ਕਿਤੇ ਅੱਲ੍ਹਾ ਲਈ ਝਗੜਾ ਏ
ਕਿਤੇ ਹੈ ਰਾਮ ਦਾ ਰੌਲਾ
ਦਿਲਾਂ ਵਿੱਚ ਸਭ ਦੇ ਵਸਦਾ ਜੋ
ਹੈ ਉਸ ਭਗਵਾਨ ਦਾ ਰੌਲਾ….
ਮਰੀ ਇਨਸਾਨੀਅਤ ਜੱਗ ਤੋਂ
ਖੋਟੀਆਂ ਨੀਤਾਂ ਹੋਈਆਂ ਨੇ
ਕਿਸੇ ਦੀ ਆਸਥਾ ਤੇ ਕਿਉਂ
ਸਾਨੂੰ ਤਕਲੀਫਾਂ ਹੋਈਆਂ ਨੇ
ਧਰਮ ਸਾਰੇ ਹੀ ਸੱਚ ਦੱਸਦੇ
ਹੈ ਝੂਠੇ ਇਨਸਾਨ ਦਾ ਰੌਲਾ……
ਧਰਮ ਦੇ ਨਾਮ ਉੱਤੇ ਕਿਉਂ
ਦਿਲਾਂ ਵਿੱਚ ਨਫ਼ਰਤਾਂ ਭਰੀਆਂ
ਖੁਦਾ ਦੇ ਵਾਸਤੇ ਕਿਉਂ ਨਹੀਂ
ਮੁਹੱਬਤਾਂ ਜਾਂਦੀਆਂ ਕਰੀਆਂ
ਕਿਤੇ ਹਿੰਦੂ ਸਿੱਖ ਇਸਾਈ
ਕਿਤੇ ਮੁਸਲਮਾਨ ਦਾ ਰੌਲਾ…..
ਮੰਨੋ ਚਾਹੇ ਨਾ ਮੰਨੋ ਇਸ ਨੂੰ
ਖੁਦਾ ਹਰ ਥਾਂ ਤੇ ਹਾਜ਼ਰ ਏ
ਧਰਮ ਧੰਦਾ ਬਣਾਓ ਨਾ
ਧਰਮ ਇੱਕ ਸੱਚ ਦਾ ਮਾਰਗ ਏ
ਕੱਟੜਤਾ ਮਰ ਕੇ ਮਰਦੀ ਨਹੀਂ
ਪਾਵੇ ਸ਼ਮਸ਼ਾਨ ਦਾ ਰੌਲਾ…….
ਇਹੋ ਫੁਰਮਾਣ ਬਾਣੀ ਦਾ
ਮਾਨਸ ਕੀ ਜਾਤ ਇਕੋ ਹੈ
ਸਾਰਿਆਂ ਧਰਮਾਂ ਜਾਤਾਂ ਲਈ
ਕੁਦਰਤ ਕਾਇਨਾਤ ਇਕੋ ਹੈ
ਜੰਗਾ ਸਭ ਧਰਤੀ ਲਈ ਹੋਈਆਂ
ਨਹੀਂ ਅਸਮਾਨ ਦਾ ਰੌਲਾ……
– ਦੀਪ ਰਾਊਕੇ ਕਲਾਂ (ਮੋਗਾ)
