ਦਿੱਲੀ ਗੁਰਦੁਆਰਾ ਕਮੇਟੀ ਦੀ ਚੋਣਾਂ ਸਮੇਂ ਸਿਰ ਕਰਵਾਉਣ ਦੇ ਆਦੇਸ਼
ਬਾਦਲਾਂ ਵਲੋਂ ਭਾਜਪਾ ਨਾਲ ਰਿਸ਼ਤਾ ਤੋੜਨ ਦੇ ਨਤੀਜੇ ਆ ਰਹੇ ਹਨ ਸਾਹਮਣੇ
ਨਵੀਂ ਦਿੱਲੀ 12 ਅਕਤੂਬਰ (ਮਨਪ੍ਰੀਤ ਸਿੰਘ ਖਾਲਸਾ):-ਦਿੱਲੀ ਹਾਈ ਕੋਰਟ ਨੇ ਦਿੱਲੀ ਗੁਰਦੁਆਰਾ ਕਮੇਟੀ ਦੀਆਂ ਚੋਣਾਂ ਸਮੇਂ ਸਿਰ ਕਰਵਾਉਣ ਲਈ ਹਰੀ ਝੰਡੀ ਦੇ ਦਿੱਤੀ ਹੈ ਜਿਸ ਨਾਲ ਬਾਦਲ ਦਲ ਦੀ ਚੋਣਾਂ ਲਟਕਾਨ ਦੀ ਮਨਸ਼ਾ ਨੂੰ ਵੱਡਾ ਝਟਕਾ ਲੱਗਾ ਹੈ । ਅਦਾਲਤ ਨੇ ਬਾਦਲ ਦਲ ਅਤੇ ਦਿੱਲੀ ਕਮੇਟੀ ਦੀਆਂ ਨਵੀਆਂ ਵੋਟਰ ਸੂਚੀਆਂ ਦੀ ਮੰਗ ਰੱਦ ਕਰਦਿਆ ਕਿਹਾ ਕਿ ਚੋਣਾਂ ਪੁਰਾਣੀ ਵੋਟਰ ਸੂਚੀ ਵਿਚ ਨਵੇਂ ਵੋਟਰ ਸ਼ਾਮਲ ਕਰਕੇ ਚੋਣਾਂ ਕਰਵਾਈਆਂ ਜਾਣਗੀਆਂ । ਜਿਸ ਲਈ ਅਦਾਲਤ ਨੇ ਸੋਧੇ ਵੋਟਰ ਸੂਚੀ ਵਿੱਚ ਚੋਣਾਂ ਕਰਵਾਉਣ ਲਈ ਦਿੱਲੀ ਗੁਰਦੁਆਰਾ ਚੋਣ ਨਿਰਦੇਸ਼ਕ ਨੂੰ ਆਦੇਸ਼ ਦਿਤੇ ਹਨ । ਇਸਦੇ ਨਾਲ ਹੀ ਅਦਾਲਤ ਨੇ 2025 ਦੀਆਂ ਕਮੇਟੀ ਚੋਣਾਂ ਕਰਵਾਉਣ ਲਈ ਨਵੀਂ ਵੋਟਰ ਸੂਚੀ ਬਨਾਉਣ ਦੇ ਆਦੇਸ਼ ਵੀ ਜਾਰੀ ਕੀਤੇ ਹਨ । ਜਿਕਰਯੋਗ ਹੈ ਅਦਾਲਤ ਵਲੋਂ ਇਹ ਆਦੇਸ਼ ਜਸਟਿਸ ਜੈਅੰਤ ਨਾਥ ਨੇ ਜਾਗੋ ਪਾਰਟੀ ਵੱਲੋਂ ਅਕਾਲੀ ਦਲ ਦੀਆਂ ਚੋਣਾਂ ਨੂੰ ਲਟਕਾਉਣ ਦੀ ਨੀਅਤ ਦਾ ਖੁਲਾਸਾ ਕਰਨ ਤੋਂ ਬਾਅਦ ਦਿੱਤਾ ਹੈ। ਅਦਾਲਤ ਵਲੋਂ ਮਾਮਲੇ ਦੀ ਹੋਈ ਆਖਰੀ ਸੁਣਵਾਈ 18 ਸਤੰਬਰ ਤੋਂ ਬਾਅਦ ਦਿੱਲੀ ਹਾਈ ਕੋਰਟ ਨੇ ਅਪਣੇ ਆਰਡਰ ਰਾਖਵੇਂ ਰੱਖ ਲਏ ਸਨ । ਅਜ ਆਏ ਅਦਾਲਤੀ ਆਦੇਸ਼ ਤੋਂ ਬਾਅਦ ਦਿੱਲੀ ਗੁਰਦੁਆਰਾ ਕਮੇਟੀ ਦੀ ਚੋਣਾਂ ਅਪ੍ਰੈਲ 2021 ਵਿਚ ਹੋ ਸਕਦੀਆਂ ਹਨ ਅਤੇ ਅਦਾਲਤ ਦੇ ਆਦੇਸ਼ ਤੋਂ ਬਾਅਦ ਦਿੱਲੀ ਗੁਰਦੁਆਰਾ ਚੋਣ ਡਾਇਰੈਕਟੋਰੇਟ ਅੱਜ ਵੋਟ ਬਣਾਉਣ ਦੀਆਂ ਸੂਚਨਾਵਾਂ ਜਾਰੀ ਕਰ ਸਕਦਾ ਹੈ ।
