੋਨਾ ਵੈਕਸੀਨ ਕਾਰਡ ਵੇਚਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਮਾਮਲੇ ਵਿੱਚ ਜਾਣਕਾਰੀ ਅਨੁਸਾਰ ਸ਼ਿਕਾਗੋ ਵਿੱਚ ਇੱਕ ਲਾਇਸੈਂਸਸ਼ੁਦਾ ਫਾਰਮਾਸਿਸਟ ਨੇ ਈਬੇ ਉੱਤੇ 125 ਪ੍ਰਮਾਣਿਕ ਕੋਵਿਡ -19 ਟੀਕਾਕਰਨ ਕਾਰਡ ਵੇਚੇ ਹਨ। ਅਮਰੀਕਾ ਦੇ ਜਸਟਿਸ ਵਿਭਾਗ ਦੇ ਅਨੁਸਾਰ ਮਾਰਚ ਦੇ ਅਖੀਰ ਤੋਂ ਲੈ ਕੇ ਅਪ੍ਰੈਲ ਦੇ ਅਰੰਭ ਤੱਕ 11 ਵੱਖ -ਵੱਖ ਖਰੀਦਦਾਰਾਂ ਨੂੰ ਸੀ ਡੀ ਸੀ ਦੇ ਵੈਕਸੀਨ ਕਾਰਡ ਵੇਚਣ ਦੇ ਮਾਮਲੇ ਵਿੱਚ ਇੱਕ ਫਾਰਮੇਸੀ ਚੇਨ ‘ਤੇ ਕੰਮ ਕਰਨ ਵਾਲੇ 34 ਸਾਲਾਂ ਟਾਂਗਟਾਂਗ ਜਹਾਓ ਨਾਮ ਦੇ ਫਰਮਾਸਿਸਟ ਨੂੰ ਮੰਗਲਵਾਰ ਨੂੰ ਗ੍ਰਿਫਤਾਰ ਕੀਤਾ ਗਿਆ । ਵੈੱਬਸਾਈਟ ਦੇ ਰਿਕਾਰਡ ਅਨੁਸਾਰ ਜਹਾਓ ਨੇ ਪਹਿਲਾਂ ਈਬੇ ‘ਤੇ ਇੱਕ ਖਰੀਦਦਾਰ ਨੂੰ 10 ਟੀਕਾਕਰਨ ਕਾਰਡ ਵੇਚੇ , ਜਿਸ ਨੇ 25 ਮਾਰਚ ਨੂੰ 88.03 ਡਾਲਰ ਦਾ ਭੁਗਤਾਨ ਕੀਤਾ । ਉਸ ਦੇ ਦੋ ਦਿਨਾਂ ਬਾਅਦ, ਉਸਨੇ ਇੱਕ ਹੋਰ ਵਿਅਕਤੀ ਨੂੰ ਹੋਰ 10 ਕਾਰਡ 95.88 ਡਾਲਰ ਵਿੱਚ ਵੇਚੇ। ਇਸ ਤਰ੍ਹਾਂ ਉਸਨੇ ਹੋਰ ਦਰਜਨਾਂ ਕਾਰਡ ਇਸ ਸਾਈਟ ‘ਤੇ ਵੇਚ ਦਿੱਤੇ। ਜਹਾਓ ‘ਤੇ ਸਰਕਾਰੀ ਪ੍ਰਾਪਰਟੀ ਦਸਤਾਵੇਜ਼ਾਂ ਦੀ ਚੋਰੀ ਦੇ 12 ਮਾਮਲਿਆਂ ਦੇ ਦੋਸ਼ ਲਗਾਏ ਗਏ ਹਨ ਅਤੇ ਦੋਸ਼ੀ ਹੋਣ ਦੀ ਸੂਰਤ ਵਿੱਚ ਉਸ ਨੂੰ ਹਰੇਕ ਮਾਮਲੇ ਵਿੱਚ 10 ਸਾਲ ਦੀ ਕੈਦ ਹੋ ਸਕਦੀ ਹੈ। ਸ਼ਿਕਾਗੋ ਐਫ ਬੀ ਆਈ ਦੇ ਅਧਿਕਾਰੀਆਂ ਅਨੁਸਾਰ ਬਿਨਾਂ ਟੀਕਾਕਰਨ ਦੇ ਵਿਅਕਤੀਆਂ ਨੂੰ ਕੋਵਿਡ ਟੀਕਾਕਰਨ ਕਾਰਡ ਜਾਣਬੁੱਝ ਕੇ ਵੇਚਣਾ ਲੱਖਾਂ ਅਮਰੀਕੀਆਂ ਨੂੰ ਗੰਭੀਰ ਜੋਖਮ ਵਿੱਚ ਪਾਉਂਦਾ ਹੈ। ਇਸ ਲਈ ਇਹ ਇੱਕ ਗੰਭੀਰ ਜੁਰਮ ਹੈ। ਇਸ ਮਾਮਲੇ ਦੇ ਸਬੰਧ ਵਿੱਚ ਐਫ ਬੀ ਆਈ ਅਤੇ ਮਨੁੱਖੀ ਸੇਵਾਵਾਂ ਵਿਭਾਗ ਦੇ ਅਧਿਕਾਰੀ ਜਾਂਚ ਕਰ ਰਹੇ ਹਨ।
