ਏਨੀ ਸੌਖੀ ਨਹੀ ਜਿੰਦਗੀ

ਰਜਨੀ ਵਾਲੀਆ
ਏਨੀ ਸੌਖੀ ਨਹੀ ਜਿੰਦਗੀ,
ਜਿੰਨੀ ਸੌਖੀ ਲਗਦੀ ਏ |
ਮੱਚ ਜਾਦਾ ਏ ਬੰਦਾ,
ਲਾਟ ਇਹ ਤਾਂ ਅੱਗ ਦੀਏ |
ਏਨੀ ਸੌਖੀ ਨਹੀ ਜਿੰਦਗੀ,
ਜਿੰਨੀ ਸੌਖੀ ਲਗਦੀ ਏ |

ਵਿੱਚ ਹਨੇਰੇ ਤੁਰਨਾ ਬੜਾ,
ਹੀ ਔਖਾ ਲਗਦਾ ਏ |
ਚਾਨਣ ਹੋਵੇ ਨਾਲ ਤਾਂ ਤੁਰਨਾ,
ਸੌਖਾ ਲਗਦਾ ਏ |
ਇਹ ਵੱਟੀ ਹੁੰਦੀ ਦੀਵੇ ਦੀ,
ਬੁਝ-ਬੁਝ ਕੇ ਜਗਦੀ ਏ |
ਏਨੀ ਸੌਖੀ ਨਹੀ ਜਿੰਦਗੀ,
ਜਿੰਨੀ ਸੌਖੀ ਲਗਦੀ ਏ |

ਧੋਖਾ ਕਈ ਵਾਰ ਤਾਂ ਸਾਹਮਣੇ,
ਬੈਠਾ ਨਜਰੀਂ ਨਹੀਂ ਆਉਂਦਾ |
ਕਈ ਵਾਰੀ ਜਖਮ ਹੁੰਦਾ ਏ ਚੋਖਾ,
ਨਜਰੀ ਨਹੀਂ ਆਉਂਦਾ |
ਠੱਗਣ ਤੇ ਆ ਜਾਵੇ ਤਾਂ ਇਹ,
ਰੀਝ ਨਾਲ ਠੱਗਦੀ ਏ |
ਏਨੀ ਸੌਖੀ ਨਹੀ ਜਿੰਦਗੀ,
ਜਿੰਨੀ ਸੌਖੀ ਲਗਦੀ ਏ |

ਜਿੰਦਗੀ ਕਈ ਵਾਰੀ ਏਸ,
ਤਰਾਂ ਦੀ ਖੇਡ ਰਚਾਉਂਦੀ ਏ |
ਜੋ ਫੜਿਆ ਹੋਵੇ ਉਹ ਟੁੱਟ ਜਾਂਦੈ,
ਕੱਖ ਸਮਝ ਨਾ ਆਉਂਦੀ ਏ |
ਤੱਕਦੀ ਨਹੀ ਏ ਕਿਸੇ ਨੂੰ,
ਆਪਣੇ ਵਹਿਣ ਚ ਵਗਦੀ ਏ |
ਏਨੀ ਸੌਖੀ ਨਹੀ ਜਿੰਦਗੀ,
ਜਿੰਨੀ ਸੌਖੀ ਲਗਦੀ ਏ |

ਕੋਈ ਕਿਸੇ ਨੂੰ ਸਮਝੇ ਨਾ,
ਇਹ ਬੰਦੇ ਨੂੰ ਸਮਝ ਲਵੇ |
ਝੂਠਾ ਹੋਵੇ ਸੱਚਾ ਹੋਵੇ ਇਹ,
ਫੜ ਬੰਦੇ ਦੀ ਰਮਜ਼ ਲਵੇ |
ਬੰਦਿਆ ਤੇਰੀ ਇਹ ਤਾਂ ਵਾਕਫ,
ਰਗ ਰਗ ਦੀ ਏ |
ਏਨੀ ਸੌਖੀ ਨਹੀ ਜਿੰਦਗੀ,
ਜਿੰਨੀ ਸੌਖੀ ਲਗਦੀ ਏ |

ਦੱਸਦੇ ਤੂੰ ਉਸਨੂੰ ਜਿਸਨੂੰ,
ਦਿਲੋਂ ਤੂੰ ਚਾਹੁੰਨਾ ਏਂ |
ਬਿਨ ਆਈ ਨਾ ਮਰ ਜਾਵੇ,
ਕਿਉਂ ਮਾਰ ਮੁਕਾਉਨਾ ਏਂ |
ਰਜਨੀ ਜਿੰਦ ਕਈ ਵਾਰੀ ਤਾਂ ਜੁਗਨੂੰ
ਵਾਂਗਰ ਜਗ-ਬੁਝ ਮਘਦੀ ਏ |
ਏਨੀ ਸੌਖੀ ਨਹੀ ਜਿੰਦਗੀ,
ਜਿੰਨੀ ਸੌਖੀ ਲਗਦੀ ਏ