ਇਹ ਕੀ ਚੰਨ ਚੜ੍ਹਾ ਛੱਡਿਆ ਈ?

✍️ਜਗਦੇਵ ਮਾਨ ‘ਸ਼ੇਖਦੌਲਤ’

ਕੀ ਭਾਣਾ ਵਰਤਾ ਛੱਡਿਆ ਈ ।
ਬੰਦਾ ਈ ਚੁੱਲ੍ਹੇ ਡਾਹ ਛੱਡਿਆ ਈ।
ਠੰਡਾ ਬੁੱਲਾ ਕਿੱਥੋਂ ਆਵੇ
ਸਾਰਾ ਮੁਲਕ ਤਪਾ ਛੱਡਿਆ ਈ।
ਨੋਟਬੰਦੀ ਦੇ ਜ਼ਖ਼ਮ ਸੀ ਅੱਲੇ
ਹੋਰ ਜੀ ਐੱਸ ਟੀ ਲਾ ਛੱਡਿਆ ਈ ।
ਭੁੱਖੇ ਬਾਲ ਨਿਆਣੇ ਵਿਲਕਣ
ਕਾਰੋਬਾਰ ਖੜ੍ਹਾ ਛੱਡਿਆ ਈ ।
ਪਹਿਲਾਂ ਕਿਹੜਾ ਘੱਟ ਦੁਖੀ ਸਾਂ,
ਕੋਰੋਨਾ ਹੋਰ ਲਿਆ ਛੱਡਿਆ ਈ ।
ਕਹਿਕੇ ਮੰਦਰ ਨਵਾਂ ਬਨਾਉਣੈ
ਦਿਲ ਚੋਂ ਮੰਦਰ ਢਾਹ ਛੱਡਿਆ ਈ ।
ਰਾਮ ਰਾਜ ਦਾ ਰੌਲ਼ਾ ਪਾਕੇ
ਹਿੰਦੂ ਫਾਹੇ ਲਾ ਛੱਡਿਆ ਈ ।
ਬਾਕੀ ਸਾਰੇ ਰਗੜ ਦਿੱਤੇ ਨੇ
‘ਕੱਲਾ ਅਮਿੱਤ ਸ਼ਾਹ ਛੱਡਿਆ ਈ ।
ਝੋਲ਼ਾ ਚੱਕ ਤੇ ਦੌੜ ਫਕੀਰਾ
ਸਾਰਾ ਦੇਸ਼ ਰੁਆ ਛੱਡਿਆ ਈ ।
ਅਸੀਂ ਨਹੀਂ ਮੋਦੀ ਮੋਦੀ ਕੀਤਾ
ਸਾਨੂੰ ਵੀ ਮਰਵਾ ਛੱਡਿਆ ਈ ।
ਇੱਕ ਢਿੱਡਾਂ ਵਿੱਚ ਭੁੱਖ ਛੱਡੀ ਐ,
ਜਾਂ ਚੁੱਲਿ੍ਹਆਂ ਤੇ ਘਾਹ ਛੱਡਿਆ ਈ ।
ਬਸ ਦੇਸ਼ ਦਾ ਨਾਂ ਹੀ ਬਚਿਐ
ਸਾਰਾ ਦੇਸ਼ ਵਿਕਾ ਛੱਡਿਆ ਈ ।
‘ਮਾਨਾਂ’ ਕਿੰਝ ‘ਸ਼ੇਖਦੌਲਤ’ ਜਾਵਾਂ
ਨਾ ਕੋਈ ਪਹੀ ਨਾ ਰਾਹ ਛੱਡਿਆ ਈ ।
ਇਹ ਕੀ ਚੰਨ ਚੜ੍ਹਾ ਛੱਡਿਆ ਈ ।
ਬੰਦਾ ਈ ਚੁੱਲ੍ਹੇ ਡਾਹ ਛੱਡਿਆ ਈ। …